عەبدولا ئۆجەلان گۆت…
دڤێ کورد ژ بیر نه‌کن کو هه‌ر تشته‌ک ل سه‌ر کۆکا خوه شین دبه. لۆما ژی د هه‌می جهانێ دا ژ بۆنا ڤێ یه‌کێ هه‌ولدانێن مه‌زن و خه‌باتێن به‌رفره دهێنە کرن کو کۆک و ئەسل ناهێتە ژ بیر کرن.
لێ وه‌کی گه‌له‌ک تشتێن دن یێن کوردان، ب ده‌ستێ هندەک کوردان ئه‌ڤ ژی تێک برن. کۆک مۆک نه‌ما تێ بیرا وان. ژ به‌ر کو جڤاتا کو نها ئه‌م تێ دا دژین کۆکا خوه ناس ناکه. ژ به‌ر ڤێ یه‌کێ یه نکاره ب ئاوایه‌کی راست و دلسۆزانه کارێ ژ بۆنا ئازادیا گه‌لێ خوه بکن.
ده‌ما تو کۆکا خوه ئه‌سل و فه‌سلێ خوه نزانی، تو ژی دێ وه‌کی مارێ چووڤ ب سه‌ری بکه‌فتی گێژ تەڤبگەری. ئه‌م چقاس گازندان بکن، ئه‌م چقاسی بنڤیسینن و بێژن ژی، جڤاتا کوردان یا باکورێ کوردستانێ یا کو پشتی ۱۹۸۰ هاتینه دنایایێ و مه‌زن بوونه، پرانیا وان ژ هه‌می هێژایییێن کوردان بێ بەهرن.
بێبەهریا وان ب ئاوایه‌کی زانیستی پێک هات کو ل باکورێ کوردستانێ ته‌ڤگه‌را ئازادیخواز و سه‌ربخواز بکوژن، بته‌مرینن، بێ ده‌نگێ بکن. ژ بۆنا تشتێن نه‌ته‌وه‌یی نه‌هێلن ئانگۆ بهێلینن چ لازم بوو ئه‌و کرن. له‌ورا ژی نها ب گه‌له‌مپه‌ری جوانێن کورد ل باکورێ کوردستانێ جانێ خوه ژ بۆنا ده‌مۆکراسییا داگیرکه‌ران ددن.
ژ به‌ر کو که‌سێن د کامپێن پەکەکێ دا جوانێن کورد په‌روه‌رده دکرن، که‌مالیست ب خوه بوون. لۆما پرانیا گه‌ریڵایێن پەکەکێ ب ئاقلێ که‌مالیزمێ هاتن په‌روه‌رده‌کرن کو ئه‌و دکارن جانێ خوه د به‌ر کۆمارا ترکیێ را بدن.
مه‌سه‌لا شەرێ خه‌نده‌کان خاله‌ک ژ ڤێ یه، لێ مخابن که‌ساتی و پارتیێن مه زێده ل سه‌ر ڤێ نه‌سه‌کنین و ناسه‌کنن. نکارن بێژن گه‌لۆ ۸۰۰۰ خۆرتێن کوردان د به‌ر چ دا جانێ خوه دان؟
هەر وەلاتپارێزەک دزنا کو ئەڤ شەرێ خەندەکان پرۆژەیا پەکەکێ و دەولەتا ترکیێ بوو و ئه‌ڤ ب هاریکاریا هه‌ر چار ده‌وله‌تێن داگیرکەر یێن کوردان بوو کو ژ بۆنا وان سیناریۆیه‌ک نڤیسین. لێ ئێ کو ئه‌ڤ پرۆژه ب ده‌ستێ کوردان خسته ژیانێ داگیرکه‌رێن ترکان بوو. وان ژ بۆنا ڤێ پرۆژه‌یێ بێ قه‌ید و شه‌رت په‌ره مه‌سره‌ف کرن.
لێ رۆلا داگیرکه‌رێن دن ژی نه کێمی ترکان بوون. وان ژی هەم ب په‌ره هەم ژی ب ئالیکاریا پەکەکێ دا کو مه‌سه‌له کوردان د ناڤا خوه دا ب ده‌ستێ کوردان حەل بکن، بکوژن و نه‌هێلن. جاره‌کێ بێئالی ره‌وشا رۆژاڤایێ کوردستانی بینن بە چاڤێن خوه و ببینن کا ل وێرێ چ ئانین سه‌رێ کوردان و چاوا وێرێ وێران کرن. ل وێرێ ژی د به‌ر عه‌ره‌بان دا گه‌له‌ک خۆرتێن کوردان بێ ئایده و فێده هاتن کوشتن.
هه‌گه‌ر ئه‌م ب ئاوایه‌کی بێئالی ل مه‌سه‌لێ بنێرن، ئه‌م دێ بینن کو پەکەکێ د هه‌رچار پارچەیێن کوردستانێ دا ژ بۆنا کورد ب سه‌رنه‌که‌ڤن چ ژ وان هات کر. پرۆژه ئه‌و بوو کو کوردان د ناڤا هه‌ر چار ده‌وله‌تێن داگیرکه‌ران ده بحەلینن.
لێ د حه‌ساب و ده‌فته‌رێن داگیرکه‌ران دا کو دێ باشوورێ کوردستانێ ئازاد ببه نه بوو. ئان ژی نه د وێ زانه‌بوونێ دا بوون.
