ئارمانجکرنا شەخسیەتا مەسعود بارزانی د خوەپێشاندانان دا خەتەرە
پەیەدە ل هه‌مبه‌ری گه‌لێ مه یێ ڕۆژاڤایێ کوردستانێ، وه‌ک وه‌کیلێ ڕژێما بەعس، ژ رژێمێ خرابتر زۆرداری و په‌رچقاندنا مافێن مرۆڤی و نه‌ته‌وه‌یی بەردەوام دكە. ب ڕژێما بەعس را ل ڕۆژاڤایێ کوردستانێ دیکتاتۆریه‌که خراب ئاڤا کریه. پەیەدە رێ ناده کو ل ڕۆژاڤایێ کوردستانێ پارتیێن کوردستانی کار و خه‌باتێن خوه یێن سیاسی و ڕێخستنی ئەنجام بدن. کوردپه‌روه‌ران دگره و زیندانی دکه و ئێشکه‌نجه دکه و دکووژه. ئه‌ڤ یەك ژ بۆنا کوردان و ب تایەتی ژ بۆنا ڕۆژاڤایێ کوردستانێ وه‌ک پرسگرێکه‌ک مه‌زن د ڕۆژه‌ڤێ دا یه.
وه‌ک تێ زانین پەیەدە، د هه‌مان ده‌م دا، ل دژی ده‌وله‌تا فه‌ده‌رال یا باشوورێ کوردستانێ و پەدەکێ و سه‌رۆکێ کوردستانێ مه‌سعوود بارزانی و بارزانیان زماندرێژیێ و دژمناتیێ دکه. هه‌ر ده‌م ژی ژ وان ڕا دھێتە گۆتن کو مافێ وه نینە کو هوون ژ ده‌وله‌تا فه‌ده‌رال یا کوردستانێ و پەدەكێ و سه‌رۆکێ کوردستانێ و بارزانیان ڕا دژمناتیێ بکن. ئه‌ڤ یه‌کە د زایانا وە دایە. هوون ب ڤێ هه‌لوه‌ستا خوه، د هه‌مان ده‌م دا، دێ زیانێ بدن ڕۆژاڤایێ کوردستانێ ژی.
لێ پەیەدە دەست ژ هه‌لوه‌ستا خوه به‌رنا‌دە. ئه‌و هه‌لوه‌ستا خوه دژوارتر دكە. پەیەدە، د ڤان ڕۆژێن داوی دا ل هه‌مبه‌ری ده‌وله‌تا فه‌ده‌رال یا کوردستانێ و پەدەكێ و سه‌رۆکێ کوردستانێ خوه‌پێشاندانان دكە. د وان خوه‌پێشاندانان دا درووشمێن گه‌له‌ک خراب بلند دكن. پەدەكێ و سه‌رۆکێ کوردستانێ و بارزانیان ته‌هدید دكن و حه‌قارەت و بێئەدەبیێ ل وان دكن. ئالا کوردستانێ وێنه‌یێن سه‌رۆکێ کوردستانێ مه‌سعوود بارزانی و سه‌مبۆلێن پەدەکێ دشه‌وتینن.
گرنگترین مژارا دن ژی ئه‌وه کو پەیەدە گه‌له‌ک ئاشکه‌ره ب وێنه‌یێ ئۆجەلان و ب سه‌مبۆلێن پەكەكێ خوه‌پێشاندان دكە.
گه‌لۆ ئه‌و خوه‌پێشاندن تێنه چ واته‌یێ؟ ئه‌ز دخوازن ل سه‌ر ڤێ یه‌کێ جاره‌ک دن ڕاوه‌ستم و ڤێ پرسێ به‌رسڤ بدم. د ده‌ربارێ ڤێ مژارێ دا من د ڕادیۆیایا ڕێبازا نیۆز و د ته‌له‌ڤزیۆنا ئارکێ دا ژی دیتنێن خوە گۆتنە.
1- ڤان خوه‌پێشاندانێن پەیەدێ جاره‌کا دن ده‌رخست هۆلێ کو هه‌لوه‌ستا پەیەدێ ل هه‌مبه‌ری ده‌وله‌تا فه‌ده‌رال یا کوردستانێ و پەدەكێ و بارزانیان ب ھەر ھەمان ھەلوەستا پەكەكێ یە. ئه‌ڤ یه‌ک ژ ئالیێ هه‌موو کوردان ڤە باش تێ زانین.
