یه‌که‌مین هونه‌رمه‌ندێ ڕۆک موزیکا کوردی
یه‌که‌مین هونه‌رمه‌ندێ ڕۆک موزیکا کوردی و دامه‌زرێنه‌رێ کۆما وه‌تەن که‌ره‌مێ گه‌رده‌نزه‌ری کو ل مۆسکۆیا پایته‌ختا ڕوسیایێ دژی، د هه‌ڤپه‌یڤینه‌کا تایبه‌ت دا ڕاگەهاند، كو حه‌زکرنا وه‌لات و زمانێ کوردی ل مال و مالباتێ دا تێ پاراستن.
گه‌رده‌نزه‌ری د ده‌ربارێ کۆچبه‌ریا مالباتا خوه دا دبێژه كو ئه‌و د دەما قرکرنا سالێن ۱۹۱٥ ێ دا ل گه‌ل ئه‌رمه‌نیان و ئێزیدی ژی ژ باژارێ قه‌رسێ، باكورێ كوردستانێ، کۆچبه‌ری ڕوسیایێ هاتنه کرن. پشتی شۆره‌شا سۆڤیه‌تێ ژی، ده‌وله‌تا سۆڤیه‌تێ ده‌ست دانیه سه‌ر هه‌موو مال و مولکێن وان و ئه‌و کۆچبه‌ری سیبیریایێ کرنه.
د ده‌ربارێ زمان و حه‌زکرنا وه‌لات دا، که‌ره‌مێ گه‌رده‌نزه‌ری دا زانین کو ل گه‌ل وان هه‌موو ئێش و زه‌حمه‌تیان ژی باب و کالێن وان، ئه‌و فێری چاندا کوردی کرنه و ئه‌و فێرکرنه کو ل ده‌رڤه‌یێ مالێ ب چ زمانه‌ک بپه‌یڤن ژی، لێ ده‌ما هاتنا ناڤا مالێ دا، دڤێ ب ته‌نێ زمانێ کوردی بپه‌یڤن. هه‌روها ل ناڤا مالێ دا ژی ئه‌و فێری حه‌زکرنا وه‌لات و کولتور و چاندا کوردی کرنه.
هه‌روها که‌ره‌مێ گه‌رده‌نزه‌ری دبێژە: حه‌زکرنا وه‌لات ل ناڤا مال و مالباتێ دا ده‌ستپێدکه. مخابن ل باکوورێ کوردستانێ نیڤێ کوردێن مه زێده‌تر کوردی نزانن و یێن دزانن ژی کوردیه‌کا شاش و کێم دزانن. پێشی دڤێ ل ناڤا مالباتێ دا، خوه‌دی ل زمانێ خوه ده‌رکه‌ڤن، ل ده‌رڤه‌یێ مالێ چ زمانه‌ک بێ ئاخافتن ژی باندۆرێ ل سه‌ر زمانێ کوردی و چاندا کوردی ناکه.
