سه‌رۆک نێچیرڤان بارزانی ب وه‌زیرێ ده‌رڤه یێ سووریه‌یێ ڕا جڤیا
ئیرۆ دانێ سبێ ڕۆژا شه‌میێ ۱٥.۰۲.۲۰۲٥ێ ل باژارێ مونجهه‌نێ، برێز نێچیرڤان بارزانی سه‌رۆکێ هه‌رێما کوردستانێ دگه‌ل برێز ئه‌سعه‌د شەیبانی وه‌زیرێ ده‌رڤه یێ سووریه‌یێ جڤیا.
د جڤینێ دا پێشهاتێن سیاسی و ئه‌وله‌کاری ل سووریه‌یێ و ئیراقێ و چاوانیا بهێزکرنا ئارامیا ناڤچه‌یێ، ڕه‌وشا پێکهاته‌یێن سووریه‌یێ و گرنگیا پاراستنا مافێن وان و مسۆگه‌رکرنا به‌شداریا وان د پاشه‌رۆژا وه‌لات دا گۆتووبێژ کرن.
سه‌رۆک نێچیرڤان بارزانی بالکشاند ل سه‌ر گرنگیا پاراستنا مافێن گه‌لێ کورد و هه‌موو پێکهاته‌یێن ل سووریه‌یێ و گرنگیا بده‌ستڤه‌ئانینا ئاشتی و ئارامیێ و ئاماژه ب وێ یه‌کێ ژی کر کو پێویسته هه‌موو پرسگرێکان ب دیالۆگ و تێگهشتنێ بێن چاره‌سه‌رکرن و کار ژ بۆ پاشه‌رۆژه‌کا ئارام بۆ هه‌موو پێکهاته‌یێن سووریه‌یێ بێ کرن.
برێز شه‌یبانی، ژ ئالیێ خوه ڤه، ته‌که‌زی ل سه‌ر پابه‌ندبوونا سووریه‌یێ ب دابینکرنا ئارامیێ و ئافراندنا مه‌رجێن گونجاو ژ بۆ دیالۆگا نشتمانی دوپات کر و، هه‌روه‌سا، ته‌که‌زی ل سه‌ر خوه‌سته‌کا سووریه‌یێ ژ بۆ بهێزکرنا په‌یوه‌ندیێن ب ئیراق و هه‌رێما کوردستانێ ڕا و بهێزکرنا هه‌ڤکاریێن هه‌ڤبه‌ش ژ بۆ چاره‌سه‌رکرنا ئالۆزی و کێشه‌یێن هه‌یی کر.
