نێچیرڤان بارزانی: دڤێ پەکەکە و هێزێن دن یێن نه‌قانوونی ژ شنگالێ ده‌رکه‌ڤن
سه‌رۆک نێچیرڤان بارزانی: ئه‌م دێ هه‌رتم پشته‌ڤانی و به‌رگریێ ژ مافێن برایێن خوه یێن ئێزدی بکن
برێز نێچیرڤان بارزانی سه‌رۆکێ هه‌رێما کوردستانێ، رۆژا شه‌میێ ٢٠٢٤/٨/٣ێ، د ۱۰ سالڤه‌گه‌را کۆمکوژیا ئێزدیان کو، ژ ئالیێ زانینگه‌ها کوردستانێ و ئۆفیسا رزگارکرنا ره‌ڤاندیێن ئێزدی ل هه‌ولێرێ ڤه هاتبوو به‌رهه‌ڤ کرن، به‌شداری کر.
د مه‌راسیمێ دا سه‌رۆک نێچیرڤان بارزانی په‌یڤه‌ک پێشکه‌ش کر و ئه‌ڤ ل ژێر ناڤه‌رۆکا وێ په‌یڤێ:
ڕێزدار ئه‌میرێ ئێزدیان، میر حازم ته‌حسین به‌گ
برێز بابا شێخ
خووشک و برایێن هێژا یێن ئێزدی،
ئاماده‌بوویێن هێژا
هه‌موو ئالی ب خێر هاتن ژ بۆ بیرئانینا ب ئێش و ژان، ۱۰ئه‌مین سالڤه‌گه‌را کۆمکوژیا ئێزدیان. بیرئانینا یه‌ک ژ تاوانێن هه‌ری هۆڤانه د دیرۆکێ دا کو ئیرۆ ژی پشتی ده‌ه سالان هێشتا برینه‌ک ڤه‌کری یه و وه‌لاتیێن مه یێن ئێزدی هین ژی ئه‌نجامێن وێ ئێشێ دکشینن. بیرئانینا تاوانه‌که دن ئا هۆڤانه کو ئه‌و ژی که‌تیه ڕێزا کیمیاباران، ئه‌نفال، کۆچبه‌رکرن، ب زیندی بنئاخکرن، وێرانکرن و هه‌موو ئه‌و تاوانێن کو ل دژی گه‌ل و خاکا کوردستانێ هاتنه کرن.
شه‌هیدبوونا زێده‌تر ژ ٥۰۰۰ که‌سان کو، ب سه‌داهان پێکڤه گوله‌بارانکرن و د ۱۰۰ گۆرێن کۆمی دا هاتن بنئاخکرن، زێده‌تری ٦٤۱۷ که‌چ، ژن و زارۆکێن ئێزدی هاتن ڕه‌ڤاندن و ل بازاران هاتن فرۆتن کو، مخابن هین ژی چاره‌نڤیسا ۲.٥۹٦ نه‌دیاره، وێرانکرنا شه‌نگال و ده‌ڤه‌رێن وێ، کۆچبه‌ربوونا ب سه‌دهه‌زار که‌سان ژ خه‌لکێ شه‌نگال و ده‌ڤه‌رێن وێ، ئێش و حه‌سره‌تا ڤان هه‌موویان نه د ۱۰ سالان دا، لێ هه‌تا-هه‌تایێ نایێ ژبیرکرن!
کۆمکوژیا ئێزدیان د سه‌رداما جیهانا نووژه‌ن و پێشکه‌تی دا شۆکه‌که مه‌زن و نه‌باوه‌رکری بوو کو، ته‌ڤاهیا مرۆڤاهیێ ل جیهانێ هه‌ژاند. د دیرۆکا کوردستان و ئیراقێ دا خاله‌که وه‌رچه‌رخانێ بوو کو، دڤیابوو ب ئاوایه‌کی جدی بهاتا گرتن و هه‌موو جڤاکا ناڤده‌وله‌تی ب هه‌ڤ ڕا کار بکرانا کو ئه‌ڤ تاوان ل جهێن دن دوباره نه‌به. دڤێ هه‌ر هه‌ول بێ دایین کو سووجدار بێن جه‌زاکرن، عه‌داله‌ت ژ مه‌خدووران ڕا بێ جیبجیکرن و مه‌خدووران ب هه‌ر ئاوایی بێن قه‌ره‌بووکرن! ب ڤێ مناسه‌به‌تێ ئه‌م جانگۆریێن وان ب ڕێزداری ب بیر تینن. ئه‌م به‌ژنا خوه ل به‌ر گیانێ وان یێ پیرۆز دچەمینن. ئه‌و دێ هه‌ر و هه‌ر د بیردانکا هه‌موو کوردستانیان و هه‌ر مرۆڤه‌کی خوه‌دی وژدان بێن بیرانین.
