قەیرانا بەنزینێ ب کێمکرنا بھایێ وێ چارەسەر نابە

 بەنزین مینا گازا سپی و گازا شل، گازوایل و گەلەک جۆرێن دن یێن سوتەمەنیان، چەند مفایێن خوە ھەبن، ھەوقاس زیانێن خوە ژی ھەنە، نەخاسمە د بیاڤێ ژینگەھێ دا، ژینگەھا پاک ژی ژێدەرێ ژیانێ یە و یا پیس ژی ژێدەرێ مرن، نەمان و ژناڤچوونا بیڤ و مرۆڤاتیێ ھەمیێ یە.

 ل جیھانا پێشکەفتی ئەڤە ژ 100 ساڵان پێترە ل جیگرەکی بۆ ڤان سوتەمەنیان دگەڕن، ئیرۆ ژی ژ ھەر دەمەکێ دن پێتر نێزیکی دەستبەرداریا یەکجاری یا ڤان سوتامەنیان بووینە، ئانکۆ ئالترناتیفێ گاز و پانزینێ، نەھەر بتنێ ڤەدیتیە، بەلکۆ کەتینە دکاری ژی دا.

 بۆ نموونە:

 ل وەڵاتەکێ وەکی سوید ڕێژا ترومبێلێن کارەبێ نێزیکی 30٪ بلندبوویە، و تا چەند ساڵێن دن ترومبێلێن ب بەنزین و گازوایلێ کاردکەن دێ ب یاسا ھێن قەدەغەکرن، د ھەمان دەم دا سوتەمەنیێ پاسێن ڤەگوھازتنێ ژی ژ بەرمایکێن خارنێ چێدکەن، ژبۆ دابینکرنا کارەبێ جیھان ب گشتێ بەرەف وزەیا پاقژ یا تیشکا ڕۆژێ دچە.

 ئەڤ چەندا ھان وێ ڕاستیێ دسەلمینە کۆ پەترۆلێ پاشەڕۆژەکا گەش نەمایە. لەوما پێدڤیە حکۆمەتا ھەرێما کوردستانێ ژی، خوە دگەل پێشڤەچوون و تەکنۆڵۆژیا سەردەم بگونجینە و ب جدی کار ل سەر ڤەدیتنا ئەلترناتیفێ پەترۆلێ بکە.

 مە ل کوردستانێ ڕیکۆرد ب ھەژمارا تەکسیان و ترومبێلێن کەسی ل سەر ئاستێ جیھانێ شکاندیە، بێ گومان ناڤێ کوردستانێ د ڤی بیاڤی دا دێ بکەڤە د پەرتووکا گینتس ژی دا. چام و قەیرانا مەزن مەزن ژی ئەڤەیە

 گەلۆ چ عەقل و لۆژیک قەبۆل دکە ل باژێرەکێ وەکی دھۆکێ پتر ژ 20 ھزار تەکسیان ھەبن و ل وەڵاتەکێ مینا سوید کو ڕووبەرێ وێ 450 ھزار کم^٢ و پتر ژ 10 ملیۆن کەسان ل سەر دژین بتنێ 15 ھزار تەکسی ھەبن!!!

 ل گۆر گەلەک ژێدەرێن جیھانی یێن تایبەت ب خواندن و ڤەکۆلینێن ژینگەھێ، عێراق و کوردستان ژی دگەل دا، د دەھ ساڵێن بھێن دا بکێری ژیانێ ناھێن، بلندبوونا پلەیێن گەرمێ و کێم بارانبارین دێ ئاخا وەڵاتی بەرەڤ بیابانکرنێ ببە. عێراق ژی وەکۆ دەولەت بتنێ ناڤ مایە، ھەرێما کوردستانێ ژی وەکۆ پێدڤی ل سەر ڤێ مەترسیا مەزن کارناکە.

 ھەبوونا ب دەھان ھزار تەکسیان بێ بەڕنامە، قڕکرن و ئیفلیچکرنا جڤاکێ مەیە، لەوما پێدڤیە حکۆمەتا ھەرێمێ کورستانێ ل پێشیا ھەر تشتی ڤێ ڕێژا مەزن یا تەکسیان کێم بکە، یان ھیچ نەبە ل سەر کۆمپانیان بسەپینە کو ترۆمبێلێن نیڤ کارەب ونیڤ بەنزین ھاوردە بكە، چونكە ئەڤ ژمارە ئێدی ناھێتە تەحەمولكرن،

 ھەرەسا پێدڤیە حکۆمەتا ھەرێما کوردستانێ ب ھەماھەنگی دگەل ناڤەندێن جیھانی و ڕێکخراوێن ناڤدەولەتی یێن تایبەت ب ژینگەھ و گھۆڕینێن سەقای ڤە، کۆنفرەنسان ئەنجام بدە و بجدی ل سەرڤێ ڕەوشا نە خوەزایی ڕاوەستە و چارەسەریێن ب لەز و گونجای ببینە، ئەگەر نە دێ خوەزیان بۆ سیبەرا داربەڕویەکێ خوازین.

ئیدریس تروانشی

دھۆك

2021.10.29