چارەنڤیسێ وی گەنجێ پەكەكێ رەڤاندی نەدیارە

چەكدارێن پارتیا كاركەرێن كوردستانێ (پەكەكە) گەنجەكێ كورد ژ دەڤەرا بەرواری ژێری رەڤاندەیە ئەڤە زێدەتر ژ سێ مەھانە مالباتا وی تشتەكی ژێ نزانە.
ل گۆر وان زانیاریێن ژ دەڤەرێ گەھەشتینە مالپەرا مە، چەكدارێن سەر ب پەكەكێ ڤە بەری زێدەتر ژ سێ ھەیڤانە گەجەك ب ناڤێ جوتیار محسن حسێن، ژدایكبوویێ سالا 1991) ژ گوندێ سیارێ سەر ب ناحیا چەمانكێ ل ده‌ڤه‌را ئامێدیێ رەڤاندیە ھەتا نھا بێ پێژنە.

‌خەلكێ دەڤەرێ، مالبات و كەسوكارێن خورتێ ھاتیە رەڤاندن ل دژی ڤێ كریارا چەكدارێن پەكەكێ دەركەتن و ل پێشبەری ئاڤاھیا ناحیا چەمانكێ خوەپێشاندان كر و داخواز ژ بەرپرسێن ئیداری یێن حكومەتا ھەرێمێ كوردستانێ كر كو پەكەكێ نەچار بكن داکو چاره‌نڤیسا کورێ وان ئا‌شکه‌ره‌ بکە و ئازاد بكە.

د خوه‌پێشاندانێ دا داخویانیا ڕێخستنێن جڤاکا سڤیل و مه‌ده‌نی یێن ل ناڤچه‌یێ هاته‌ خوه‌ندن و تێدا نه‌رازیبوونا خوه‌ ل دژی رەڤاندنا گەنجان ژ ئالیێ چەكدارێن پەكەكێ ڤە ده‌ربرین و داخوازا ئازادکرنا وی گەنجێ خەلكێ گوندێ سیارێ، کرن.
دەیكا وی جوانێ ژ ئالیێ چەكدارێن پەكەكێ ڤە ھاتیە رەڤاندن ژ مەدیایێ را گۆت: “کورێ من هیچ تاوانه‌ک نه‌کریه‌ و پەکەکێ بێ ئەگەر ئەو ده‌ستگیر کریه و رەڤاندیە‌، ئه‌م داخوازێ ژێ دکین کورێ مه‌ ئازاد بکن و ڤه‌گه‌ریتە ناڤ مه.‌”

ئەڤە نە جارا یەكێ یە چەكدارێن پەكەكێ گەنجێن دەڤەرێ درەڤینێن و بێ پێژن دكن. خەلكێ دەڤەرێ ژ بەر وان كریارێن چەكدارێن پەكەكێ گەلەك نەرازینە و ئەگەر حكومەتا ھەرێما كوردستانێ ڤێ پرسێ دگەل پەكەكێ چارەسەر نەكە و تخووبەكی ژ پەكەكێ را نەدانە، مرۆڤ دترسە كو خەلكێ دەڤەرێ ب خوە تۆلا خوە ژ چەكدارێن پەكەكێ ڤەكە و رەوش ئالۆزتر ببە.

ل باكورێ كوردستانێ ژی چەكدارێن پەكەكێ گەنجان درەڤینن و وندا دكن، ھەموو ھەفتیان ب دەھان دەیك و بابێن وان گەنجان ل بەر ئاڤاھیا پارتیا ھەدەپێ كۆم دبن و داخواز ئاشكراكرنا چارەنڤیسێ زارۆكێن خوە دكن.

نێرین / شیرۆڤە