لەزگین چالی: دڤێ پارتی ل دووڤ بچە كا كێ دیكلێ وێ دزیە

گەلەك مەسەلەیێ مەزن نەكن و خوە ژی خشیم نەكن. گومان تێدا نینە كۆ نەیارێن پارتیێ دەست د ھاندانا خەلكێ دھۆكێ دا ھەبوویە. ھەگەر وان نەیاران دەست د وان ھاندانان دا نەبووبە، دێ ل ئاقلێ وان و سیاسەتا وان ب گومان بكەڤم. لێ ئەڤ وێ راستیێ ڤەناشێرە كو شاشیێن ستراتەژیك یێن پارتیێ و گەندەلی یا كوور و بەرفرەھـ یا بەرپرسێن وێ و پشتگوھڤەھاڤێتنا پارێزگەھا دھۆكێ، خەلكێ دھۆكێ ژ پارتیێ نەرازی كریە. دژمنێن پارتیێ دزانن چاوا خوێیێ ل برینێن خەلكی برێژن.

د ھلبژارتنێن سالا 1992ێ دا، نێزیكی 70 ژ سەدێ ژ خەلكێ سلێمانیێ دەنگێ خوە دان ئێكەتیا نشتیمانی. ھەر وێ دەمێ نێزیكی 90 ژ سەدێ ژ خەلكێ دھۆكێ دەنگێ خوە دان پارتیا دەمۆكراتا كوردستانێ. لێ د ھلبژارتنێن ھەری داوین دا، خەلكێ سلێمانیێ نیشا دا كۆ ھەر دگەل حزبا خوە مانە، ژبەر كۆ دیسا ئێكەتیا نشتیمانی و گۆررانێ پێكڤە دیسا نێزیكی 70 ژ سەدێ ژ دەنگان ئینان. لێ دھۆكیان دەست ژ “حزبا خوە” بەردایە و د ھلبژارتنێن ھەری داوین دا پارتیێ ب تەنێ نێزیكی 70 ژ سەدێ ژ دەنگێن دھۆكیان ستاندن.

پارتی و ئالیگرێن پارتی دڤێ بزانن كۆ ئێكەتی و گۆرران چەند خیانەتێ ژی بكن، بلا بكن، ئالیگرێن وان ھەردو حزبان دێ ھەر ئالیگرێن وان بمینن؛ لێ خەلكێ ئالیگرێ پارتیێ ژ پارتیێ دلمایی مانە. سەدەم چ دبن بلا ببن، نیشانێن وێ نە كۆ ئان خەلكێ دھۆكێ گەلەك بێزار بوویە، ئان پرۆپاگەندەیا دژمنێن پارتیێ گەلەك كارگەرە و كارا یە، ئان سیاسەتێن پارتیێ ژبۆ راگرتنا خەلكێ خوە لەوازترە، ئان خەلكێ سلێمانیێ ژ خەلكێ دھۆكێ “عەشیرەتیتر” و “دەڤەرپەرێسترن”، ئان ژی حزبێن سلێمانیێ د رازیكرنا خەلكێ خوە دا سەركەڤتیترن. ئان ژی ئەڤ سەدەم ھەمی ژی ھەنە. ئەنجام چ بت، دڤێ پارتی ل دووڤ بچە كا كی دیكلێ وێ دزیە، خەم ناكە ھەگەر ئەڤرۆ ھەسپێ وێ ژی ھاتبە دزین.
(لێكۆلینێن جڤاكناسی ژبۆ ڤێ پەدیتار ئانكۆ دیارۆكێ پێدڤی نە).

ژ فێسبۆكا
د. لەزگین چالی