دهمهکه ل سهر پێڤاژۆیا کو ب ئینسیاتیفا دهولهتێ دهستپێکری گۆتوبێژ تێنه کرن. هندهک بەحسێ خهتماندنا پێڤاژۆیێ دکن و ئالیێن دهولهتێ ژی ب ئیسرار بەحسێ بهردهوامیا پێڤاژۆیێ دکن . پرسا بنگههین ل ڤێ دهرێ ڕاستێگەهشتن و نرخاندنا ڤێ پێڤاژۆیێ یه.
بهری ههر تشتهکی کی چ ناڤی ل ڤێ پێڤاژۆیێ بکه بلا بکه، لێ ئهڤ پێڤاژۆیا ب گۆتارهکا باخچهلی وهک پێڤاژۆیا دهولهتێ ب ناڤێ ”پێڤاژۆیا ترکیهیا بێ تهرۆره” دهستپێکریه و د سهری دا ئەبدولا ئۆجەلان و پەکەکە ئهڤ یهک قهبوول کریه. دهما ئۆجەلان بهرسڤا پێشنیارا باخچهلی دایی ، ئهوی ژی گهلهک ب زهلالی بەحسێ خالهکێ کریه و پرسا کورد نهئانییه ڕۆژهڤه و تهنێ گۆتیه ئارمانجا مه ”ئهنتهگراسیۆنا دهمۆکراتیک” ه. ڤێجا ئهڤ یهک تێ چ واتهیێ ؟ ههرکهسهک ل گۆرا خوه دنرخینه.
ب باوهریا من ئهڤ تێ واتهیا ”حهلاندنا دهمۆکراتیک” یانی ئۆجەلان و پەکەکە ڤهکری ئاشکهره کرنه کو، پرسا وان نه پرسا کورده. ژ خوه ئهم ڤێ یهکێ د ههمان دهمێ دا ل ڕۆژاڤایێ کوردستانێ ژی دبینن.
نوونەرێن دهم پارتییێ د کۆمسیۆنا کو د پارلهمهنتۆیێ دا هاتی ئاڤاکرن دا هەنە و داخوازیێن خوه نڤیسکی دانه کۆمسیۆنێ، لێ جاردن پرسا کورد د ڕاپۆرتا وان دا نە هاتیە بەحس کرن. کورتاهی ئهڤه کو، پەکەکە/دهم پارتی و ههموو دامودهزگههێن پەکەکێ پێڤاژۆیا ” ترکیه یا بێ تهرۆر” قهبوول کریه.
یانی ئهڤ پێڤاژۆ نه پێڤاژۆیا ئاشتییێ یان ژی یا چارهسهریا پرسگرێکا کورده. ههروهها نه پێڤاژۆیهکه کو، موخاتابێن دهولهتێ ملهتێ کورد به. پەکەکە و ئۆجەلان ژی نوونهرتیا ههموو کوردان ناکن.
دهولهت ژ بۆ پرسگرێکا پەکەکێ چارهسهر بکه ئهڤ پێڤاژۆ دایه دهستپێکرن. ڕایادارێن دهولهتێ ڤهکری دبێژن کو، ئهم دخوازن ”تهرۆر” نهمینه و ژ بۆ ڤێ یهکێژی دڤێ پەکەکە ژ هۆلێ ڕابه و دەست ژ چهکان بهرده. ئارمانجا دهولهتێ گهلهک ڤهکری و زهلاله. ئۆجەلان ژی گهلهک ڤهکری ئهڤ یهک ئهرێنی دیتیه و ب هەماهەنگی دگەل دهزگههێن دهولهتێ ڤێ یهکێ ڕێڤهدبن.
پەکەکێ کۆنگرهیهک ل دار خست و خوه هلوەشاند. سهمبۆلیک ژی بە، ب رێورەسمەکێ چهکێن خوه شهوتاندن و پهیاما کو ژ دەست ژ چهکان بهردن ڕاگەهاند.
لێ د ناڤا چهکدارێن پەکەکێ دا هندهکا ڕۆژانه پهیامێن جودا دان، د ناڤ دهم پارتیێ دا هندهک دبێژن : پەکەکێ یا سهر ملێ خوه کر، نها دۆرا دهولهتێ یه. ئهڤ ب ڤان بهیانان تهنێ خوه دپارێزن و ههول ددن دهردۆرا خوه ب ئاوایهکی قانع بکن کو د پێڤاژۆیێ دا خوهدی گۆتنن.