گه‌له‌ک ئاشکه‌ره یه کو پەكەكە دخوازه کو ده‌وله‌تا فه‌ده‌رال یا کوردستانێ ژ هۆلێ ڕاکه. پەیەدە ژی ڤێ یه‌کێ دخوازه. لۆما ژی ئه‌ڤ هه‌لوه‌ستە ئیراده‌یا گه‌لێ مه ل ڕۆژاڤایێ کوردستانێ ته‌مسیل ناکه. ئه‌ڤ هه‌لوه‌ستە، هه‌لوه‌سته‌کا بیانی یه. سه‌رۆکانیا ڤێ هه‌لوه‌ستێ چه‌وا کو د پەكەكێ دا شوورا ده‌وله‌تێن کۆلۆنیالیسته پەكەكە پرۆژه‌یا ده‌وله‌تا کۆلۆنیالیست یا ترکه. ژ بۆنا به‌رژه‌وه‌ندیا هه‌موو ده‌وله‌تێن کۆلۆنیالیست ل دژی مافێن کوردان تاشه‌رۆنیێ دکه. پەیەدە ژی هه‌مان هه‌لوه‌ستێ بەردەوام دكە. ئه‌ڤ هه‌لوه‌ست چه‌وا دبه هه‌لوه‌سته‌ک کوردی و کوردستانی.
2- د خوه‌پێشاندانان دا وێنه‌یێ ئۆجەلان بلند کرن و سه‌مبۆلێن پەكەكێ ب کار ئانین، گه‌له‌ک ئاشکه‌ره دەردكەڤە ھۆلێ کو فه‌رقا پەكەكێ و پەیەدێ نینە. تێ وێ واته‌یێ کو پەیەدە، ڕێخستنا پەكەكێ یه. ئه‌م هه‌موو کورد ژی ڤێ یه‌کێ دزانن. لێ پەیەدە ژ ئه‌مریکا و هه‌ڤپه‌یمانێن ئه‌مریکایێ ڕه دیار دکه کو ئه‌و نه پەكەكە نه. ژ بەر کو پەكەكە ژ ئالیێ ئه‌مریکایێ ڤه ژی وه‌ک ڕێخستنه‌کا ته‌رۆریست تێ ناس کرن. ده‌ما کو ئه‌مریکا بپه‌ژرینه کو پەیەدە ڕێخستنا پەكەكێ یه، وێ ده‌مێ مه‌جبووره کو تێكەلیێن خوه ب پەیەدێ را قووت بکه. ژ ئالیێ دن ڤه ژی ئه‌مریکا ھەڤالبەندا دەولەتا تركیێ یه. ئه‌مریکا وێ ده‌مێ نکاره خوه ل هه‌مبه‌ری ناتۆیێ و ده‌وله‌تا ترک بپارێزه. هه‌ر چقاس ئه‌مریکا ژی دزانه کو پەیەدە ڕێخستنا پەكەكێ یه، لێ ژ بۆنا به‌رژه‌وه‌ندیا خوه ڤه‌دشێره. لێ ده‌ما کو پەیەدە ب وێنه‌یێ ئۆجەلان و ب سه‌مبۆلێن پەكەكێ خوه‌پێشاندانان بکه، ئێدی ئه‌مریکا دێ چه‌وا ڕاستیێ ڤه‌شێرە؟
به‌رپرسێ پەكەكێ، جه‌میل بایک، ژی گه‌له‌ک ئاشکه‌ره دیار کربوو کو “پەیەدە ڕێخستنا پەكەكێ یه. که‌س ژی نکاره پێشیا ڤێ یه‌کێ بگره”. ئه‌ڤ هه‌لوه‌ست ل هه‌مبه‌ری ئه‌مه‌ریکا وەك راگەھاندنا شەری بوو. لێ ئه‌مریکایێ ژ بۆنا به‌رژه‌وه‌ندیا خوه ده‌نگ ده‌رنه‌خست. د مەدیایێ دا ژی ئه‌ڤ مژار هاتبوو شرۆڤه کرن.
لێ ئه‌مریکایێ پشتی ڤان داخویانیان د تێكەلێن خوە دا گرانیا خوە دا ھێزێن دەمۆكراتیك ل سوریێ. دگەل ھەرێما کوردستانێ تێكەلیێن خوه خوورتتر کرن. ل هه‌مبه‌ری کارێن پەكەكێ یێن ل ھەرێما کوردستانێ هه‌لوه‌ستا خوە ڤه‌کری نیشان دا.
3- تێ زانین کو پەیەدە د ده‌مێ به‌رێ دا ژی گه‌له‌ک ئاشکه‌ره ب وێنەیێن ئۆجەلان و سه‌مبۆلێن پەكەكێ د خوه‌پێشاندانان دا ل هه‌مبه‌ری ده‌وله‌تا ترك ب کار ئانین. ئه‌ڤ ژ بۆنا ده‌وله‌تا ترک ل هه‌مبه‌ری ئه‌مریکایێ بوو به‌لگه‌یه‌ک گه‌له‌ک گرنگ. ئه‌مریکا ل هه‌مبه‌ری ده‌وله‌تا ترک که‌ت ناڤ ته‌نگاسیه‌کێ دا. ل ئه‌مه‌ریکایێ ژی گه‌له‌ک ده‌زگه‌هێن ئەمریكایی د مژارا پەیەدێ دا ده‌ستهلاتداریا خوه ڕه‌خنه کرن.
