ڕێزدار نێچیرڤان بارزانی، سهرۆکێ ههرێما کوردستانێ، د پهیامهکێ دا ژ بۆ کۆنفهرانسا ناڤدهولهتی یا ئاشتی و جڤاکا دهمۆکراتیک کو، دهم پارتییێ ل ستهنبۆلێ ڕێک خستیه، ههموو پشتگریا ههرێما کوردستانێ ژ بۆ سهرخستنا ئاشتیێ ل ترکیێ دوپات کر.
پهیام ژ ئالیێ برێز دلشاد شههاب، نوونهرێ برێز سهرۆکێ ههرێما کوردستانێ ڤه هاته خوهندن.
ئهڤ ژی ناڤهرۆکا وێ یه:
ئامادهکارێن کۆنفهرانسێ یێن ڕێزدار
مێهڤان و بهشدارێن هێژا
ڕۆژ باش
گهلهک سپاسیا وه دکم ژ بۆ ڤهخوهندنا من بۆ ڤێ کۆنفهرانسێ.
دیتنا مه ل ههرێما کوردستانێ ژ بۆ ئاشتیێ، دیتنهکا نهگوههر و ستراتهژیکه. ئهم باوهر دکن کو ئاشتی تهنێ بێدهنگبوونا چهکان نینه، لێ بهلێ پێڤاژۆیهکه ژ بۆ ئاڤاکرنا باوهریێ، قهبوولکرنا ههڤدو و دیتنا خالێن ههڤبهش د ناڤبهرا جوداهیان دا.
توندی و پەبچوون، ژ بلی وێرانکاری و پاشدهماینێ، چو ئهنجامهک دن ژ بۆ گهلان نهبوویه. لێ ههر دهما کو دهریێ دیالۆگێ هاتیه ڤهکرن، ههر دهما کو ئیرادهیا سیاسی ژ بۆ ئاشتیێ ههبوویه، دهرفهتێن مهزن ژ بۆ گهشبوون و ئارامیێ دهرکهتنه پێش.
ترکیێ وهلاتهک گرنگ و جیرانا مه یا ستراتهژیکه. ئارامی و پێشکهفتنا ترکیێ، باندۆرهکا ڕاستهراست ل سهر ئارامیا ئیراقێ، ههرێما کوردستانێ و تهڤاهیا ناڤچهیێ دکه. ترکیهیا د ئاشتیێ دا، بهێزتره و دکاره ڕۆلهکا مهزنتر ل ناڤچهیێ بلیزه.
سالێن چوویی، مه ب ههموو ئاوایی پشتهڤانیا ئاشتیێ کر. وێ قۆناخێ نیشان دا کو دیالۆگ دکاره دهستکهفتێن مهزن ژ بۆ ههموو ئالیان بینه. ئیرۆ ژی، ئهم ههموو پشتهڤانیا خوه ژ بۆ سهرخستنا ئاشتیێ نیشان ددن. ههرێما کوردستانێ ل ناڤچهیێ وهکی ههر تم دێ فاکتۆرا ئارامیێ به.
پێڤاژۆیهک وها گرنگ د قۆناخهکا وها ههستیار دا، دبه کو ڕاستی ئاستهنگیان وهره، لێ بهلێ دڤێ ئهو ئاستهنگی نهبن سهدهما ساربوونا ژ ئاشتیێ. سهرکهفتنا ئاشتیێ بێهنفرههیێ دخوازه. چ قاس دهم پێویست به، دڤێ کو بهردهوامی ههبه.
ل ڤر دخوازم دهستخوهشیێ ل جهنابێ سهرۆک ڕهجهب تەیب ئهردۆگان بکم ژ بۆ ڕۆلا گرنگ و دیتنا وی یا وێرهکانه یا ژ بۆ ڤهبوونا وی یا ل ههمبهر ئاشتیێ. ئهڤ گاڤهکا دیرۆکی یه کو ئیرادهیهکا سیاسی یا بهێز، وێرهکی، مێرخاسی، قوربانیدان و جانێ بهرپرسیاریێ دخوازه.
ههروها ئهم دهستخوهشیێ ل برێز ئۆجەلان، برێز دهڤلهت باخچهلی و ههموو وان کهسایهتی و ئالیان دکن کو خهمخورێ ئاشتیێ نه و کار دکن ژ بۆ کو ئاشتی و پێکڤهژیان سهرکهڤه. ههموو ئهوێن کو دزانن پاشهرۆژ تهنێ ل سهر بنگهها ئاشتی و ئارامیێ تێ ئاڤاکرن.
داویێ، هێڤیا سهرکهفتنێ ژ بۆ کۆنفهرانسا وه دخوازم.
گهلهک سپاس.
نێچیرڤان بارزانی
سهرۆکێ ههرێما کوردستانێ
٦\١٢\٢٠٢٥
