دێ وه‌ره ڤی که‌ری د ڤی بۆری را ده‌رباس بکه
ئه‌ڤه چه‌ند رۆژن جاردن مه‌دیایا په‌که‌کێ و ئه‌ندامێن رێڤه‌به‌ریا په‌که‌کێ ب ده‌نگه‌ک بلند شه‌رێ په‌ده‌کێ دکن، په‌که‌که و هه‌موو گرۆپێن ب وێڤه گردایی و ب هه‌موو هێزا خوە یا مه‌دیایێ شه‌رێ په‌ده‌کێ و مالباتا بارزانی دکن و وان ب خیانه‌تێ تاوانبار دکن و بانگا پێکانینا هه‌ڤپه‌یمان و هه‌ڤکاریان ل دژێ په‌ده‌کێ دکن.
موستافا کاراسو ئه‌ندامێ رێڤه‌به‌ریا په‌که‌کێ پشتی سه‌ردانا خوه یا ئیرانێ ته‌ڤلی به‌رنامه‌یه‌ک یا تایبه‌ت یا مه‌دیا خه‌به‌رێ، بوو.
کاراسوو د ئاخاڤتنا خوه دا به‌حسا په‌ده‌کێ کر و پەدەکە ب خیانەتێ تاوانبار کر و گۆت کو، وان تەڤگەرێن په‌ده‌کێ گه‌له‌ک نرخاندن. “ئه‌ڤ کریارێن پەدەکە وه‌که پارتیه‌ک کورد دکه، ل هه‌ر ده‌ڤه‌را جیهانێ وه‌که خیانه‌تێ تێ نرخاندن.” کاراسوو گۆت: “نه‌پێکانه مرۆڤ ب ره‌نگه‌کی نه‌رم نێزییکی ڤێ خیانەتا پەدەکێ ببه و هێجه‌تان ژێ را په‌یدا بکە.”
ل گۆر کاراسوو دڤێ هەر کەس هەلوەستێ خوە ل دژی پەدەکێ زەلال بکە و ئەو هەلوستێن هەتا نها ل دژی پەدەکێ هاتینە نیشاندان تێرا ناکن و ئه‌ڤ یه‌ک ژی ژ بۆ کوردان لاوازی یه. کورد دڤێ ل دژی خیانه‌تێ هه‌لوه‌ستان نیشان بدن کو کاربن ئازاد ببن. نیشاننه‌دانا هه‌لوه‌سته‌ک زەلال ل هه‌مبه‌ری پەدەکێ، ژ بۆ گه‌لێ کورد لاوازی یه. هین ژی هن نێزیکاتی هه‌نه کو تەڤگەرێن پەدەکێ نۆرمال نیشان “ددن. پرانیا گه‌لێ کورد ڤێ خیانه‌تێ دبینه، لێ به‌لێ هین ژی به‌شه‌ک ژ به‌ر سوودوه‌رگرتنا ژ ده‌رفه‌تێن پەدەکێ بێده‌نگ دمینن.
راستی چو نرخاندن ل سه‌ر ڤان گۆتنێن دژمنایه‌تی نایێ کرن. لێ د ڤێ ده‌ربارێ ده، هه‌لوه‌ستا پارتی و ئالیێن کوردستانی گه‌له‌کی گرنگه. ئه‌گه‌ر تو وه‌ری راستیێ بێده‌نگیا پارتی و رێخستنێن کوردا د ڤێ ده‌ربارێ ده، تێ واته‌یا پشتگریا ڤان دیتنێن کاراسو و ئه‌ڤ بێده‌نگی سیاسه‌تا په‌که‌کێ یا دژمناتی و تێکبرنا ده‌ستکه‌فتیێن کوردستانی ب هێزتر دکه.
پارتی و ڕێخستنێن کورد دڤێ ل سه‌ر ڤان داخوویانیێن به‌رپرسێن په‌که‌کێ یێن شه‌رخواز و ئاشکه‌ره خوه ئاماده دکن کو، پراڤاکاسیۆنا بکن و په‌ده‌که ژی به‌رسڤا وان بده و جاردن ببه قرقرا وان و به‌حسا ”شه‌رێ براکوژی” یێ بکن و ژ خوه را ڤێ یه‌کێ بکن مەلزه‌مه‌یه‌کا پرۆپاگانده‌یێ. ئه‌گه‌ر ئیرۆ پارتیێن کوردا د ڤێ مژارێ دا نه‌بن خوه‌دی هه‌لوه‌ست و ل هه‌مبه‌ر ڤان ئێریشێن په‌که‌کێ دیتنا خوه ژ رایا گشتی را ئاشکه‌ره نه‌کن، دێ سبه‌هی ده‌ره‌نگ به و چو بهایێ داخوویانیێن وان ژی نامینه.
ژ ئالیه‌ک دن، دڤێ یه‌نه‌ک ژی دەست ڤێ سیاسه‌تا خوه یا کو، هه‌ڤکاریا په‌که‌کێ ل باشوور دکه به‌رده و ژ دەست وێ له‌یزتکا کو په‌که‌کێ ل دژی په‌ده‌کێ ب کاربینه به‌رده. ئه‌ڤ یه‌ک ژ په‌ده‌کێ پتر زه‌ره‌رێ دده یه‌نه‌کێ. هه‌روه‌ها ئه‌گه‌ر ئه‌ڤ هه‌لوه‌ستا یه‌نه‌کێ به‌رده‌وام به، دێ په‌که‌که ئه‌ولی سه‌رێ یه‌نه‌کێ بخوه و زه‌ره‌ره‌ک مه‌زن بده یه‌نه‌کێ. ژ بۆ رێخستنه‌ک میلیتەر وه‌ک پەکەکێ دۆست و دژمن نینە. د دەقیقەیەکێ دا، دۆست دبه دژمن و دژمن دکاره ببه دۆست. دڤێ یه‌نه‌که ڤێ راستیێ ببینە و تێبگەهە. وەکە تێ زانن کو گه‌له‌ک که‌س د ناڤا یه‌نه‌کێ دا ژی ب ڤێ سیاسه‌تا پارتیا خوه عاجزن.
وه‌ک هاتی گۆتن چو نرخاندن ل سه‌ر داخوویانیا کاراسو نایێ کرن، کاراسو خوه‌دیێ دیرۆکەک تاریه و نه کورده و چو په‌یوه‌ندیا وی ب کوردیتیێ را نینە. ته‌نێ مرۆڤ دکاره ب گۆتنه‌ک کورده‌واری ڤێ داخوویانیێ بنرخینه. دبێژن: ”دێ وه‌ره ڤی که‌ری د ڤی بۆری را ده‌رباس بکه”
نێرین/شرۆڤه
