پەکەکە ل دژی پەدەکێ بانگا “یەکێتیا نەتەوی” دکە
ده‌ما تشته‌ک نه‌مینه، هه‌رده‌می پەکەکە دکاره ژ بۆ خوه رۆژه‌ڤه‌کی چێبکه و به‌رێ خه‌لکه‌کی بده ڤێ رۆژه‌ڤێ و گۆتوبووژ ل سه‌ر بێته کرن. پرۆپاگانده‌یا ده‌ره‌وان و بەلاڤکرنا نووچەیێن شاش کارێ سەرەکی یێ سیاسه‌تا پەکەکێ یه و د ڤی واری دا ژی گه‌له‌ک سه‌رکه‌فتیه. پارتیا کارکەرێن کوردستانێ (پەکەکە) نها مژوولی چیه؟ راستی ڤێ پارتیێ پلانەکا ستراتەژیک یا نەتەوەیی و کەردستانی نینە، ژ بەر هندێ ئه‌و ب خوه ژی نزانە دێ چ بکە، ژ بلی کو فه‌رمانا ژ ده‌وله‌تێن داگیرکه‌ر بگرن و ئێریشێ ده‌ستکه‌فتیێن کوردستانێ بکن.
ئه‌ندامێ کۆنسه‌یا رێڤه‌به‌ریا کەجەکێ، کاراسو، دیار کر دڤێ مرۆڤ نه ل به‌ندێ به کو پارتییا دەمۆکراتا کوردستانێ (پەدەکە) یا کو ب ده‌وله‌تا ترک را ته‌ڤدگه‌ره دێ ته‌ڤلی “یه‌کێتیا نه‌ته‌وه‌یی” ببه و گۆت “دڤێ هه‌موو پارتیێن کوردان ژ بۆ ئاڤاکرنا یه‌کێتیا نه‌ته‌وه‌یی بێن جه‌م هه‌ڤ.”
مسته‌فا کاراسو ب خوه که‌سه‌که کو نه‌خوه‌شیا زهه‌یمه‌ر پێرا هه‌یه ئه‌و ب خوه گه‌له‌ک جارا ژ بیر دکه و نزانە چ دبێژه. لێ ده‌ما پەکەکە بخوازه تشته‌کی بێژه و پاشه‌رۆژێ دا لێ خوه‌دی ده‌رنه‌که‌ڤه، ب کاراسو ددن گۆتن. ژ ئالیه‌ک دن ڤه ب ئاقلانه که‌ره‌مبکن هه‌ڤپه‌یڤینا کاراسو یاکو د ئانفێ دا ژی هاتی به‌لاڤ کرن بخوینن، کا هونێ چ ژێ فام بکن. تشته‌ک نایێ فام کرن و هه‌موو گۆتنێن وی ته‌کرارا ده‌هێ سالانه و به‌نیشته‌ک بێ تام دجوو.
به‌حسا یه‌کێتیه‌ک نه‌ته‌وی دکه، لێ ڤێ جاره دخوازه “یه‌کێتیا نه‌ته‌وی“ ل هەمبه‌ر پەدەکێ ئاڤا بکه. ئه‌ڤ چ مه‌ژیه کو مله‌ته‌ک وه‌ک په‌زێ مێشین ل دووڤ ڤان گۆتارێن پووچ دچه، نایێ زانین.
پەکەکە رێخستنه‌که کو، پەیوه‌ندیێن وێ ب به‌غدا، شام، ئه‌نقه‌ره و تەهرانێ را هه‌یه. لێ ئه‌ڤ پەیوه‌ندی ب ده‌زگه‌هێن ئیستخباراتا ڤان وه‌لاتان را یه. گه‌لۆ وه رۆژه‌ک ژ رۆژان دیتییه کو، به‌رپرسه‌کی پەکەکێ ب ئاوایه‌ک فه‌رمی ب به‌رپرسێ وه‌لاته‌کی را بجڤه و ئه‌ڤ یه‌ک وه‌ک نووچه‌یه‌کی بێ راگەهاندن؟ ئه‌ڤ خاله‌ک گه‌له‌ک گرنگه و نیشانا سیخووریێ یه.
پرسا پەدەکێ نه پرسا پارتیه‌کێ یە. ئیرۆ پەدەکە ل باشوورێ کوردستانێ دگه‌ل ئالیێن دن ئێن سیاسی ده‌ستهلاته‌که کو ژ ئالیێ دنیایێ ڤه تێ ناسکرن. کۆنسولخانه‌یا ب ده‌هان وه‌لاتان ل هه‌ولێر هه‌یه. ل باشوورێ کوردستانێ سه‌رۆکێ هه‌رێما کوردستانێ و حکومه‌تا کوردستانێ هه‌یه. پەرله‌مه‌نتۆ هه‌یه و سه‌رۆکێ پەرله‌مه‌نتۆیێ هه‌یه. دنیا هه‌موو ڤێ یه‌کێ قه‌بوول دکه. ده‌ما نێچرڤان بارزانی سەردانا وه‌لاته‌کی دکه، وه‌ک سه‌رۆکێ هه‌رێما کوردستانێ سەردانا خوه دکه و ب ئاوایه‌ک فه‌رمی ب بلندکرنا ئالایێ کوردستانێ تێ پێشوازی کرن.
لێ پەکەکە و به‌رپرسێن وێ یێن وەک، کاراسو، بانگ ل پارتیێن کوردا دکه و دبێژه: پەیوه‌ندیێن پەدەکێ دگه‌ل ترکیێ هه‌نه. وه‌رن ئه‌م ل هەمبه‌ر پەدەکێ “یه‌کێتیه‌ک نه‌ته‌وی“ ئاڤا بکن. مخابن چو ئالیه‌ک به‌رسڤه‌کێ ناده و نابێژه؛ “ ئه‌ڤ چ سڤکاتیه کو هوون ب خوه دکن.
نرخێ سیاسه‌تێ د دیارکرنا هه‌لوه‌ستان دا یه. ده‌ما مرۆڤ ژ بۆ پرس و گۆتارێن کو نه د به‌رژه‌وه‌ندیا کوردستانێ دا بن، نابه بێ ده‌نگ بمینه، دڤێ خوه‌دی هه‌لوه‌ست به. کاراسو ده‌ما جورئه‌ت بکه ب ناڤێ پەکەکێ بانگه‌ک ب ڤی ئاوایی بکه، گه‌ره‌ک ژ ئالیێ پارتیێن کوردا ڤه بهاتا شه‌رمه‌زار کرن. بێ ده‌نگی ب خوه ده‌لیلێ هنده‌ک تشتا یه. بلا باش بێ زانین کو، خوه‌دیێ پەکەکێ ب خوه چو خێر ژ پەکەکێ نه‌دیتیه، ڤێجا واخ حالێ ئالیێن کو د ئاڤا پەکەکێ دا ئاڤژه‌نیێ دکن…
نووچه/ئەنالیز
