سیاسی

کی کێ دخاپینە

هه‌ڤسه‌رۆکێ به‌رێ یێ هەدەپێ سه‌لا‌‌‌هەدین ده‌مرتاش د گرتیگه‌هێ دا ب به‌رده‌وامی هه‌ڤپه‌یڤینان د گه‌ل ڕۆژنه‌مه‌ڤانان چێدکه‌ و ل سەر مژارێن جودا گه‌له‌ک داخوویانیا ددە. ئه‌ڤ یه‌ک ب سه‌رێ خوه‌ بوویه‌ بابه‌ته‌کا گۆتوبێژێ د ناڤا هەدەپێ دا. گه‌لۆ ده‌مرتاش دخوازه‌ ڕۆلێ ئەبدولا ئۆجەلان یێ ده‌مه‌کی بله‌یزه‌ یان ژی وی ئارمانجەکا دی هەیە و ئارمانجا وی چیه‌؟ ئاشکرایە کو ئۆجەلان ژ ڤێ یه‌کێ، ژ تەسەرفاتێن دەمرتاش گەلەک نەرازیه‌. لێ هێژا ده‌نگێ ئۆجەلان ده‌رناکه‌ڤه‌. ل گۆرا داخوویانیێن هنده‌ک سیاسه‌تمه‌دار و به‌رپرسێن پارتیێن ترک، هه‌ڤدیتن ب به‌رده‌وامی د گه‌ل ئۆجەلان هه‌نه‌ و ئه‌ڤ یه‌ک نها ب نه‌هینی تێن کرن و ژ مه‌دیایێ را ڤه‌شارتینه‌.

ئاشکرایە کو ئەگەر بریارا هلبژارتنان ب؛ داین، دێ ئاک پارتی ب کارتا ئۆجەلان بله‌یزه‌ و وی ل دژی یێن دن بکار بینە. ژ بۆ ڤێ یه‌کێ ژی، ژ نهاڤه‌ ژ ئالیێ ئاک پارتیێ ڤه‌ ئامادەکاری ل سه‌ر ئۆجەلان تێ کرن. هه‌لوه‌ستا ئۆجەلان یا د هلبژارتنێن بەرێ یێن شه‌ره‌داریان دا تێ زانین. گه‌له‌ک که‌س د نرخاندنێن خوه‌ دا دگۆتن کو، هێدی هلبژێرێن هەدەپێ گوه نادن ئۆجەلان. هه‌تا ڕاده‌یه‌کی، نها ژی، د ناڤا بنگه‌هێ هەدەپێ دا ئالۆزبوونا ڕۆلێ ئۆجەلان تێ گۆتوبێژ کرن.

لێ ڤه‌کری تێ زانین کو، داخوویانیێن ده‌مرتاش و له‌یزتکا ده‌ستهلاتێ یا ئۆجەلان بابه‌ته‌کا گۆتوبێژایه‌ و وه‌ک سیناریۆیەکێ تێ نرخاندن. هه‌ری داوی ده‌مرتاش هه‌ڤپه‌یڤینه‌ک ل گه‌ل ئاژانسا ئالمانی (دپا) پێکانی و به‌رسڤا پرسێن ئاژانسێ دان. ده‌مرتاش د به‌رسڤه‌کا خوه‌ دا به‌هسا تێکەلیێن پەکەکێ و هەدەپێ دکه‌ و دبێژه‌: ب چو ئاوایی تێکەلیێن من و تێکەلیێن هەدەپێ د گه‌ل پەکەکێ نینن و چێنه‌بوویه‌ ژی. هەدەپە پارتیه‌که‌ کو ته‌نێ ئاشتیێ دپارێزه‌ و پارتیه‌ک ده‌مۆکراتکه‌.

نها ل ڤێ ده‌رێ دڤێ مرۆڤ ل سه‌ر ڤێ گۆتنا ده‌مرتاش راوەستە. ژ به‌ر کو ده‌مرتاش ده‌ره‌وا دکه‌. نه‌ ژ پەکەکێ به‌ هەدەپە چنینە. هەدەپە پارتیه‌کا ژ ئالیێ به‌رپرسێن ترکیێ و ئۆجەلان ڤه‌ ژ بۆ پێڤاژۆیا “چاره‌سه‌ریێ” هاتیه‌ دامه‌زراندن. ده‌مه‌کی ده‌مرتاش دا خوویاکرن کو، ئه‌وێ دەست ژ سیاسه‌تێ به‌رده‌ لێ پەکەکێ ڕێ نه‌دایێ و ئه‌وی نه‌کاری ب ئیرادا خوه‌ دەست ژ سیاسه‌تێ به‌رده‌. هه‌رکه‌س دزانە کو، د ده‌ما هلبژارتنان دا لیسته‌یێن هەدەپێ ژ قه‌ندیل تێنه‌ دیار کرن. هه‌روه‌ها د ده‌ما هلبژارتنان دا ب سه‌دان ئه‌ندامێن هەدەپێ ژ بۆ ببن به‌ربژێر ڕێیا قه‌ندیل دگرن و تێنه‌ باشوورێ کوردستانێ ژ بۆ ل گه‌ل به‌رپرسێن پەکەکێ هه‌ڤدیتنا بکن دا کو ببن به‌ربژێرێ پارله‌مه‌نتۆیێ یان ژی یێ شه‌ره‌داریان.

ده‌مرتاش ب خوه‌ ب دەهان جاران سه‌ردانا ئیمرالی کریه‌ و فه‌رمانا خوه‌ ژ ئۆجەلان وه‌رگرتیه‌. هه‌روه‌ها ده‌مرتاش گه‌له‌ک جارا سه‌ردانا قه‌ندیل کریه‌ کو دا بزانبه‌ چ بکه‌. یانی پەکەکە و هەدەپە یه‌ک تشته‌.

پشتی هلبژارتنا گه‌له‌ک جارا قه‌ندیل بالا ده‌مرتاش ژ بۆ داخوویانیێن دده‌ کشاندیه‌ یا ڕاست کو سیاسه‌تا پەکەکێ چیه‌، دایه‌ خوویاکرن. یانی نابە ب داخوویانیێن پۆپولیست ڤی مله‌تی بخاپینن. تێکەلیێن ده‌مرتاش و هەدەپێ د گه‌ل پەکەکێ هه‌نه‌ و هه‌تا یه‌ک تشتن. ڕایا گشتی یا کورد ڤێ یه‌کێ دزانه‌. ده‌وله‌ت ڤێ یه‌کێ ژ هه‌ر ئالیه‌کی پتر دزانه‌. هه‌ر جارا ده‌مرتاش و شاندەیێن هەدەپێ سه‌ردانا قه‌ندیل کرین،به‌رپرسه‌کی میت یا ترکیێ ل گه‌ل وان بوویە. هه‌ر جارێ نامه‌یێن ئۆجەلان کو ڕێدکرن قه‌ندیل ب ده‌ستێ میتێ ددان ده‌مرتاش و هه‌ڤالێن وی. کی کێ دخاپینه‌. هه‌تا ژ خاپاندنێ پتر حه‌نه‌کێن خوه‌ ل ڤی مله‌تی دکن.

٢٠٢١.١١.٧

نێرین/شرۆڤه‌

Back to top button