ئه‌م ژ باشوورێ کوردستانێ چ دخوازن
مه هندەك کوردێن باکور ده‌ست ژ ئازادی و سه‌رخوه‌بوونا باکورێ کوردستانێ بەردایە. یان ژی ئەم بێهێز که‌تنه کو نها نکارن ب ئه‌رک و رۆلا خوه رابن. ژ به‌ر ڤێ یه‌کێ یه کو هه‌می پارتی ئان ژی رێخستن لاواز و بچووک بوونه. لۆما ژی ل باکورێ کوردستانێ روحیه‌تا کورده‌واری هه‌ما هه‌ما مری یه و ژ به‌ر ڤێ یەكێ ئێدی هندەك بووئه ره‌خنه‌گرێن باشوورێ کوردستانێ.
هندەك ب ڤێ هه‌لوه‌ستا خوه بارێ باشوورێ کوردستانێ گران دكن، کارێن وان یێن ژ بۆنا کوردستانه‌کا سه‌ربخوه زەحمەتر دكن و ب هه‌لوه‌ستێن نه راست وان گونه‌هبار دکن.
نها پرانیا کوردێن باکورێ کوردستانێ که‌تنه ره‌وشه‌ک و پسیکۆلۆژیک وه‌ها کو هه‌ما سه‌رێ وان ژی بێشه، ئه‌و ده‌ڤ داڤێژن باشوورێ کوردستانێ بێی کو باشی و خه‌رابیان بفکرن.
هندەك ژ وان فێم ناکن کو باشوورێ کوردستان ئێدی ده‌وله‌ته. نه پارتی و رێخستنه. ده‌ما تو ده‌وله‌ت بی، نۆرمێن ده‌وله‌تبوونه ژی هه‌نه و ئه‌و نۆرم د قادا ناڤنه‌ته‌وه‌یی دا ژی رۆلا خوه دلیزه. له‌ورا تو نکار‌ی ل دژ ڤان نۆرمان ته‌ڤبگه‌ری. ب دلێ وه به، نه دلێ وه به دڤێ هوون قه‌بوول بکن.
ئەگەرا كو هندەك ڤێ دکن ئه‌وه کو پرانیا کوردێن باکور هێشتا ژی خوه ژ کاروبارێ پارتتیێ و رێخستنیێ ئازاد نه‌کرنه. ژ به‌ر ڤێ هندەك جانک و جامێر هه‌ر تشته‌کی ل گۆر ڤێ دنرخینن. ئه‌و هه‌ر تشته‌کی ل گۆر ڤێ شرۆڤه دکن. له‌ورا ژی هندەك جارا فێم ناکن کو ژ مفای پتر ئه‌و ب ڤان هه‌لوه‌ستێن خوه زیانێ ددن باشوورێ کوردستانێ.
پرانیا کوردێن باکورێ کوردستانێ ده‌ڤ ژ کار و سیاسه‌تا خوه به‌ردایه و بوونه ره‌خنه‌گرێن باشوور ئان په‌سندارێن وان. ل گۆر من ئه‌ڤ هه‌ردو ژی شاشه. لێ یا گرینگ ئه‌وه کو دڤێ کوردێن باکورێ کوردستانێ ل خوه ڤه‌گه‌رن و کارێ خوه یێ سیاسی ل جھو وارێ خوه بکه. هه‌ڤکاری و ته‌ڤکاریا خوه پێک بینن.
کوردێن کوردستانیخواز هه‌می دزانن کو باشوورێ کوردستانێ به‌رب ده‌وله‌تبوونێ ڤه گاڤ ب گاڤ دمه‌شه و نها نێزیکی وێ ئارمانجا خوه ژی بوویه. دڤێ ئێدی بھێتە زانبن کو وێرێ ده‌وله‌ته. ره‌خنه و په‌سندایییێن خوه ژی دڤێ ل گۆر ڤێ بکن.