پەکەکە/دهم پارتی بەحسێ ئازادییا ئۆجەلان دکن. ژ خوه کهسایهتا د سهرێ ڤێ پرسێ دا دهڤلهت باخچهلی بهێلن ”ئازادیا ئۆجالان” بەحسێ دایینا ئهرکهک دن دکه و دبێژه، بلا ستاتوویهکا ئۆجەلان ههبه و پێشنیار ژی زهلاله” ئهرکا ئۆجەلان بلا ببه کۆئاردیناتۆرێ پێڤاژۆیێ”
ژ ئالیهک دن ڤه د ڕاستیا خوه دا پرسا ”ئازادییا ئۆجەلان” ب تهنێ ژ ئالیێ پەکەکە/ دهم پارتیێ ڤه وهک پرۆپاگاندهیهک ڤالا تێ ب کارانین. ئۆجەلان ئازاده یان نا؟ ئهڤ ژی پرسهک دنه کو بابهتێ گۆتوبێژێ یه.
خالا بنگههین ئهوه کو، پرسا کورد ل ترکیێ و باکورێ کوردستانێ و پرسگرێکا پەکەکێ ژ ههڤ جودانه. چارهسهریا پرسا کورد نه د ڕۆژهڤێ دا یه. ژ خوه سهرۆککۆمارێ ترکیێ ڤهکری دبێژه : ” پرسا کورد نهمایه و مه چارهسهر کریه. ”
یا نها ژ پرسا کورد جودا، پرسگرێکا پەکەکێ یه کو ب تهمامی دەست ژ چەکان بهردە.
دهولهت هێژا قانع نەبوویە کو، چهکدارێن پەکەکێ ب تهمامی چهکێن خوه دانینه. ژ بهر کو چهکدانین یانی ب تهمامی بێچهککرنا چهکدارێن پەکەکێ دبن چاڤدێریا دهزگههێ ئستخبارا ترکیێ دا ڕێڤه دچه. لێ هێژی وان ڕاپۆرتا کو پەکەکێ ب تهمامی چاکان بهردانه و خوه بێچهککریه نهدایە حکومهتێ.
گوههرتنێن دهستووری د پارلهمهنتۆیێ دا وهرن کرن، تهنێ ژ بۆ ڤهگهرا چهکدارێن پککێ بۆ ترکیێ و ژ بۆ چارهنووسا ڤان چهکدارانه. تشتهک دن نینە.
گهلهک ئالیێن د ناڤا پەکەکێ/دهم پارتیێ دا زوو ب زوو دەست ژ بهرژهوهندیێن خوه بهرنادن، ههتا بکاربن یان دێ ل هەمبهر ئۆجەلان بهرخوه بدن، یان ژی ژ بۆ پێڤاژۆ ئالۆز ببه گهلهک داخوازی و تشتێن دن بدن پێش. ڕاستی چو نرخێ گۆتنا وان ژی نینە. لێ ئهو ژی ب ئاوایهکی پهیاما ددن و خوه د ڕۆژهڤێ دا دهێلن. بریار یا دهولهتێ یە و وهک باخچهلی گۆتی”کۆئاردیناتۆرێ پێڤاژۆیێ” ئۆجالانه.
ها مژارهک دن ههیه دڤێ مرۆڤ بهحس بکه. سهرکهتنا ڤێ پێڤاژۆیێ ژ بۆ کوردا گهلهک باشه. ژێ بهردانا چهکان و خوههلوەشاندنا پەکەکێ ژی ژ بۆ تهڤگهرا ئازادیخوازا کوردستانی گهلهکی باشه و پرانیا ئالیێن سیاسی ئهڤ گاڤ ئهرێنی نرخاندن پشتگریا ڤێ ژی کرن.
بێ گومان خلاسکرنا شهرهک بێ واته ژ بۆ جڤاتا کورد ژی گهلهک ئهرێنیه. کێماسی دێ شانسهک ههبە کو، ئهو تێکدانێن سیاسهتا دهولهتێ و پەکەکێ ب دههێن سالان د ناڤا جڤاتا کورد دا پهیدا کرین دێ ب ئاوایهکی بێنه پینهکرن بهلکی ئهڤ یهک جاردن جڤاتا کورد بینه سهر هیمێن خوه.
دبێژن ڕاستی تهحله، مخابن ئیرۆ د ڤێ قۆناغێ دا ڕهوشا تهڤگهرا باکورێ کوردستانێ نه باشه. لێ دخوهیێ ب تێگهاندنا ڕاستیهکی دێ ببه سهدهمهک بنگههین کو ههستێن نهتهوی د ناڤا کوردان دا و تایبهتی د ناڤا جوانان دا ب هێزتر ببه. ب ڤێ هێڤیێ گهرهک خهبات بهردهوامبن…