پشتی ئازادیا باشوورێ کوردستنێ کوردان ئێدی باوه‌ری ب وێ یه‌کێ ئانین کو وێ رۆژه‌کێ ببن خوه‌دی ده‌وله‌تا خوه ژی. ژ به‌ر ڤێ دڤێ کورد باشوورێ کوردستانێ وه‌که، چاڤێن خوه، دلێ خوه و وه‌که هه‌موو هه‌بوونا خوه بپارێزن. ژ به‌ر کو تێکچوونا وێرێ، تێکچوونا هه‌موو کوردانه.
لێ وێ ئازادیا باشوورێ کوردستانێ هه‌رچار داگیرکه‌رێن مه ژ نوو ڤە هار کرن کو ئێدی بێ سه‌ر و به‌ر ب ئاوایه‌کی ڤه‌کری و ئاشکه‌ره پەکەکە خستن ده‌ورێ.
ژ به‌ر ڤێ بوو یەکێ کو ئازادیا باشوورێ کوردستانێ ژ بۆنا پەکەکێ ژی بوو ده‌رد و ئێش. له‌وارا پەکەکێ ئازادیا باشوورێ کوردستانێ وەکی لێدان خەنجەرکێ ب پشتا عه‌ره‌بان ددیت و ب ئالیکاریا داگیرکه‌ران خوه‌ستن وێ هه‌بوونێ، وێ ئازادیێ، وێ چرایا ژ بۆنا کوردان شه‌ڤره‌ش رۆنی کربوو، بته‌مرینن و نەهێلن. شه‌ره‌کێ مه‌زن ل هه‌مبه‌ر وێ ئازادیێ کرن، لێ وه‌ندا کرن…
پەکەکێ و داگیرکه‌ران زانین کو ب ڤێ رێیێ ب سه‌ر ناکه‌ڤن، تاکتیکا خوە گوهه‌رین و ده‌ست ئاڤێتن خه‌باتێن دن دا کو رۆژه‌کێ هه‌بوونا کوردان ژ هۆلێ راکن.
مه‌سه‌له درێژه، لێ ئه‌ز دێ پچەکێ کن بنڤیسینم دا کو هندەک راستی بێنه زانین. ئه‌ڤ پرۆژه‌یا داگیرکه‌ران هه‌تا رۆژا ۱٦ مه‌ها جۆتمه‌ها ۲۰۱۷ئان ئاژۆت و د ڤێ رۆژێ دا ئه‌و پرۆژه‌یا هه‌ر چار داگیرکه‌ران کو ب سالان ئاماده کربوون ب ده‌ستێ هندەک کوردان خه‌نجه‌را ژەهری ل پشتا کوردان و ب تایبه‌تی ل یا بارزانیان دان. پەکەکە ب خوه ژی د ناڤا ڤێ پرۆژه‌یێ دا هه‌بوو.
پەکەکە ژ رۆژا دامه‌زراندنا خوه ئانگۆ ژ رۆژا کو ژ ته‌ره‌ف داگیرکه‌ران ڤە هاتیه دامه‌زرانن و هه‌تا نها ئه‌و هه‌ر ل دژی هه‌می هێژاییێن کوردان کار دکه. ژ بۆنا کورد د پارچه‌یه‌کا کوردستانێ ب سه‌ر نه‌که‌ڤه چ ژێ هاتیه و تێ، کری یه و دکە
چ ده‌ما ل باکورێ کوردستانێ ته‌ڤگه‌ره‌کا نه‌ته‌وه‌یی ده‌ستب خه‌باتێ کربه، سه‌دی سه‌د پەکەکە که‌تیه ناڤ و ئه‌و تێک بریه یا ژی وه‌که خوه لێ کری یه. ته‌نێ مه‌سه‌لا زمان مابوو. نها پەکەکە هه‌می رێخستن ل دۆرا خوه جڤاندن ژ بۆنا زمان خورت بکن، یا راستی تێک ببن.
ژ به‌ر کو پەکەکێ روحیه‌تا نه‌ته‌وه‌یی ل باکور کوردستانێ نه‌هشتیه. ژ به‌ر ڤێ یه کو وان رێخستنێن مه یێن ژ خوه را دبێژن ئه‌م نه‌ته‌وه‌یی نه ژی راست نابێژن. د گۆتنا خوه دا راستن لێ د پراکتیکا خوه دا نه ڕاستن.
ژ بۆنا روحیه‌تا نه‌ته‌وه‌یی ل باکورێ کوردستانێ گه‌ش ببه، خورت ببه. دڤێ رێخستن و پارتیێن کوردان خوه ژ پەکەکێ دوور بگرن. دڤێ کوردێن باکور ب هه‌ر ئاوایی پشتگریا باشوورێ کوردستانێ و رێبازا بارزانیێ نه‌مر بکن دا کو ور ژ بۆنا مه کوردان ده‌وله‌تا کوردی و کوردستانه‌که سه‌ربخوه راگەهینن. چما؟
ژ به‌ر کو عەبدولا ئۆجەلان ب خوه دبێژه و گۆتیه: ”هه‌تا کو ئه‌ز و پەکەکە ئه‌م هه‌بن دێ بارزانی نکاربه ببه ده‌وله‌ت”. هه‌ر چقاسی ناڤێ بارزانیان دابن ژی لێ ئارمانجا عەبدولا و پەکەکێ ئه‌وه کو کورد نه‌بن خوه‌دی ده‌وله‌ت.
ژ به‌ر کو داگیرکه‌ر و پەکەکە باش دزانن کو ب ئازادیا پارچەیەکێ دێ رۆژ بێن پارچەیێن دن ژی ئازاد ببن. له‌وارا ژ بۆنا باشوورێ کوردستانێ نه‌به خوه‌دی ده‌وله‌تا کوردی و کوردستانه‌کا سه‌ربخوه رانه‌گەهینه ته‌ڤدگه‌رن.
