رۆژاڤایێ کوردستانێ و سیاسەتا دوروویی

ره‌وشا رۆژاڤایێ کوردستانێ گه‌له‌ک زەلال و ئاشکه‌رایه‌. لێ ئه‌ڤ ره‌وش چه‌وا تێ دیتن و چه‌وا تێ نرخاندن گه‌له‌ک گرینگه‌ و جوره‌یێ دیتنا ره‌وشا هه‌یی ل رۆژاڤایێ کوردستانێ ژ کێمبوونا ئه‌خلاقێ سیاسییه‌. ئه‌ڤ یه‌ک ژ بۆ هه‌رکه‌سێ راستیا هه‌یی نه‌بینه‌ و به‌حسێ نه‌که‌ ده‌رباس دبه‌.

پرانیا جارا به‌حسا هه‌لوه‌ستا ده‌وله‌تا ترک ل عه‌فرینێ و ده‌ڤه‌رێن ل رۆژهلاتا کوردستانێ تێ کرن. ده‌وله‌تا ترک داگیرکه‌ره‌ و به‌شه‌ک ژ رۆژاڤایێ کوردستانێ داگیر کریه‌. هه‌روه‌ها ل گۆرا ڤێ ژی ل ڤان ده‌ڤه‌ران ته‌ڤدگه‌ره‌ و ب راسته‌راست و ب رێیا ملیسێن خوه‌ یێن چه‌کدار زۆرداریێ ل کوردان دکه‌ و هه‌ول دده‌ ده‌مۆگرافیا ده‌ڤه‌رێن کورد لێ نشته‌جینه‌ و کوردستانە بگوهه‌رە. ب کەرتی داگیرکه‌ره‌ و دژمنە

لێ گه‌لۆ پەکەکە چیه‌ و چ دکه‌؟ پەکەکە به‌ری هه‌ر تشته‌کی ناڤێ کوردستانێ داگیر کریه‌ و ڤی ناڤی ل رۆژاڤایێ کوردستانێ ب کار نائینه‌ و هه‌تا قه‌ده‌خه‌یه‌، ئالایێ کوردستانێ قەدەخەیە. ده‌زگه‌هه‌ک یان رێکخستنەکا پەکەکێ ل رۆژاڤایێ کوردستانێ ب ناڤێ کوردستانێ نینە. ژ ئالیه‌ک دن ته‌عداریا پەکەکە ل رۆژاڤایێ کوردستانێ دکه‌ نه‌ ژ یا ده‌وله‌تا ترک کێمترە. پەکەکە چو مافێ ژیانێ ژ بۆ دژبه‌رێ خوه‌ ناهێله‌ و هێزێن یۆپۆزسیۆن هەموو تەپەسەر و بێدەنگ کرنە و ژ زلما پەکەکی ب هەزاران کەس ژ رۆژاڤایێ کوردستانێ کۆچبەر بوونە

لێ گه‌لۆ ژ بۆ چ پرانیا کوردان، سیاسه‌تمه‌دارا، ره‌وشه‌نبیر و یێن دن، ب هه‌موو ئاوایی به‌حسا هۆڤیتیا ترکیێ ل رۆژاڤایێ کوردستانێ دکن، لێ ل هەمبه‌ر هۆڤیتیا پەکەکێ بێ ده‌نگن. هه‌رده‌می د مه‌دیایا خوه‌ دا ب تەنێ وه‌سفێ ده‌ستهلاتداریا پەکەکێ ل رۆژاڤایێ کوردستانێ ددن.

هه‌تا راستیا هه‌یی نەیێ دیتن چو چاره‌سه‌ر ژی په‌یدا نابه‌.

نها ل رۆژاڤارێ کوردستانێ خه‌لک د ده‌ستێ رێڤه‌به‌ریا پەکەکێ دا نه‌چار مایه‌.
پەکەکە، وه‌ک هه‌موو کوردستانێ، ل رۆژاڤا ژی برینه‌ک کووره‌ د لاشێ کورد ئان و کوردستانێ دا. پێدڤیە ئه‌ڤ راستی بهێتە دیتن و دەست ژ سیاسه‌تا دوروویی و بێ ئه‌خلاقی بێته‌ به‌ردان. دێ ده‌مه‌ک بهێت ئه‌م دێ به‌رێ خوه‌ بدن رۆژاڤایێ کوردستانێ لێ نه‌ کوردان دبینین و نه‌ ژی دکارن هێدی به‌حسا کوردستانێ بکن. دێ پەکەکە هه‌موویێ تێکببه‌. ژ به‌ر کو ئیرۆ پرانی ناخوازن ڤێ یه‌که‌ ببینن و چاڤێن خوه‌ ل راستیا رۆژاڤایێ کوردستانێ دگرن.

بلا هنده‌ک رابن به‌حسا جیاوازیا ده‌وله‌تا ترک و پەکەکێ بکن. گه‌لۆ ما هەر دو نه‌ ب هه‌مان مه‌تۆدێ هه‌ولددن کوردان و دۆزا کوردستانێ تێکببن؟ گه‌لۆ ما هەر دو نه‌ ژ هه‌مان ئارمانجێ را خزمه‌تێ دکن؟

٢٠٢٣/١/١٨

نێرین / شرۆڤه‌