پەیاما سەرۆك نێچیرڤان بارزانی ب هەلكەفتا ڕۆژا :جیهانی یا ڕووبرووبوونا توندووتووژیا ل دژی ژنان
د ڕۆژا جیهانی یا ڕووبرووبوونا توندووتووژیا ل دژی ژنان دا، ئه‌م پێبابەندبوونا خوه یا نه‌گوهه‌ر ژ بۆ پاراستنا مافێن ژنان و ئاڤاکرنا جڤاکه‌ک کو ئازادی، وه‌کهه‌ڤی و ڕوومه‌تا مرۆڤی تێ دا سه‌روه‌ر به، دوباره دکن. ئه‌م دێ ل سەر هه‌ولدان و خه‌باتا خوه یا ژ بۆ ڕووبرووبوونا هه‌موو ئاوایێن توندووتووژی و جوداکاریا ل دژی ژنان، به‌رده‌وام بکن.
ب ڕێزداری ئه‌م بیرانینا هه‌موو ژنێن کو ژ به‌ر توندووتووژیێ ژیانا خوه ژ ده‌ست دانه، ببیر تینن و هه‌ڤخه‌مییا خوه یا کوور ن مالباتێن وان را پارڤە دكن. دلخوه‌شیا مالباتێن وان ته‌نێ ب پێکانینا دادوه‌ریێ و ڕێگرتنا ل دوباره‌بوونا ڤان تاوانان و ئاڤاکرنا ژینگه‌هه‌ک ئارام پێک تێ کو هه‌موو ژنان، د هه‌ر ڕه‌وش و پێگه‌هه‌ک دا بن، بپارێزه.
پاراستنا مافێن ژنان ژ بۆ مه هه‌موویان ستوونا سه‌ره‌کی یا ئاڤاکرنا جڤاکه‌که ئازاد، دادپه‌روه‌ر، پێشکه‌تی و ئارامه. ژ هۆلێ ڕاکرنا توندووتووژیا ل دژی ژنان پێویستی ب ئیراده‌یه‌که هه‌ڤبه‌ش، یاسایێن خورت و بجیهانینا وان، و هشمه‌ندیه‌ک جڤاکی هه‌یه کو ڕێزێ ل ژنان بگره و پشتگریێ بده به‌شداربوونا وان یا به‌رفره د ژیانا سیاسی، ئیداری و ئابۆری دا .
پاشه‌رۆژا کوردستانێ، ب خورتکرنا شیان و کارینێن ژنان و بهێزکرنا به‌شداربوونا وان یا چالاک د هه‌موو وارێن ژیانێ دا ڤه گرێدایی یه. ئه‌م دێ ب هه‌موو هێز و ئیسرارێ پابەند بن ب ڕووبرووبوونا توندووتووژیێ، ڕامانێن توندره‌و، پاراستنا ماف و ئازادیان و ئاڤاکرنا جڤاکه‌کێ کو تێ دا هه‌ر ژنه‌ک پاراستی، ئازاد و ب هێز به ژ بۆ پێکانینا خه‌ون و ئارمانجێن خوه.
ئه‌م دێ ب هه‌موو ده‌زگە و ئالییێن فه‌رمی یێن ل هه‌رێما کوردستانێ، جڤاکا سڤیل و که‌سایه‌تی و ڕێبه‌رێن ئۆلی و جڤاکی را به‌رده‌وام بن ژ بۆ بهێزکرنا پاراستنا قانوونی، به‌رفره‌هکرنا به‌رنامه‌یێن بهێزکرنا ئابۆری و پێشخستنا به‌شداربوونا ژنان د جهێن بریاردانێ دا و میسۆگه‌رکرنا ئاڤاکرنا ژینگه‌هه‌ک کار و جڤاکه‌ک کو ژ ده‌ستدرێژی، توندووتووژی و جوداکاریێ دوور به.
سلاڤ ل وان هه‌موو ژنان یێن کو ژ بۆ مافێن خوه تێدکۆشن، هه‌روها ژ چالاکڤان و کارمه‌ندێن د وارێ پاراستنا ژنان دا و ژ وان هه‌موو که‌سێن کو د بلندکرنا ئاستا هشمه‌ندیا جڤاکی و بجهانینا نرخێن وه‌کهه‌ڤیێ دا به‌شدارن. هه‌روها، ئه‌م ڕۆلا جوانان، سازی و ده‌زگه‌هێن ڕاگەهاندنێ، دبستان و زانینگه‌هان، د به‌لاڤکرنا چاندا دژی توندووتووژیێ و ڕێزگرتنا ل هه‌مبه‌ر هه‌ڤ دا، بلند دنرخینن.
ئه‌م هه‌موو ب هه‌ڤ را خه‌باتا خوه به‌رده‌وام بکن ژ بۆ جڤاکه‌که بێ توندووتووژی، بێ ترس و بێ جوداکاری.
نێچیرڤان بارزانی
سه‌رۆکێ هه‌رێما کوردستانێ
۲٥ێ مژدارێ ۲۰۲٥
