ل ترکیه و باکورێ کوردستانێ پشتی بانگا سه‌رۆکێ مەهەپێ ده‌ڤله‌ت باخچه‌لی ژ بۆ ئۆجالان پێڤاژۆیه‌ک بێناڤ ده‌ستپێکر. بێ گومان جاردن د ڤێ پێڤاژۆیا بێناڤ دا، پرسا کورد ب ئاوایه‌ک دن هاته ڕۆژه‌ڤێ و ئالیێن سیاسی ئه‌ڤ یه‌ک گۆتوبێژ کرن.
ئه‌م دبێژن پێڤاژۆیا بێناڤ، لێ ده‌وله‌تێ ناڤ ل پێڤاژۆیێ کریه و هه‌تا ڤێ یه‌کێ وه‌ک پێڤاژۆیه‌کێ ژی نانرخینه. ده‌ڤله‌ت باخچه‌لی ڤه‌کری دبێژه: “بلا ئۆجەلان بێ د پارله‌مه‌نتۆیا ترکیێ دا و د جڤینا گوروبا ده‌م پارتیێ دا ئاخاڤتنێ بکه و بێژه: “ پەكەكێ دەست ژ چه‌کان به‌ردایه و پەكەكە هاتیه ته‌سڤیه‌کرن.“ هه‌روه‌ها سه‌رۆکۆمارێ ترکیێ ئه‌ردۆگان ژی د گه‌له‌ک مناسه‌به‌تان دا ڤه‌کری دبێژه: دڤێ ته‌رۆر نه‌مینه و شیعارا مه ترکیه‌ک بێ ته‌رۆره. یانی ده‌وله‌تێ و که‌سێن کو ئه‌ڤ ئینسیاتیف ده‌ستپێکرنه ب ده‌نگه‌گ بلن ناڤ ل پێڤاژۆیێ کرنه.
لێ ده‌م پارتی ، پەكەكە و هه‌موو ده‌زگه‌ه و ئالیێن ب وان ڤه گرێدایی هه‌ول ددن ناڤه‌ک دن ل پێڤاژۆیێ بکن داکو، بکاربن هه‌لوه‌ستا خوه ب ئاوایه‌کی مه‌شروع بکن و هه‌تا ڕاده‌یه‌کی كو ڕێیا ڕه‌دکرنا بانگا ئۆجالان ژ بۆ خوه ڤه‌کری بهێلن.
بێ گومان ل ترکیێ و باکورێ کوردستانێ شه‌ره‌ک بێ واته هه‌یه. شه‌رێ هه‌یی چو فایده‌یه‌ک نه‌دایا دۆزا کورد، بەروڤاژی، هەبوونا شەری چه‌که‌کە د ده‌ستێ ده‌وله‌تێ داكو ب هێجەتا ڤی شه‌رێ ته‌ڤگه‌را کورد یا ئازادخواز ته‌تەسفیە بکه و زلم و زۆرداریا خوه ل سه‌ر کوردان مه‌شرووع بکه. هات خوویاکرن کو پەكەكە ب ته‌نێ ده‌ستکه‌ک یا له‌یزتکێ د ده‌ستێ ده‌وله‌تان دا یه و هه‌ر ده‌ما بخوازن ژ بۆ به‌رژه‌وه‌ندیێن خوه ب تینن.
یانی ب کورتی دانینا چه‌کان د به‌رژه‌وه‌ندیا کوردان دا یه و هه‌روه‌ها تێکچوون و ته‌سفیه‌کرنا پەکەکێ ژی د به‌رژه‌وه‌ندیا کوردان دا ل هه‌ر چار به‌شێن کودستانێ دا یه. ئه‌گه‌ر هنده‌ک عه‌کسێ ڤێ ئسپات بکن بلا ڤه‌کری بێژن. لێ مخان كا چه‌وا کو بەرێ ڕاستیا پەکەکێ نه‌هات گۆتوبێژ کرن، ئیرۆژی هنده‌ک هه‌ولددن ڕۆله‌کێ کوردپه‌روه‌ریێ بدن ڤێ ته‌ڤگه‌رێ. قه‌ندیل به‌رسڤه‌ک ئه‌رێنی بده بانگا ئۆجەلان دێ باشبه. لێ دخوه‌یێ ئه‌ڤ یه‌ک ژی دێ زه‌همه‌ت به. ژ به‌ر کو، هه‌لوه‌ستا چه‌پێن ترکێن که‌مالیست دکاره نه‌هلە قه‌ندیل ب یه‌کده‌نگی به‌رسڤه‌ک ئه‌رێنی بده بانگا ئۆجالان. د داخوویانیێن به‌رپرسێن قه‌ندیل و ڕاگەهاندن و نرخاندنێن د مه‌دیایا پەکەکێ دا ڤێ یه‌کێ ب ئاوایه‌کی ئیشاره‌ت دکه.
