نێچیرڤان بارزانی، سەرۆکێ هەرێما کوردستانێ، پێشوازی ل دەستەیا سەرۆکاتییێ یا ئەنجوومەنێ نیشتمانی یێ کوردی ل سووریێ (ئەنەکەسە) کر.
د جڤینێ دا، ڕەوشا گشتی یا ناڤچەیێ، گەشەدانێن دوماهییێ یێن ل رەوشا سووریێ، ڕەوشا کوردان و هەرێمێن کوردی ل وی وەلاتی، دگەل هلبژارتنێن دوماهییێ یێن ئەنجوومەنێ گەل ل سووریێ هاتنە گۆتۆبێژکرن.
هەردوو ئالییان تەکێد ل سەر گرنگیا پشکداریکرنا کوردان د پرۆسەیا سیاسی و سازیێن سیاسی، یاسادانان و ئیداری یێن سووریێ دا کرن، وەکو بنەمایەکێ سەرەکی بۆ مسۆگەرکرنا مافێن وان یێن ڕەوا.
د ڤی چوارچۆڤەیی دا، سەرۆک نێچیرڤان بارزانی تەکید ل سەر ڕۆل و ئامادەبوونا کاریگەری و گرنگییا ئێکدەنگیا (ئێک هەلوێستیا) کوردان ل سووریێ و بەردەوامیا گۆتۆبێژ و لێهەڤگەهشتنا د ناڤبەرا هەموو ئالیێن کوردی دا کر.
هەروەسا سەرۆک نێچیرڤان بارزانی هاندەر بوو بۆ پێشئێخستنا پەیوەندی و هەڤکاریا هەڤپشک دگەل شامێ، ب مەبەمەستا دیتنا چارەسەریەکا گشتگیر بۆ کێشەیێن سیاسی یێن هەلاویستی، ب وی ئاوایی کو ئەولەهی و ئارامیا ناڤچەیێ بپارێزیت.
ژ ئالیێ خۆ ڤە، شاندا مێڤان کورتەیەک دەربارەی چالاکی و بزاڤێن سیاسی یێن ئەنجوومەنی پێشکێش کر، هەروەسا سپاسی و پێزانینێن خوە بۆ پشتەڤانیا بەردەوام یا سەرۆک نێچیرڤان بارزانی و هەرێما کوردستانێ بۆ پرسا گەلێ کورد ل سووریێ دیار کرن.
مەتریسیێن ڕێکخراوا تیرۆریستی یا داعشێ و تەڤگەرێن وێ یێن دوماهییێ ل ناڤچەیێ، مژارەکا دن یا جڤینێ بوو. د ڤێ دەربارەیێ دا، بال کێشانە سەر سەرەدانا دوماهییێ یا تۆم باراک ، نوونەرێ تایبەت یێ سەرۆکێ ئەمریکایێ بۆ کاروبارێن عیراق و سووریێ بۆ هەولێرێ و جڤینا هەڤپشک دگەل سەرۆک نێچیرڤان بارزانی و مەزلووم عەبدی، کو تێدا تەکید ل سەر پێشئێخستنا هەڤکاریا هەڤپشک بۆ ڕووبەڕووبوونا تیرۆرێ هاتبوو کرن.
