گاڤه‌ک ئه‌رێنی ژ بۆ یه‌کرێزیا ل ڕۆژاڤایێ کوردستانێ
ڕێڤه‌به‌ریا خوه‌سه‌ر یا ڕۆژاڤایێ کوردستانێ ڕاگەهاند کو ب ئارمانجا یه‌کتیا سیاسی یا کورد هه‌موو ئاسته‌نگیێن یاسایی ل پێشیا ئه‌نجومه‌نا نشتیمانی یا کورد ل سووریێ (ئه‌نەکەسە) هاتنه ڕاکرن و نها چ ئاسته‌نگی نه‌مانه کو ئوفیسێن خوه ڤه‌کن و بێیی شه‌رتێن پێشین کارێ خوه به‌رده‌وام بکه.
ڕێڤه‌به‌ریا خوه‌سه‌ر دا زانین ژی، ئه‌ڤ گاڤێن هاتنه ئاڤێتن، ژ بۆ وێ یه‌کێ نه، تا باوه‌ری د ناڤبه‌را هه‌موو ڕێخستنێن سیاسی و ئیداری بێ ئاڤاکرن.
هه‌روها ده‌سته‌یا هوندرین یا ڕێڤه‌به‌ریا خوه‌سه‌ر هه‌موو گلیێن ل پێش دادگه‌هان ل دژی که‌سایه‌تی و سه‌رکرده‌یێن ئه‌نەکەسێ یێن ل ده‌رڤه‌یی ڕۆژاڤایێ کوردستانێ نه هاتنه ڤه‌کرن پووچ کرنه و ڕاگەهاند، ئه‌و دکارن ڤه‌گه‌رن، بێیی کو چ ئاسته‌نگیه‌ک هه‌به.
ده‌ربارێ دۆسیا گرتیێن سیاسی و که‌سێن هاتنه ونداکرن، ده‌سته‌یا هوندرین یا ڕێڤه‌به‌ریا خوه‌سه‌ر ڕاگەهاند، ئه‌نەکەسە لیسته‌یه‌ک ب ۱۰ ناڤان ڕۆژا ۱٥ێ ڤێ مه‌هێ ڕاده‌ستی هەسەدێ کر، ده‌سته‌یا هوندرین یا ڕێڤه‌به‌ریا خوه‌سه‌ر ژی د ڤێ ده‌ربارێ ده کۆمیته‌ک بۆ شۆپاندن و لێکۆلینێ پێک ئانیه و دێ هه‌موو ئه‌نجامان ب ئه‌نەکەسێ ڕه پارڤه بکن. ئه‌ڤ داخویانیا ده‌سته‌یا هوندرین یا باکور و ڕۆژهلاتێ سووریێ د ده‌مه‌کێ یه، دوهی فه‌رماندارێ گشتی یێ هەسەدێ مه‌زلووم عه‌بدی ڕاگەهاندبوو، خه‌باتێن وان یێن ئاڤاکرنا یه‌کرێزیا کوردی ل ڕۆژاڤایێ کوردستانێ د ئاتمۆسفه‌ره‌که ئه‌رێنی ده ددۆمن
