د چاڤەرێبوونا تە دا
دیاری بۆ خانمێن هەموو شەهیدێن شوڕشا گولانێ
د چاڤەرێ بوونا تە دا
سال و مەهـ دەرباز بوون
نە پێژنەکا تە
نە سیتاڤکەکا تە
نە سلاڤەکا تە
نە ژی نامەیەکا تە،
یا وەکی نڤشتا مەلای پێچای
نیڤ شەڤەکێ ب دزیڤە نەگەهشتە من
مال خرابۆ
ما ئەڤە چ ئەڤین بوو
چ ژیان بوو
خەونەکا بەرهاڤێتی بوو
هێشتا من نەخشەیا دێمێ تە
مەیاڤێن چاڤێن تە
من ژ بەر نەکربوون
تۆ چ زوو چووی
ئو ب ئێکجاری ل من ووندابووی
ئەز ل سەر دارێ لاندکا خێڤەیێ ئەڤینا من و تە،
هشک و پووتی بووم
تە گەلەک جارا دگۆت:
ئەم جارنا لگەل هەیڤێ دهەلێین
ئو ل بەژنا چیا ژێهەل تێین
گەلەک جارا ژی
دناڤ پێلێن شەڤرەشێن تاری دا
دکەڤینە باسک و مەلەڤانیا
ئو بهەڤرا سروودا هەرنەپێش دبێین
ئێ ئەڤە دەهجارکی
ئەز ل سەرێ کۆپێ چیایێ مەتینا
دگەل هەیڤێ دهەلێم
ئو ل سەرکێن ئاسۆسێ لگەل وێ ئاڤا دبم
جارەکێ تنێ
بەژنەکا بلند و ل هەڤهاتی
ل بەر چاڤێن من
کەفتە بەر سیتافکا تاڤە هەیڤێ
لێ پشتی ئەز نێزیک بوویم
من دیت کو ئەو ژی نە بەژنا تە بوو
لێ بەژنا وێ سیپندارێ بوو
یا تە ل رۆژا ئێکێ
یا ئەڤینا من و خوە چاندی
شەڤڕەشا ژی
هەتا ستێرا کاروانکوژا ل من دهەلێت
ل بەر پەنجەرێ دناڤ پێلێن تاریێ دا
ئەزا ل رۆناهیا دێم و چاڤێن تە دگەرم
لێ دەما ل قیرینا بانگێ دیکلا هشیار دبم
ئەزا ل سەر دارێ لاندکا پزۆکێ مە
شۆڕ بوویمە خوار
هۆۆۆۆ ووندایێ من!
هزر و خیال و کۆڤانا سەرێ منێ کریە
کونزڤیرکەکا پڕ بڕاڤێژ
ئەز نزانم
گەلۆ نوها
ل بەر رەڤەزەکێ ئاگرێ تە یێ هەلکریە
چادانکێ رەشێ دناڤ پەلا دا ئاوازا بۆ تە دبێژیت
ئو جگارا تە یا دباسکی را
دناڤبەرا هەردوو تبلێن تە یێن شمشادی ڕا
پاشای ب کتا سمبێلا خوە حساب ناکەی!
یان ژی گەلۆ
ل سەر چیمەنتۆیێ بنێ ئودا زیندانەکێ
ب هەردوو دەستێن کەلەبچەڤە
تۆ بوویە قورمکەکێ بچووک
دناڤ خوینا خوە دگەڤزی
خەونا ب بەژنا من و چیای ڤە دبینی!
یان ژی دبیت
ل ناڤ سێگۆشا مرنێ(1)
جهێ کێرا سایکس ـ پیکۆ
خاچ ل سەر سینگێ مە کێشای
کەفتیە بەر شێلکا گوللەیێن
رەشەکێن شەڤێ
دیجلە و خابیر
تۆ دناڤ پێلێن ئاڤ و خوینی دا راپێچای
لگەل خۆ بڕی!
ئەز نزانم
ئەز نزانم
ئەڤە و هزار و خیالێن دی
سەرێ منێ کریە هێلینا قەشقەلانکێ
لێ بزانە
وەک رۆژا ئێکەمین ژڤانێ ئەڤینا مە
چاڤەرێی هاتنا تەمە
ئەز دلسۆز و وەفادارا
وێ سۆز و پەیمانا خوە مە
چاڤ ل رێمە
ل هیڤیا تە مە
ل هیڤیا تە مە
( 1) سێگۆشا مرنێ. سێگۆشا سنوورێن باکوور ـ باشوور و رۆژاڤایێ کوردستانێ. گەلەک پێشمەرگە ل وێ سێگۆشێ کەفتنە بۆسێن ترکا و ئیراقێ و شەهید بوونە.