سلاڤ ژ مالبات و که‌سووکارێن قوربانیێن دلبرین ڕا. ئه‌م ژان و ئێشا وان ژ نێز ڤه هەست پێ دکن. هایا مه ژ حه‌سره‌تا وان، نالین و که‌ده‌را وان ئا ب شه‌ڤ و ڕۆژ هه‌یه. ئه‌م هه‌ڤسۆز و هه‌ڤخه‌میا وان دکن و هه‌ر تم پشتگریا وان دکن.
برێزان..
ڤه‌گه‌راندنا ژ کۆمکوژیێ، ژ نووڤه ده‌ستپێکرنا ژیانێ، ژ نووڤه ئاڤاکرنا هێڤیا پاشه‌رۆژێ ژ بۆ ئێزدیان د ڕه‌وش، ده‌م و ئه‌ردنیگاریه‌که وها دا، نه کاره‌کی هێسانه،کاره‌کی گه‌له‌ک زه‌حمه‌ته، لێ به‌رخوه‌دان و ئیراده‌یا وان یا ژ بۆ ژیان، مان و به‌رده‌وامیێ وسا دکه کو، کا چاوا ئێزدی به‌رێ ب ده‌هان فه‌رمانێن ژناڤبرنێ و کۆمکوژیێ دا نه‌هاتنه ژناڤبرن، له‌ورا ڤێ جارێ ژی، ته‌ڤی ده‌رده‌سه‌ری و وێرانیێن وێ کۆمکوژیێ، ئه‌و دێ ڕابن و ژ نووڤه ده‌ست پێ بکن.
یا کو ل سه‌ر ئاستا ناڤنه‌ته‌وی ژ بۆ ناسکرنا ژه‌نۆسیدا ئێزدیان هاتیه کرن، ئالیکارییێن ناڤنه‌ته‌وی، یا کو ل هه‌رێما کوردستانێ و ئیراقێ ژ بۆ خزمه‌تکرنا ئێزدییان هاتییه کرن د دانان یاسایا (رزگاربوویێن ئێزدی و پێکهاته‌یێن د دن ژ مه‌سیحی، ترکمان و شه‌به‌ک) دا، به‌رده‌سکرنا ئالیکاریێن مه‌هانه ژ ئالیێ حکومه‌تا ئیراق یا فه‌ده‌رال ڤه، هه‌روه‌سا پشتگریا حکومه‌تا هه‌رێما کوردستانێ ژ بۆ ئالیکاریکرنا په‌نابه‌رێن ئێزیدی ژ بۆ ڤه‌گه‌را شنگالێ و گه‌له‌ک گاڤێن دن جهێ حورمه‌ت، سپاسی و ده‌ستخوه‌شیێ نه، لێ بێگومان یه‌ک ژ ڤان تێرا ناکه و هێشتا گه‌له‌ک تشت هه‌نه کو، ژ بۆ گه‌لێ عه‌زیز یێ ئێزدیان بێ کرن. کێمکرنا ئه‌نجامێن ژه‌نۆسیدێ ئه‌رک و به‌رپرسیاریا هه‌ڤپار یا هه‌موویانه ل ئیراق، هه‌رێما کوردستانێ و هه‌تا یا جڤاکا ناڤده‌وله‌تی ژی یه. چاره‌سه‌رکرنا ئه‌نجامێن ده‌روونی، جڤاکی، مرۆڤی، ئابۆری و هاوردۆرێ یێن کۆمکوژیێ کاره‌کی دژوار و ده‌مدرێژه کو پێویستی ب گه‌له‌ک ژێهاتیبوون، پسپۆری و پێویستیان هه‌یه. ئه‌م هه‌موو نه‌چارن د ڤی کاری دا به‌رده‌وام بکن و ب سه‌ر بکه‌ڤن، چو ڕێیه‌ک دن ل پێشیا مه نینە دڤێ بکین. دڤێ ئاقووبه‌تا وندایان بێ ئه‌شکه‌ره‌کرن و مالباتێن وان ژ ئێشا بێناڤبه‌ر ئا به‌نده‌واریێ ڕزگار ببن.
