سه‌ره‌دانا پارتی ل ڤێ داویی بۆ به‌غدایێ جودا بوو
سه‌ره‌دانا شاندەیێ پارتییا دەموکراتا کوردستانێ ل ڤێ داویی ژ بۆ به‌غدایێ
سه‌ره‌دانا ئه‌ڤێ جارێ یا پارتییا دەموکراتا کوردستانێ ئه‌نجام دایی گەلەک گرنگ و سەرکەفتی بوو. چونکی د ڤێ سه‌ره‌دانێ دا نامەیا سه‌رۆک بارزانی دگه‌ل شاندەیێ گەهشتە دەستێ رایەدارێن حکومەت و ئالیێن سیاسی یێن ئیراقێ. ژ بوو هەموو ئالیێن ئیراقێ، نامەیا سەرۆک بارزانی پەیامەکا زەلال بوو کو ئێدی دڤێ سنۆرەک ژ بنپێکرنا رێکەفتنێن د ناڤبەر هەر دو ئالیان دا هاتنە ئیمزا کرن بێ دانان. شاندەیا پارتی ئەڤ نامەیا هەم گەهاندە دەستێ ئالیێن ئیراقی و هەم ژی گەهاندە نوونەرا نەتەوەیێن یەکگرتی، بالیۆزخانەیا ئەمریکا و بریتانیایێ و بالیۆزخانەیێن دن یێن ل بەغدایێ. دا کو هه‌موو ئالی بزانن هه‌رێما کوردستانێ قەوارەیک دەستووری یە دڤێ ل گۆر دەستوورێ معاملە ب هەرێما کوردستانێ را بێ کرن .
پشتی گه‌له‌ك جڤین د ناڤبه‌را شاندەیێ پارتی و ئالیێن سیاسی ل ئیراقێ هاتینە کرن، بریار هاته دان کو هه‌موو هەیڤان موچه و شایسته‌یێن دارایی یێن هه‌رێما کوردستانێ بهێته هنارتن.
ل ڤێره تشته‌ك دبیته جهێ پرسیارێ .. ئه‌رێ بۆچی ڤێ چارێ ئالیێن سیاسی ل عێراقێ به‌رامبه‌ر شاندەیێ پارتی گەلە نه‌‌رمی نیشان دا؟
پارتییا دەموکراتی کوردستانێ تەکەزی ل سەر جێبەجێکرنا ناڤەرۆکا رێکەفتنا دگەل چارچۆڤه‌یا هه‌ماهه‌نگی یا به‌ری پێکئینانا حکومه‌تا محمه‌د شیاع سودانی هاتیە کرن، وەک
1- موچه و شایسته‌یێن دارایی یێن هەرێما کوردستانێ هه‌موو هه‌یڤان بهێته هنارتن .
2- دڤێت یاسایا نه‌فت و گازێ ب دروستی و ل دووڤ رێکه‌فتنه‌کا پێشوەخت و ل دووڤ ده‌ستووری بهێته ئامادەکرن و ل په‌رله‌مانێ ئیراقێ ده‌نگ ل سه‌ر بهێته‌دان بێی کو ده‌ستکاری تێدا بهێته کرن.
3- دڤێت رێکه‌ڤتنا شنگالێ، یاکو د ناڤبەرا حکومەتا هەرێما كوردستانێ و حکومەتا فەدەرال یا ئیراقێ دا هاتیە ئیمزا کرن، بهێته جێبه‌جێکرن و هه‌موو هێزێن بیانی د ناف ئاخا شنگالی دا بهێنه ده‌رخستن و له‌شکه‌ره‌کێ وه‌سا بهێته دانان کو هه‌ر ژ خه‌لکێ شنگالێ بن .
4- دڤێت یاسایا ناوچه‌یێن جهێن ناکوکی ل سه‌ر تایبه‌ت مادده‌یێ 140 ل دووف ده‌ستوری بهێته جێبەجێکرن.
پارتی وه‌سا دابوو دیارکرن ئه‌گه‌ر خالێن سه‌ری هاتینه دیارکرن نه هێنه جێبه‌جێکرن، دبە کو پارتی ژی ب ئاوایێ موقته‌دا سه‌در خوە ژ پروسه‌یا سیاسیا عێراقێ ڤه‌کێشیت. ڤه‌کشینا پارتی ژ پروسه‌یا سیاسیا ئیراقێ دێ گه‌له‌ك زیان ب پێگه‌هێ ئیراقێ که‌فیت ل نافخوە و ده‌رڤه.
پارتی کار دکه‌ت ژ بو پاراستنا عێراقه‌کا فەدەرال و کوردستانه‌کا بهێز، لێ دڤێ دەستهەلاتدارێن ئیراقێ ژی پێشێلکاریان ل هەمبەر هەرێما کوردستانێ نەکن و ل گۆر دەستوورێ تەڤبگەرن. ئیراق گه‌له‌ك جاران باجا شاشیێن خوە یێن سیاسی ددە، چونکی پێگری ب ده‌ستوورێ و یاسایان ناکە. پارتی گەلەک جاران ئالیێن سیاسی ل ئیراقێ هشیار کرنه ژ به‌ر کو گەلەک جاران خه‌له‌ت پێگه‌هێ سیاسی و ده‌ستهه‌لاتداری و حکومرانیێ بکارئینایه.
نها حکومه‌تا هه‌رێما کوردستانێ ل دووڤ پێگه‌هێ خوە یێ ده‌ستوروی هه‌موو رێکارێن یاسایی یێن بودجه‌یێ جێبه‌جێکرنه، لێ ب مخابنی ڤه ئیراق هه‌ر جار بهانه‌کێ دبینە داکو موچه و شایسته‌یێن دارایی ژبۆ خه‌لکێ کوردستانێ دابین نەکەت. ژ به‌ر هه‌لوێستێ ڤێ داویێ یێ حکومه‌تا ئیراقێ کری به‌رامبه‌ر فه‌رمانبه‌رێن هه‌رێما کوردستانێ پارتییا دەموکراتی کوردستانێ گەلەک دلگرانە.