ژ به‌ری چه‌ند ڕۆژان هودا پارێ ل دیاربه‌کرێ کۆمخه‌باته‌ک ژ بۆ پرسا کورد ل دارخست. گه‌له‌ک سیاسه‌تمه‌دار ژ پارتیێن جودا و گه‌له‌ک ڕه‌وشه‌نبر و سیاسه‌تمه‌دار ته‌ڤلی ڤێ کۆمخه‌باتێ بوون و د ده‌ربارێ پرسا کورد ل ترکیێ و باکورێ کوردستانێ دا دیتنێن خوه گۆتن. لێ شێورمه‌نده‌کی یێ سه‌رۆکۆمار ئه‌ردۆگان د ده‌ربارێ ڤێ کۆمخه‌باتێ دا داخوویانیه‌ک توند دا و ژ ئالیه‌کی ڤه هودا پار تاوانبار کر و ژ ئالیه‌ک دن ڤه د ده‌ربارێ پرسا کورد دا داخوویانیه‌ک نژادپه‌ره‌ستی دا. گه‌له‌ک ئالی ل هەمبه‌ر ڤێ هه‌لوه‌ستا شێورمه‌ندێ سه‌رۆککۆمار بێ ده‌نگ مان. سه‌ده‌مێ بێ ده‌نگیێ هودا پار و هه‌لوه‌ستا ل دژی هودا پارێ یه.
هودا پار پارتیه‌ک ئیسلامیه. ڤه‌کری دبێژن ئه‌ولی ئیسلامیه‌ت پشتره قه‌ومیه‌ت. ئه‌ڤ دیتنا وانه و گه‌ره‌ک مرۆڤ ڤێ یه‌کێ باش ببینه. هه‌لوه‌ستا وان یا ژ بۆ پرسا کورد گرینگه و گه‌ره‌ک ئه‌ڤ ئالیێ وان باش بێ نرخاندن. هودا پار دیتنێن خوه گه‌له‌ک ڤه‌کری دبێژه و د هه‌لوه‌ستێن خوه دا زه‌لالن.
ل ترکیێ و باکورێ کوردستانێ ، پرسا کورد نه د ته‌که‌لا پەکەکێ دا یه.ئڵ یێن کو پرسا کورد ل ترکیێ ب ته‌نێ ب پەكەكێ ڤه گرێددن دژمناتیا هه‌ری مه‌زن ل هەمبه‌ر مله‌تێ کورد دکن. ژ ده‌رێ پەکەکێ پارتیێن کورد هه‌نه، ده‌زگه‌هێن سڤیل یێن کوردا هه‌نه، ڕێخستنێن مرۆڤی هه‌نه و ژ هه‌موویێ گرێنگتر کورد ب خوه هه‌نه کو، چو جارا ڕێ نادن کو پەكەكە نوونه‌رتیا وان بکه. وه‌ک پارتیه‌ک سیاسی مافێ هودا پارێ یه کو، د پرسا کورد دا خوه وه‌ک موخاتابه‌کی ببینه و د ڤێ ده‌ربارێ دا هنده‌ک چه‌لاکیان بکه. ئه‌گه‌ر مرۆڤ هه‌لوه‌ستا وان د ده‌ربارێ پرسا کورد دا ، باش نه‌بینه بلا بێنه ڕه‌خنه‌کرن.
به‌رێ خوه بدەنێ شاندەیا ئیمرالێ ل ترکیێ هه‌موو پارتیێن د پارله‌مه‌نتۆیا ترکیێ دا دیتن و په‌یاما خوه گهەاندن وان، لێ هودا پار نه‌دیتن. گه‌لۆ که‌سه‌کی قه‌نج خراب ئه‌ڤ یه‌ک شرۆڤه کر..نا؟
هه‌ر ئالیه‌ک ل باکورێ کوردستانێ و ترکیێ، هه‌ولا ل خوه‌دیده‌رکه‌تنا پرسا کورد بکه و دیتنێن خوه ڤه‌کری بێژن و د ڤێ ده‌ربارێ ده چالاکیا ل داربێخه، گه‌ره‌ک باش بێ نرخاندن .
دوباره ئه‌ڤ پێڤاژۆیا ئیرۆ هاتی ده‌ستپێکرن، پێڤاژۆیا ده‌سژێبه‌ردانا چه‌کانه و ته‌سفیه‌کرنا پەکەکێ یه. نه پێڤاژۆیا چاره‌سه‌رکرنا پرسا کورد ل باکورێ کوردستانێ یه. لێ ئه‌م هه‌موو دزانن کو، سه‌رکه‌فتنا ڤێ پێڤاژۆیێ یانی ده‌سژێبه‌ردانا چه‌کان ژ بۆ کوردان گه‌له‌کی باشه.
ب کورتی دڤێ پەكەكە دەست ژ چه‌کان به‌رده و ڕێ بده کو، پێڤاژۆیا چاره‌سه‌ریا پرسا کورد ل ترکیێ و باکورێ کوردستانێ ب دیالۆگێ و مه‌تۆدێن ده‌مۆکراتیک هه‌ولا چاره‌سه‌ریێ بده.
19.02.2025
نێرین/شرۆڤه