ئه‌م نکارن ژ بۆنا نڤیسا من نه‌هاتیه وه‌شاندن، دنیایێ ل سه‌ر سه‌رێ باشوورێ کوردستانێ خه‌راب بکن. ژ بۆنا ئه‌ز ده‌رنه‌خستمه تیڤی ب هه‌لوه‌ستێن خه‌راب ل دژ وان راوه‌ستم، ئه‌ڤ نابه. ل گۆر من ئه‌و کارێ خوه دکن. کارێن دکن ژی ژ بۆنا کوردستانه‌کا سه‌ربخوه یه. ئه‌ڤ ژی د مفایێ هه‌می کوردان دا یه.
دڤێ ئه‌م وه‌که کوردێن باکورێ کوردستانێ پیچەكێ ل خوه ڤه‌گه‌رن. ئەم بھێن بینن و بزانین ئه‌م نها ل کو نه و ره‌وشا باکورێ کوردستانێ که‌تیه چ حالی. پرانیا پارتیێن مه ل باکورێ کوردستانێ هه‌ما هه‌ما وه‌که هه‌ڤ دفکرن لێ نکارن ب هه‌ڤره ئه‌نیه‌کێ، ته‌ڤگه‌ره‌ک هه‌ڤبه‌ش دامه‌زرینن. ما گه‌لۆ ئه‌ڤ ژی نه گونه‌هکاریه‌که.
ژ به‌ر به‌لاڤبوونا پارتی و رێخستنێن باکورێ کوردستانێ، رێیه‌کا نه‌ته‌وه‌یی ناھێت دیتن. ژ به‌ر کو هه‌ر رێخستن خوه ژ یێن دن باشتر و ته‌کووزتر دبینە. ڤێ هه‌لوه‌ستا وان یا شاش وه‌لاتێ مه وێران كریە، که‌سێن مه په‌ریشان کرنه. ده‌ما تو وان ره‌خنه ژی دکی، دبێن ئاگر و زه‌ڤیێن دشه‌وتینن…
دۆزا وه‌لاته‌کی ب رێیا پارتی و رێخستنان دمه‌شه و ل گۆر ده‌ستوور و به‌رنامەیێن وان ژی ئازادیێ تینن. ره‌وشه‌نبیر، ریسپی کادرێن سالمه‌زن ژی دڤێ ببن شێورمه‌ندێن ڤی گه‌لی، ببن رێنشاندانا ڤی گه‌لی. لێ مه ئه‌ڤ به‌ردایه هه‌به چ نه‌به باشوور. هه‌لا جاره‌کێ وان ئانگۆ باشوورێ کوردستانێ سه‌ربه‌ست به‌ردن، ره‌حه‌ت بهێلن، كا دێ چ کن. ئه‌م ناهێلن ئه‌و ژی کارێ خوه بکن.
ب سه‌رخوه‌بوونا باشوورێ کوردستانێ ئه‌م هه‌می کورد دێ گەھینە ئازادیا خوه. دێ ئه‌م هه‌می کورد ببن خوه‌دی ده‌وله‌تا خوه، دێ ئه‌م هه‌می کورد د ڤێ جیهانێ دا ب سه‌ربلندی بژین. ژ بۆنا ئه‌م بگەھین ڤێ قۆناغێ ژی دڤێ ئه‌م ب ئارامی ل مه‌سه‌له‌یێن باشوورێ کوردستانێ بنێرین.
بنێرن و ببنینن کو باشوورێ كوردستانێ ئێدی ده‌وله‌ته. هه‌گه‌ر ئه‌م وێ وه‌که ده‌وله‌ت نه‌بینن، وێ گاڤێ هه‌می ره‌خنه‌یێن مه د جھێ خوە دانە. لێ وێرێ ژ بۆنا کوردان ده‌وله‌ته. کار و خه‌بات تێ کرن کو ڤێ ده‌وله‌تێ د قادا ناڤده‌وله‌تێ دا ژی بدن قه‌بوولکرنێ
بووبێ ئه‌سه‌ر
2020.05.23