4- هه‌لوه‌ستا پەیەدێ پرۆڤۆکاسیۆنه‌ک/ئیستیفزازەك مه‌زنه، ژ ده‌وله‌تا ترک ڕا دبێژه کو “ئه‌ز ڕێخستنا پەكەكێ مه. ئه‌ز ڕێخستنه‌کا ڕۆژاڤایێ کوردستانێ نینم. ئه‌ز ژ بۆنا کو ڕێخستنا پەكەكێ مه، ئه‌ز دژمنا وه مه. ئه‌ز ژی ل دژی وه شه‌ر دکم. فه‌رمۆ که‌ره‌م بکن هوون ژی چ دکن، ئه‌م ئاماده‌نە”
ئه‌ڤ هه‌لوه‌ستا پەیەدێ د ده‌ما بووری دا بوو ئەگەر کو عه‌فرین، سه‌رێکانیێ، گرێ سپی و گه‌له‌ک ده‌ڤه‌رێن دن یێن کوردان ژ ئالیێ ده‌وله‌تا ترک ڤه بێن داگیر کرن.
ده‌وله‌تا ترک ھپشتا ژ ھەلوەستا خوە یا داگیركرنا ھەموو رۆژاڤایێ كوردستانێ دەستبەرنەدایە. پەیەدە ژی ب ھەلوەستێن خوە ژ ده‌وله‌تا ترک ڕا دبێژه کو وه‌ره ل هه‌موو ده‌ڤه‌رێن ڕۆژاڤایێ کوردستانێ ده‌ستوه‌ردانێ بکه و ڕۆژاڤایێ کوردستانێ داگیر بکه.
هه‌تا كەنگی دێ خرابیا پەكەكێ/پەیەدێ ب ڤی ئاوایی بەردەوام بە. ئه‌و کوردێن د ناڤ پەیەدێ دا نه و کوردێن ڕۆژاڤایێ کوردستانێ نه، دڤێ پیچه‌ک شعورا خوه یا کوردی ده‌رخن پێش. ل دژی سیاسه‌تا پەیەدێ ده‌رکه‌ڤن.
5- ئه‌ڤ هه‌لوه‌ستا پەیەدێ ل هه‌مبه‌ری ڕۆژاڤایا کوردستانێ و گه‌لێ کورد پرۆڤۆکاسیۆنه‌کا مه‌زنه ژی. پەكەكە/پەیەدە ب ڤێ هه‌لوه‌ستا خوه دخوازه کو د ناڤ کوردێن ڕۆژاڤایێ کوردستانێ دا و هه‌موو کوردان دا شه‌ر ده‌رکه‌ڤه. له‌ورا هه‌لوه‌ستا پەیەدێ یا دژمناتی ل هه‌مبه‌ری باشوورێ کوردستانێ و سه‌رۆکێ کوردستانێ و پەدەكێ و بارزانیان، هه‌مان ده‌م ل هه‌مبه‌ری هه‌موو کوردانه.
هه‌موو کوردێن هه‌ر چوار پارچەیێن کوردستانێ، کوردستانی، هه‌موو کوردێن دنیایێ حكومەتا ھەرێما كوردستانێ ژ بۆنا خوه وه‌ک هێلین و مالا خوه دبینن. باش دزانن کو د پاراستن و ل سه‌ر پیا سه‌کناندنا حكومەتا کوردستانێ دا ڕۆلا سه‌رۆکێ کوردستانێ برێز مه‌سعوود بارزانی، پەدەكە، بارزانیان گه‌له‌ک مه‌زنه. زیانگەھاندن ب وان، زیانگەھاندنە ب هه‌موو کوردان.
6- پەكەكە/پەیەدە ب نووچه‌یێن ده‌ره‌و و شەرفرۆش دخوازه کو د ناڤ کوردان دا شه‌ر ده‌رکه‌ڤه. له‌ورا د ڤان ڕۆژێن داوی دا ده‌روه‌کا مه‌زن کر و گۆت کو پێشمه‌رگەیان 7 گەریلا کوشتنه. پەدەكێ گه‌له‌ک ڤه‌کری ئه‌ڤ نووچەیە ده‌ره‌و ده‌رخست. لێ پەكەكێ ژ بۆنا دناڤ کوردان دا شه‌ر ده‌رکه‌ڤه پرۆڤۆکاسیۆنا خوه بەردەوام دكە. ب تایبه‌تی ژی شەخسیه‌تا سه‌رۆکێ کوردستانێ مه‌سعوود بارزانی د خوه‌پێشاندانان دا دكە ئارمانج، ئەڤە ژی گه‌له‌ک خه‌ته‌ره. ژ بۆنا کو د ناڤ کوردان دا شه‌ر ده‌رکه‌ڤه پەكەك ڤێ تەڤگەرێ دمەشینە.
دیاربه‌کر
2021.09.10
