په‌یاما سه‌رۆکێ هه‌رێما کوردستانێ ل سه‌ر په‌سه‌ندکرنا بوودجه‌یێ
په‌یاما سه‌رۆکێ هه‌رێما کوردستانێ ل سه‌ر په‌سه‌ندکرنا بوودجه‌یا ئیراقێ
ئه‌م پێشوازیێ ل په‌سه‌ندکرنا بوودجه‌یا سێ سالان یا ئیراقێ دکن. ئه‌م هێڤیدارن کو ژ بۆ گه‌شه‌پێدانا ئابۆری، ئارامیا سیاسی و چێکرنا ژینگه‌هه‌کا باش یا ڤه‌به‌رهێنانێ، ببه نه‌خشه‌رێیه‌ک باش. ئه‌م ده‌ستخوه‌شیێ ل هه‌موو وان برێزان دکن کو ب دلسۆزی ژ بۆ به‌رژه‌وه‌ندیێن هه‌ڤوه‌لاتیان و وه‌کهه‌ڤیا خه‌لکێ ئیراقێ کار کرنه.
مخابن، د ده‌ما گۆتووبێژێن د ناڤ پەرلامه‌نتۆیێ دا، هنده‌ک پەرلامه‌نته‌ران ب ئاوایه‌کی نه‌راست ل هه‌مبه‌ر مافێن هه‌رێما کوردستانێ و ناڤچه‌یێن ناکۆکدار ره‌فتار کرن. تشتا کو قه‌ومی، نه ل گۆری پره‌نسیبێن رێکه‌فتنا سیاسی یا هه‌ڤپه‌یمانیا برێڤه‌برنا ده‌وله‌تێ یه و ئه‌ڤ رێ و رێبازا خه‌باتێ، خزمه‌تا پرۆسه‌یا سیاسی، ره‌وش و پاشه‌رۆژا ئیراقێ ناکه.
پێدڤیه یاسایا بوودجه‌یێ ب ئاوایه‌کی دادپه‌روه‌رانه وه‌ره جیبجیکرن و پێگه‌هێ هه‌رێما کوردستانێ وه‌که قه‌واره‌یه‌کی سیاسی یا ده‌ستووری و ناڤچه‌یێن ناکۆکدار ل به‌ر چاڤان بێن گرتن و ماف و به‌رژه‌وه‌ندیێن وان بێن پاراستن. دڤێ پشتراستیه‌کا تمام هه‌به کو مافێ دارایی و مووچه‌یێ فه‌رمانبه‌رێن هه‌رێما کوردستانێ ژ به‌ر سه‌ده‌مێن سیاسی نایێ پاشخستن و پاشگوهخستن.
تشتا کو مه د ده‌ما گه‌نگه‌شه‌کرنا بوودجه‌یێ دا دیت، جهێ دلگرانیه‌ک کوور بوو و جاره‌کا دن ئەو راستی ئیسپات کر کو پارچه‌بوونا ئالیێن کوردستانی دێ زرارێ بده هه‌رێما کوردستانێ. لێ ته‌ڤێ ڤێ ژی، ب ئیراده‌یا سیاسی یا هه‌ڤبه‌ش و لبه‌رچاڤگرتنا به‌رژه‌وه‌ندیا گشتی، ئه‌م دکارن ڤێ ده‌رفه‌تێ ژ بۆ بهێزکرنا باوه‌ریا هه‌ڤبه‌ش، باشتر رێکخستنا کارووبارێن ناڤخوه‌یی، کێمکرنا ئالۆزیان و چاره‌سه‌رکرنا پرسگرێکان ژ بۆ بهێزترکرنا ئیراق و هه‌رێما کوردستانێ بکار بینن.
نێچیرڤان بارزانی
سه‌رۆکێ هه‌رێما کوردستانێ
٢٠٢٣/٦/١٣
