دەولەتا ئیتالیایێ ئەڤڕۆ ٨\٧\٢٠٢٦ێ د مەڕەسمەکا تایبەت دا ل باژارێ هەولێرێ، بلندترین ئاستێ ڕێزلێنان و قەدرگرتنا فەرمی یا وەلاتێ خوە پێشکەشی سەرۆکێ هەرێما کوردستانێ نێچیرڤان بارزانی کر.
بالیۆزێ ئیتالیایێ یێ ل عیراقێ “نیکۆلۆ فۆنتانا” دێ د مەڕەسمێ دا ل سەر ناڤێ سەرۆککۆمارێ ئیتالیایێ “سێرگیۆ ماتارێلا”، “مەدالیایا ستێرا ئیتالیایێ” پێشکەشی نێچیرڤان بارزانی بکە.
ئەڤ مەدالیایە بلندترین ئاستێ مەدالیایێن ئیتالیایێ یە کۆ پێشکەشی وان کەستیێن هێشتا د ژیانێ دا مانە دکە.
دیرۆکا خەلاتێ
دیرۆکا ڤێ خەلاتێ ڤەدگەرە بۆ سالا 1947ێ. وێ دەمێ ناڤێ وێ “نیشانا ستێرا هەڤخەمییا ئیتالیایێ” بوو و پتر بۆ ڕێزلێنانێ ل وان کەسان دهاتە دان یێن کو پشتی شەڕێ جیهانی یێ دوویێ د ئاڤاکرنا وەلاتی دا ڕۆلەکێ مەزن ددیت.
لێ بەلێ ل سالا 2011ێ، ل سەر دەستێ سەرۆککۆمارێ 11ێ یێ ئیتالیایێ “گیۆرگیۆ ناپۆلیتانۆ” یاسا هاتە سەراستکرن و ناڤ و ئارمانجا خەلاتێ هاتە گوهۆڕین.
ئیدی ئارمانجا خەلاتێ ژ “ئاڤادانکرنێ” دەرکەت و بوو “پێشڤەبرنا پەیوەندیێن دۆستانە و هەڤکارییا ناڤدەولەتی.”
ئەڤ ڕێزلێنانە نوکە ل گورەی فەرمانەکا سەرۆکایەتییێ دهێتە دان.
پرۆسەسا دیارکرنا وەرگرێن ڤێ مەدالیایێ گەلەک یا هوورە. ل دەستپێکێ وەزیرێ کارێن دەرڤە یێ ئیتالیایێ چەند ناڤان پێشنیار دکەت. پشتی هینگی کۆمیتەکا تایبەت (جوری) کو ژ 5 کەسان پێکدهێت و ئێک ژ وان بەرپرسێ پڕۆتۆکۆلا دێپلۆماتی یا سەرۆکایەتییێ یە، ناڤێ کەسێن هەژی بۆ سەرۆککۆماری دهنێریت.
ئەڤ خەلاتە نە بتنێ بۆ بیاڤێ سیاسی یە. د بیاڤێن زانست، تەکنەلۆجیا، چالاکیێن مرۆڤایەتی، بازرگانی، ڕەوشەنبیری و هونەری دا ژی ددەنە وان کەسێن کو د خورتکرنا پەیوەندیان دا دگەل ئیتالیایێ خودان ڕۆلەکێ دیار بن.
نێچیرڤان بارزانی و ئیتالیا: 25 سالێن دێپڵۆماسییا بەردەوام و ب باندۆر
پەیوەندیێن نێچیرڤان بارزانی و ئیتالیایێ نیشانا هەڤپشکەکا ستراتیژی یا کوورە. د ناڤ دو دەهکێن بۆری دا ئەڤ پەیوەندییە گەلەک پێشڤەکەفتن.
چەند کۆمبوونێن گرنگ یێن نێچیرڤان بارزانی د ڤێ پڕۆسێسێ دا وەکو خالێن وەرچەرخانێ دهێنە دیتن:
- سالا 2015ێ: نێچیرڤان بارزانی و سەرۆکوەزیرێ وێ دەمێ یێ ئیتالیایێ “ماتیۆ ڕێنزی” کۆمبوون. د ئەنجام دا بڕیار هاتە دان کو نڤیسینگەها دێپڵۆماتی یا ئیتالیایێ ل هەولێرێ ببیتە کۆنسولخانەیا گشتی.
- رۆژا ١٣ێ نیسانا 2023ێ: نێچیرڤان بارزانی و سەرۆکوەزیرا ئیتالیایێ “جۆرجیا مێلۆنی” ل ڕۆما کۆمبوون. مێلۆنیێ بەردەوامییا پشتەڤانیێ بۆ هەرێما کوردستانێ دیار کر و ئارامی و ئەولەهییا کوردستانێ وەکو فاکتەرەکێ سەرەکی یێ پاراستنا ئاشتیێ ل ڕۆژهەلاتا ناوڕاست بناڤ کر
- گولانا 2026ێ: نێچیرڤان بارزانی بۆ سەرەدانەکا فەرمی چوو ئیتالیایێ. ل 18ێ گۆلانێ دگەل وەزیرێ بەرگریێ یێ ئیتالیایێ “گویدۆ کرۆسێتو” کۆمبوو. ل 19ێ گۆلانێ ژی ژ لایێ سەرۆککۆمار “سێرگیۆ ماتارێلا” ڤە ب مەڕەسمەکا فەرمی هاتە پێشوازیکرن. هەر وەسا دگەل وەزیرێ کارێن دەرڤە “ئەنتۆنیۆ تاجانی” ژی کۆمبوو و د وان کۆمبوونان دا ئیتالیایێ پشتەڤانییا خوە بۆ هەرێما کوردستانێ دوپات کرەڤە