ژ بۆنا ڤێ مه‌به‌ستێ ئه‌م هه‌موو خووشک و برایێن خوه یێن ئێزیدی پشتراست دکن کو، کارێ تیمێن ئۆفیسێ دێ به‌رده‌وام بن هه‌تا کو که‌سه‌ک ڕه‌ڤاندی نه‌مینه و هه‌موو ڕه‌ڤاندی بێن ڕزگار کرن. پێویستیا ب هه‌زاران مه‌خدووران ب ده‌رمانکرنا پسیکۆلۆژیک یا ده‌مدرێژ و لێنهێرینا تایبه‌تی هه‌یه، کو دڤێ ژ وان ڕا وه‌ره په‌یدا کرن و ئالیکاریا وان وه‌ره کرن دا کو ڤه‌گه‌رن ژیانا نۆرمال. شه‌نگال و ده‌ردۆرا وێ پێویستی ب ژنووڤه ئاڤاکرن، خزمه‌تگوزاری و دابینکرنا ئاشتی و ئارامیێ هه‌یه. ژ به‌ر وێ ژی دڤێ حکومه‌تا فه‌ده‌رال یا ئیراقێ ژ بۆ پێکانینا ڕێکه‌فتنا شه‌نگالێ و ئاساییکرنا ڕه‌وشێ ب حکومه‌تا هه‌رێما کوردستانێ ڕا هه‌ڤکاریێ بکه.
خزمه‌تکرنا گه‌لێ شه‌نگالێ و پێکهاته‌یا ئێزدی دڤێ کارێ مه هه‌موویان یێ پێشین به. وه‌رن ئه‌م هه‌موو ب هه‌ڤ ڕا بخه‌بتن کو ئێدی شه‌نگال و ئێزدی نه‌بن ئاژاندایا حزبی و سیاسی و دیل نه‌بن ده‌ستێ هێزێن هه‌رێمی دا. دڤێ گه‌لێ شه‌نگالێ ب خوه کارووبارێن خوه برێڤه ببه و ئێدی نه‌بن ئه‌سیرێ هێزێن ده‌رڤه‌یی تۆخووبان. ژ به‌ر ڤێ یه‌کێ دڤێ پەکەکە و هه‌ر هێزه‌که نه‌قانوونی ژ شه‌نگالێ ده‌رکه‌ڤه دا کو ئه‌م هه‌موو ب هه‌ڤ ڕا بکارن ئه‌وله‌هی، ژیان، ئاڤادانی، ئومێد و هێڤیا ژیانێ ژ شه‌نگالێ ڕا ڤه‌گه‌رینن. ل ئیراقه‌که پرئۆلی و پرنه‌ته‌وه‌یی دا، هه‌بوونا ب باندۆر یا سازیان و جیبجیکرنا ده‌ستوورێ گارانتیا پاراستنا هه‌موو پێکهاته‌یان و مافێن وان یێن نها و پاشه‌رۆژێ دکه، کلیلا ئاشتی، ئارامی و پێشکه‌تنا وه‌لاته، ژ به‌ر وێ ژی دڤێ ئه‌م هه‌موو ژ بۆ جیبجیکرنا ده‌ستوورا هه‌رده‌می یا ئیراقێ کار بکن.
ئاماده‌بوویێن برێز
ئێزدایاتی ئۆلا ژیاندۆستی، مرۆڤدۆستی و هه‌ڤدوقه‌بوولکرنێ یه، پرسگرێک ب چو ئۆل و باوه‌ریێن دن ڕا نینە. ئێزدی ب خوه پێکهاته‌یه‌که کو، دخوازن ب ده‌روودۆرا خوه ڕا ب خوه‌شی و ئارامی بژین. ژ به‌ر هندێ جڤاکه‌کا هندی بێژی حه‌ز ژ ئاشتی، سه‌قامگیری و ئارامیێ دکن. ئه‌و ژ وه‌لات، گه‌ل و جیرانێن خوه ڕا گه‌له‌ک دلسۆز و مرۆڤپه‌روه‌رن. ژ به‌ر ڤێ یه‌کێ ئێزیدی بنگه‌هه‌ک گرینگ یا چاندا پرده‌نگی، بهه‌ڤره‌ژیان و تۆله‌رانسێ نه د جڤاکا کوردستان و ئیراقێ دا.
