نێچیرڤان بارزانی، سەرۆکێ هەرێما کوردستانێ، ل ڕۆژا ١٢ی تەباخا ٢٠٢٦ێ، د پەیامەکێ دا پێشوازیەکا گەرم ل پەسەندکرنا یاسایا “پتەوکرنا ئێکڕێزیا نەتەوەیی و تێکەلبونا چڤاكی“ ل پەرلەمانێ تركیەیێ کر و ئەڤ پێنگاڤە وەک دەستپێکا قۆناغەکا نوو و گرنگ بۆ ئینانا ئاشتی و ئارامیێ ل دەڤەرێ وەسف کر.
د پەیاما خۆ دا، سەرۆکێ هەرێمێ ئاماژە ب هەڵویستێ نەگۆڕێ هەرێما کوردستانێ کر بەرامبەر چارەسەریا ئاشتیانە و ڕاگەهاند: ئەم هەردەم ل سەر وێ باوەرێ نە کو ئاشتی و دیالۆگ بژاردەیێن هەرە ڕاستن و سەردەمێ چەکی و چارەسەریا سەربازی ب دوماهی هاتیە. ئەڤ یاسایە دەرفەتەکا مەزنە بۆ ئاڤاکرنا باوەریێ و پێکڤەژیانا ئاشتیانە د ناڤبەرا هەموو پێکهاتەیێن تركیەیێ دا و دڤێ هەموو کەس پشتیوانیێ لێ بکەن و بۆ سەرئێخستنا ئاشتیێ کار بکەن.”
ل بەشەکێ دی یێ پەیامێ دا، نێچیرڤان بارزانی ڕێز و دەستخۆشیا خوە گەهاندە ڕەجەب تەیب ئۆردۆگان، سەرۆککۆمارێ تركیەیێ، و هەموو ئەو سەرکردە و ئالیێن ڕۆل د پەسەندکرنا ڤێ یاسایێ دا هەیی.
د دوماهیا پەیاما خوە دا، سەرۆکێ هەرێما کوردستانێ دوپات کر کو هەرێما کوردستانێ وەک هەردەم ئامادەیە پشتیوانیا تەمام. بۆ پاراستنا ئاشتی و ئارامیێ ل تەڤایا هەرێمێ پێشکەش بکەت.
