نڤیسار

چیرۆكا ھەڤدیتنا بارزانی و بایدن شواتا 2015

د چارچۆڤەیێ ھەڤدیتنا سەرۆک بارزانی و جۆزێف بایدن ل شواتا 2015ێ

سەرۆک بارزانی و شاندەیێ پێ را د شواتا سالا 2015ێ دا ژ بۆ کۆنفرانسا میۆنخ یا ئاسایشێ ھاتبوون ڤەخواستن، د چارچۆڤەیێ کۆنفرانسێ دا، سەرۆک بارزانی د ماوێ دو رۆژان دا، 24 جڤینێن دپلۆماسی دگەل سەرۆک، سەرۆکوەزیر، وەزیرێن دەرڤە، وەزیرێن بەرەڤانی و شاندەیێن جودا جودا ھەبوون.

یەک ژ وان دیداران دگەل جۆزێف بایدن جێگرێ سەرۆکێ وی دەمی یێ ئەمریکایێ، کو نھا ئەو بوویە 46 مین سەرۆکێ ویلایەتێن یەکگرتیێن ئەمریکا، بوو.

شاندەیێ ب  جەنابێ سەرۆک بارزانی را بوو پێکھاتبوو ژ مستەفا سەید قادر، د. فوئاد حوسێن، ھێمن ھەورامی و فەلاح مستەفا.

دەمێ جەنابێ وی و شاندەیێ دگەل گەھشتین جھێ کۆمبوونێ، بایدن ب گەرم و گۆریەکا گەلەک دۆستانە ژ دوورڤە ھمبێزا خوە ژ بۆ جەنابێ سەرۆکی ڤەکر، سەرۆك بارزانی   سپاسیا بایدن کر.  بایدن ژی گوتێ سوپاسی ژ بۆ چ؟ دڤێت ئەم سپاسیەکا گەلەک مەزن ل تە بکەین.

دەمێ بایدن چوویە دەستێ کاک مستەفا سەید قادر گۆتێ ئەز بایدن م ھەڤال و دۆستێ باشێ سەرۆک بارزانی مە.

ل گۆر دەمێ ژ بۆ دیدارێ ھاتیە دانان، پێدڤی بوو کۆمبوون د نیڤ دەمژمێرێ دا ب داوی بھاتبا، لێ چر و پریا بابەتان و بھا و پێگەھێ مەزن و بەرچاڤێ جەنابێ سەرۆک بارزانی د ناڤ ھەڤکێشێن دەڤەرێ و سەرۆكاتیكرنا شەرێ تێکشکاندنا داعشێ و گەنگەشەکرنا بابەتێن گرێدایی وی دەمی و پاشەرۆژا دۆزا کوردی و چاڤەرێین کوردان ژ ئەمریکایێ و یێن ئەمریکا ژ کوردان ل گۆر سیاسەت، بەرژەواندی، دۆز و ئەولەویاتێن ھەردو ئالیان، کۆمبوونی   دەمژمێرەک و نیڤا ڤەکێشا.

 بەری بداویھاتنا ھەڤدیتنێ ب چەندەكێ، بایدن داخوازەک ژ جەنابێ سەرۆکی کر و ژێ را گۆت كو ئەگەر وەخت ھەبیت، نەڤیا وی دگەلە ، کچا کورێ وی ھانتەری یە، پێخۆشە ئەگەر وێنەیەکی دگەل جەنابێ سەرۆکی بگریت، چونکە بایدن پێشتر گۆتبوویێ دێ نۆکە چم، من کۆمبوونەک دگەل کەسەکی ھەیە نموونەیێن وەکی وی ل ھەمی دەڤەرێ دکێمن.

بایدن ڤەگێرا کۆ ژ بلی کۆ ئەو و جەنابێ سەرۆکی خودان دۆز و باوەریەکا کوورن ب مللەتێ خوە، دھەمان دەم دا خودان گۆتن و ئاخفتنا خوەنە و ھەردوو ژی ژ نەڤیێن خوە حەز دکەن.

ل وێرێ ل رەوشا کورێ وی کاک مەنسۆر بارزانی پرسی، کو بەری دەمەکی تووشی روودانەکا ھاتن و چوونێ ببوو، بایدن برێکا بالوێزخانێ ژی ژ بۆ پرسینا رەوشا تەندروستیا وی قەفتەکا گولا ژێرا ھنارتبوو.  بایدن داخواز ژ کەسەکی ژ ستافێ خۆ کر گازی نەڤیا وی بکە، دەما نەڤیا وی ھاتیە د ژورا کۆمبوونێ ڤە، بایدنی گۆت:

جەنابێ سەرۆک ئەڤە فێنیگنی یە کچا کورێ من ھانتەریە، ژیێ وێ 15 ساڵە و ئەم گەلەک ژ ھەڤدو حەز دکەین.

باین روو کرە نەڤیا خوە و ژێرا گۆت: ئەڤە ئەو سەرۆکە ئەوێ من بۆ تە بەحسێ وی کری و چەندین سالە مە د مەلەفێ عێراقێ و دەڤەرێ دا پەیوەندی ھەنە و میناکێن وی د دەڤەرێ دا دکێمن، چونکە سەرۆکەکە باوەریەکا کوور ب دۆزا گەلێ خوە ھەیە و خوەدان ئاخفتن و سۆزا خوە یە و کریار و ئاخفتنێن وی یەکن، تشتەک نەکریە نەگۆتبیت و نەگۆتیە نەکربیت.

تێبینی: ژ بۆ وێنەگرتنێ بتنێ وێنەگرەکێ کۆچکا سپی ل وێرێ بوو، لەوما من وەکۆ یەک ژ ئەندامێن شاندەیێ من ب ئایفۆنا خوە ئەو وێنە گرت (سەرۆك بارزانی، نەڤیا بایدن و بایدن).

ژ فێسبۆكا: ھێمن ھەورامی

وەرگێران بۆ سەر زاراڤایێ بادینی: ئیدريس ئیسماعيل تروانشى

Back to top button