ھەدەپە یەكێتیا نەتەوەیی بەرھاڤێتی دكە
ل باکورێ کوردستانێ د ڤان ده‌مێن داوی دا ژ بۆ ئاڤاكرنا یه‌کێتیه‌کا نەتەوەیی د ناڤا ته‌ڤگه‌را ئازادخوازا کورد دا، گه‌له‌ک چالاکی و جڤین چێدبن و سمینارو ھەڤدیتن دھێنە كرن.
لێ هه‌تا نها د ڤێ یەكێ دا سەرنەكەتنە و یه‌کێتیه‌ک ب سه‌رووبه‌ر پێکنه‌هاتیه. بێ گومان گه‌له‌ک ئەگەر هه‌نه کو هه‌تا وه‌ک ڤێ گاڤێ چ یه‌کێتێ چێنه‌بوونه و یێن ب ناڤێ یه‌کێتیێ ب ئاوایه‌کی چێبوویین ژی د ده‌مه‌ک کن دا تێکچوونه.
باشه ئەگەرێن بنگه‌هین یێن ڤێ یه‌کێ چیه؟ که‌سه‌ک ل سه‌ر دەسنیشانكرنا ئەگەران سه‌رێ خوه نائێشینه. ژ به‌ری هه‌ر تشته‌کی هەدەپە/پەکەکە ڕێیا هه‌موو جوره‌یێن یه‌کێتیا ل به‌ر کوردان خه‌تماندیه. ده‌ما ژ بۆ وان پێوستبه به‌هسا یه‌کێتیێ دکن و ڕایا گشتی و هنده‌ک ئالیێن سیاسی دخاپینن. ده‌ما ژ بۆ وان نه پێوستبه ژی دێبێژن کو “ ژ خوه وان یه‌کێتیانەتەوەیی پێکئانینه“ و وه‌ک میناک ژی كۆنگرەیا نەتەوەیی یا كوردستانێ (کەنەکە) و كۆما جڤاكێن دەمۆكراتیك (کەجەدە) دو تشتێن به‌ربچاڤن. ژ ئالیه‌ک دن دێبێژن هەدەپە پارتیا گه‌لانه و وان د ناڤه‌رۆکا هەدەپێ دا یه‌کێتیا گه‌لان ئاڤاکریه.
لێ گه‌لۆ ماده‌م وه یه‌کێتیەك نەتەوەیی ئاڤاکریه، ده‌م ب ده‌م ئه‌ڤ که‌فتوله‌فتا وه ژ بۆ چیه؟ ژ خوه هەدەپێ هنده‌ک ئالیێن کورد به‌رتیل کرنه و ئانینه د بن سێوانا خوه دا. لێ هه‌ول ددن ڕێ ل به‌ر پێكئانینا یه‌کیتیێن دن ژی بگرن. ژ به‌ر کو ترسا وان یا هه‌ری مه‌زن ئاڤاکرنا یه‌کتیه‌کێ یە ل سه‌ر بنگەھا خه‌تا نه‌توەیی یه.
دڤێت ب زەلالی بھێتە ئاكەرا كرن کو یەكێتیا نەتەوەیی ب هێزێن نه‌ته‌وەیی و ئاکتۆرێن نه‌ته‌وەیی دھێتە ئاڤاکرن. لێ مخابن مرۆڤ دبینه کو هێزێن کو خوه نه‌ته‌وەیی نابینن و ل دژی خەتا نه‌تەوەیی کار دکن، به‌هسا یه‌کێتیا نه‌ته‌وەیی دکن. ئه‌ڤ ب خوه ژی دده نیشاندان کو چقاس ژ جدییه‌تێ دوورن.
به‌ری چه‌ند ڕۆژان ل دیاربه‌کرێ جڤینه‌ک ژ بۆ ئاڤاكرنا یه‌کێتیه‌ک نه‌ته‌وەیی ژ ئالیێ پاک و پەسەكێ ڤه هاته ل دارخستن. سیاسه‌تمه‌دار و ڕه‌وشه‌نبیر ته‌ڤلی ڤێ جڤینێ بوون و د ده‌ربارێ یه‌کێتیه‌ک نه‌ته‌وەیی دا دیتنێن خوه گۆتن و پێشنیار کرن. به‌رپرسێن هاک پارێ ژی وه‌ک چاڤدێر ته‌ڤلی جڤینێ بوون.
هێڤی ئه‌وه کو هاک پار ژی د پاشه‌رۆژێ دا ب ئەکتیف ببه ئالیه‌ک یێ ڤان جڤینا . هه‌روه‌ها دڤێ هوداپار ژی ژ بۆ ڤێ یه‌کێ بێته نرخاندن و ته‌ڤلیبوونا وان ژی ب ئاوایه‌کی د ڕۆژه‌ڤێ دا به.
ئه‌ڤ جڤین گه‌له‌ک گرنگه. ژ به‌ر کو ئه‌ڤ جارا یه‌که‌مه کو فاکتۆرێن نه‌ته‌وەیی بنگه‌ھ تێنه گرتن و جڤینه‌ک چێدبه. ناڤه‌رۆکا جڤینێ ل سه‌ر ۳ بابه‌تێن گرنگ بوو.
1- ئارمانجا تفاقا نه‌ته‌وه‌یی
2- شکلێ تفاقا نه‌ته‌وه‌یی
3- ژ بۆ پێکانینا تفاقا نه‌ته‌وه‌یی نه‌خشه‌رێیه‌که چاوا و ھتد….
به‌لکی ئه‌ڤ گاڤ گاڤه‌ک بچووک بە ژی، لێ گاڤه‌ک گرنگ و خوه‌دی واته‌یه‌کێ یە. ئه‌گه‌ر ئه‌ڤ چالاکی ب بریار و ب ئارامی به‌رده‌وام بكن، دێ پاشه‌رۆژه‌ک باش ژ بۆیه‌کێتیا کوردا پێکبینه .
2020/12/15
ن. فرات