داعیشێ ب کۆمکوژیا ئێزدیان خوه‌ست دژمنی، دوبه‌ندی و ناکۆکیان د ناڤبه‌را پێکهاته‌یێن جڤاکێ و چاندا مه یا ژیانا هه‌ڤبه‌ش دا دروست بکن. مخابن ل شه‌نگالێ و ل هنده‌ک ده‌ڤه‌رێن دن ئێزدی ژ خه‌و ڕابوون دیتن کو جیران و کریڤێن وان یێن ب سالان جلووبه‌رگ و فکرێن ڕه‌ش یێن داعیشێ ل خوه کرنه و دەستێ خوە ژ تشته‌کی وان ناپارێزن. ب ڕاستی ئه‌ڤ ئێشه‌ک کوور و ژانه‌ک مه‌زنه. له‌وما پشتی ۱۰ سالێن کۆمکوژیێ و ئێش و ئازارێن وێ، ژ هه‌ر تشتی زه‌ده‌تر پێویستیا گه‌لێ ئێزدی ب دروسکرن و بنیاتدانانا باوه‌ریێ هه‌یه. ئه‌رکێ مه هه‌موویانه، د هه‌موو واران دا کو، ئه‌م هه‌ر تشتی بکن دا کو ئه‌م ئێزیدیان بگهینن ئه‌وله‌هی، باوه‌ری، هێڤی و پاشه‌رۆژه‌که گه‌ش و ئه‌وله. وه‌رن ئه‌م ڕێیه‌کێ ببینن کو تشتێ هاتیه سه‌رێ وان هه‌ر و هه‌ر ببه پاراستنه‌ک و جاره‌که دن ڕۆژه‌ک وەسا ڕه‌ش نه‌بینن. ژ بلی هه‌موو ئه‌رکێن کو دکه‌ڤه سه‌ر ملێ حکومه‌ت، ئالیێن سیاسی و ئالیێن پەیوه‌ندیدار بۆ خزمه‌تکرنا ئێزدیان، ئه‌ز دخوازم بالێ بکشینم سه‌ر ڕۆلا گرنگ یا زانینگه‌هان. گه‌له‌کی گرینگه کو سازیێن مه یێن ئەکاده‌میک لێکۆلینێن زانستی و ته‌زێن ئەکاده‌میک ب زمانێن جودا ڤه‌قه‌تینن و لێکۆلین بکن کا ئێزدیان چاوا ئۆل، چاند، که‌ڤنه‌شۆپی و زمانێ خوه پاراستنه؟
ژ به‌ر ڤێ یه‌کێ ئه‌ز بانگ ل زانینگه‌هێن مه دکم کو به‌شه‌ک ژ ته‌زێن خوه یێن ماسته‌ر و دۆکتۆرایێ ژ بۆ پرسگرێکا ئێزدیان کو، هه‌موو قادێن ژیانا وان بگرن ناڤخوە، ڤه‌قه‌تینن. ب ڤێ یه‌کێ ئه‌م دێ ژ بۆ ئێزیدیان قادا ڕاگهاندنێ و پاراستنا دۆزا خوه و هه‌ر وها پاراستنا ڕه‌سه‌نی و میراته‌یا خوه بکن، دا کو د چاڤکانیێن ناڤنه‌ته‌وه‌یی دا ببه چاڤکانیا به‌لگه‌یان.
