ئێدی کەس باوەر ژ سلۆگانێن بێ رامان ناکە

گەلو ما بەرێز موراد کارایلان نزانە ئێدی کەس باوەر ژ سلۆگانێن بێ رامان ناکە؟ باشە هەوە ب وێ سیاسەتا خوە یا شاش یا شەرێ خەندەکان 30 ملیون کورد ل باکورێ کوردستانێ و سەرانسەری تورکیا ژ خوە تۆرەکرن و ئەو خەلکێ ب سالان قوربانیێن بێ هەمبەر داین ب ئێك جاری وە دلێ وان ژ خوە رەشکر.

 کورد ل باکور د ئارمانج و سیاسەتا هەوە گەهەشتن لەوما ژی مە دیت ژ بۆ داگیرکارنا عەفرینێ، گرێسپی و سەرێکانیێ  دەنگ ژ باکور نەهات، هەلبەت ئەز قەت باوەرناکەم کو ل باکورێ کوردستانێ کوردایەتی نەما بە، لێ  شەرێ خەندەکا مالا وان وێران کر و دلێ وان ژ هەر تشتی رەش کر.

 ل سەر هێرشێن دەولەتا داگیرکەر بەرێز کارایلان دیسا داخویانی دان و داخواز ژ گەلێ باشوور کر پشتەڤانیا گەریلا بکەن. لێ وی ئەو یەك نە دا زانین کو 34 سالە خەلکێ باشوور ب هەر ئاوایەکی پشتەڤانیا پەکەکێ دکە، لێ ل بەرامبەر دلسوزیا خەلکێ باشوور پەکەکە روژ ب روژ دەرفەتێن ژیانێ ل خەلکێ باشوور تەنگ دکە، دەستێوەردانان دکە، هەولا دامەزراندنا کانتونان ل ناڤا گوندەوارێن باشوور ددە و ژ هەمیانژی کەمباختر پەکەکێ بارەگایێن خوە د ناڤا گوندان دا داناینە و بویە مەترسیەکا روژانە ل سەر ژیانا وەلاتیێن باشوور.

 گەلو کیژان سیستەما شورەشگێری وەها دکە؟ د هەمان داخویانی دا کارایلان بەحسا سیخۆران کر و داخواز ژ گەلێ باشوور کر کو رێ نەدن سیخوران. هەلبەت ژ بو هەر کەسەکی کو هایداری سیاسەت و بوویەران نەبە رەنگە وەسان د گوتنا موراد کارایلان بگەهە کو خەلکێ باشوور د بەرژەوەندیا داگیرکەرێن ترك دا دسیخۆریێ ب سەر گەریلا دکە.

 لێ راستیەك هەیە دڤێت خەلکێ مە باش بزانە کو کەسەك نکارە نێزیکی بنگەهێن پەکەکێ ببە، ئەگەر ژ بۆ دەمەکی جهێ باوەریا وان نەبە ئەڤە ژ لایەکیڤە، ژ لایەک دیڤە دەزگەهێن ئستیخباراتا دەولەتا ترك ب خوە ب سەدان ئەندام یێن د ناڤا گەریلا دا چاندین و مفای ژێ وەردگرە، لەوا ئەز دکارم بێژم كو  دەولەتا ترك رەنگە چ منەتەك وەسا گرنگ ب سیخۆران نەبە یان ژی ئەگەر چەندەك هەبن ژی بێگومانە کو د بەرژەوەندیا دو لایەنیدا کار دکەن و دێ هەر روژکێ ژ ناڤچن…

 ل ڤێرێ دێ پسیارەکێ ژ خاندەڤانان کەم و بلا ب وژدانانە بەرسڤ بهێتە دان:.

 1-  مە گەلەك جاران بهیستیە کو جهێن گرنگ یێن وەك مەخزەن و دەپویێن ڤەشارتنا کەلوپەلێن خارنێ و چەك و تەقەمەنیا ژ لایێ بالەفرێن شەری یێن دەولەتا داگیرکەر ڤە هاتینە ژ ناڤ برن، گەلو پسیار ل ڤێرێ ئەڤەیە؛ ما ئەگەر ئەوێن ئەو کەلوپەل ڤەشارتین ئەگەر نە بەرگومان بن کی دێ وان جهان و دەپویان ل چیایێن کەردستانێ زانیت.

  2- گەلەك جارا پەکەکێ ماین/ئەلغام دانانینە لێ لەشکەرێن ترك ب جھێ وان زانیە و  ژناڤبرنە، ئەرێ کی وان جهان نیشا دەولەتێ ددە ئەگەر بەرگومان د ناڤا گەریلا ب خوەدا نەبن؟