د داویێ دا ئه‌م سه‌رخوه‌شیێ ل مالباتێن پێشمه‌رگه یێن قه‌هره‌مان دکن کو د ئۆپه‌راسیۆنا ئازادکرنا شنگالێ دا، د بن سه‌رۆکاتیا سه‌رۆک مه‌سعود بارزانی، دا شه‌هید بوونه. بلا سه‌رێ مالباتێن وان ساخ به. ئه‌م ژ مالباتێن وان یێن سه‌ربلند ڕا سلاڤێن خوه دشینن. سپاس ژ بۆ هه‌ڤپه‌یمانیا ناڤده‌وله‌تی کو، ئالیکاریا ئیراق و هه‌رێما کوردستانێ ژ بۆ شکاندنا داعیشێ کر. چاوا کو مه ب هه‌ڤ ڕا داعیش تێک بر، ئه‌م دێ ب هه‌ڤکاریا هه‌ڤپار د هه‌موو واران دا فکرێن تاری یێن ته‌رۆریستان، توندره‌وی و توندیێ ژناڤ ببن. ژ بۆ ڤێ مه‌به‌ستێ ژی دڤێ ئه‌م به‌رده‌وام بن ژ به‌ر کو ل گۆری مه هه‌تا نها ژی داعیش ل سه‌ر ئاشتی و ئارامیا ئیراق و ناڤچه‌یێ مه‌ترسی یه.
ژ بۆ ئۆرگانیزه‌کرنا ڤێ بیرئانینێ سپاسیا زانینگه‌ها کوردستانێ یا هه‌ولێرێ و ئۆفیسا ڕزگارکرنا ڕه‌ڤاندیێن ئێزدی دکم.
ب ڤێ مناسه‌به‌تێ ب ناڤێ خوه و وه، ب گه‌رمی پیرۆزباهیێ ل به‌رپرس و تیمێن ئۆفیسێ دکم ژ بۆ ڕزگارکرنا که‌سێن ڕه‌ڤاندی. ڕزگارکرن و ڤه‌گه‌راندنا ۳ هه‌زار و ٥۷۹ که‌سێن ڕه‌ڤاندی کاره‌کی مه‌زنه و سپاسیا وان دکم و سه‌رکه‌فتنێ ژ وان ڕا دخوازم. ئه‌ز خووشک و برایێن مه یێن ئێزیدی دلرەحەت دکم کو ئه‌م دێ هه‌ر ده‌م پشتگریا وان بکن و مافێن وان بپارێزن. ژ بۆ شه‌نگال ببه پارێزگه و ژ نووڤه ئاڤا بکن ئه‌م دێ خه‌باتێن خوه بدۆمینن. ئه‌م دێ کار بکن کو به‌شداربوون و نوونه‌راتیا سیاسی و ئیداری یا ئێزدیان و هه‌موو پێکهاته‌یان د سازیێن ئیراق و هه‌رێما کوردستانێ دا وه‌که پێویست و پاراستی به. ئه‌م دێ به‌رده‌وام بن هه‌تا ب ئاوایه‌کی به‌رفره‌هتر کۆمکوژیا ئێزدیان ل جیهانێ بێ ناسکرن و بێ قه‌ره‌بووکرن.
هه‌ر وها ده‌ستخوه‌شیێ ل وان هه‌موو که‌سان دکم یێن کو ئیرۆ ل هه‌ر ده‌رێ ڤێ سالڤه‌گه‌را خه‌مگین ببیر تینن. سپاسیا هه‌موو که‌سێن کو د یه‌که‌م کێلیا ژه‌نۆسیدێ دا دگه‌ل خووشک و برایێن ئێزیدی و خه‌لکێ شنگالێ ڕاوه‌ستیان، ب تایبه‌تی ژی خه‌لکێ دلسۆز و مێڤانپه‌روه‌ر یێن دوهۆک و بادینان ب گشتی هه‌مبێزا خوه ژ قوربانیێن شنگالێ ڕا ڤه‌کرن. مرۆڤاهی و وێره‌کیا وان چو جاری نایێ ژ بیر کرن.
د داویێ دا سلاڤ ل گیانێ گه‌نه‌رالێ هێزێن ئاسمانی یێ ئیراقێ (مه‌جید ئه‌بدولسه‌لام ته‌میمی) کو د ئالیکاریا قوربانیێن شه‌نگالێ دا ژیانا خوه ژ ده‌ست دا و شه‌هید بوو، بن. ئه‌م سلاڤێن خوه ژ گیانێ وی ڕا دشینن و ب ڤێ رێ سلاڤ، ڕێز و حه‌زکرنا خوه ژ مالباتا وی ڕا دوپات دکن.
جاره‌که دن هوون هه‌موو ب خێر هاتن
گه‌له‌ک سپاس.
