ڕۆژا یه‌کشه‌مێ ۱۳ ێ نیسانا ۲۰۲٥ێ سه‌رۆک مه‌سعود بارزانی به‌شداریا یه‌که‌مین کۆنفه‌رانسا ئافره‌تێن (ژنێن) کوردستانێ ل باژارێ هه‌ولێرێ کر. یه‌که‌مین جاره کۆنفه‌رانسه‌کا تایبه‌ت ب ژنان ل هه‌رێما کوردستان و ناڤچه‌یێ برێڤه‌دچه و تێدا هه‌ژماره‌کا به‌ر ب چاڤ ژ ژنێن کوردستانێ ل هه‌موو چینان ئاماده دبن. ئه‌ڤ کۆنفه‌رانس دو ڕۆژان به‌رده‌وام دبه و ل ده‌ستپێکا کۆنفه‌رانسێ دا سه‌رۆک مه‌سعود بارزانی گۆتاره‌ک پێشکێش کر.
ل گۆتارێ دا، سه‌رۆک بارزانی، بالکشاند ل سه‌ر ڕۆلا ژنان ل شۆره‌شێن گه‌لێ کورد و په‌روه‌رده کرنا پێشمه‌رگه وه‌کی دایک و مامۆستا و ته‌که‌ز ل وێ یه‌کێ کر کو پێویسته ژن د هه‌موو واره‌کی دا ئه‌و ده‌رفه‌ته پێ بێ دایین کو ڕۆلا خوه ببینه.
سه‌رۆک بارزانی برێڤه‌برنا کۆنفه‌رانسا ژنان ب چالاکیه‌کا گرنگ دا زانین و ژ بلی بالکشاندنا ب دروشمێ کۆنفه‌رانسێ ئه‌و یەک ژی بەچاڤ کر و گۆت: هوون ب شیانێن خوه پاشه‌رۆژێ ئاڤا بکن و ئه‌م ژی پشته‌ڤانێن وه نه.
سه‌رۆک بارزانی د گۆتارا خوە دا بیرانینا شه‌هیدێن ئه‌نفالێ ژی کر و سلاڤ ژ بۆ گیانێ پاکێ وان دایکێن شه‌هیدان کر کو ب زارۆک و گه‌ده‌یێن خوه هاتن ئه‌نفال و شه‌هید کرن.
ناڤه‌رۆکا گۆتارا سه‌رۆک بارزانی ل یه‌که‌مین کۆنفه‌رانسا ژنێن کوردستانێ ل باژارێ هه‌ولێرێ:
ب ناڤێ خوه‌دایێ مه‌زن و دلۆڤان
خووشک و که‌چێن برێز!
ئاماده‌بوویێن برێز!
گه‌له‌ک خوه‌شحالم کو ئیرۆ ب وه را د یه‌که‌م کۆنفه‌رانسا ب ڤی ئاوایی دا به‌شدار دبم. هێڤیدارم کو ئه‌نجامێن وێ ژی ل ئاستا وێ پێشبینیێ بن کو مه هه‌موویان پێشبینی کریه و ئه‌ڤه ده‌ستپێکه‌ک بە ژ بۆ پشتی نها، ئه‌ز باوه‌ر دکەم کو ئه‌ڤه چالاکیه‌ک گه‌له‌ک گه‌له‌ک د جهێ خوه دایه و ب هێڤیا خوه‌دێ سه‌رکه‌فتی دبه.
دبه کو ئەڤ گۆتن دووباره ژی بە لێ به‌لێ پێویسته مرۆڤ ببێژه، ئه‌ز جاره‌کا دن ژی دبێژم کو ڕۆلا ژنا کورد قه‌ت ژ ڕۆلا زلامان کێمتر نه‌بوویه، ئه‌گه‌ر هنده‌ک جار زێده‌تر ژی نه‌بوو بە. ل شۆره‌شا ئیلۆنێ، ل شۆره‌شا گولان، ل شه‌رێ داعیش، ڕۆله‌کا گه‌له‌ک گه‌له‌ک به‌ر ب چاڤ هه‌بوویه، ب تایبه‌تی ل شۆره‌شا گولانێ، دایک بوو، مامۆستا بوو، جۆتکار بوو، هه‌ر وه‌کی من ل گۆتارا خوه دا بهیست کو نزانم ب چ هه‌لکه‌فته‌کێ بوویه، لێ به‌لێ ب راستی وها یه. ئێدی دڤیا به‌ری کو دنیا ڕۆناک ببە زارۆکێن خوه ببن بن کەڤرەکی، بۆ بن شکه‌فته‌کێ ژ ترسا وێ یه‌کێ فرۆکه‌یان بۆمبه‌بارانا گوندێن وان نه‌که و چه‌ندین جار ژی وها بوویه کو دایکه‌ک ب زارۆکێ خوه ڤه شه‌هید بوون. نانێ پێشمه‌رگه، دیسا ل سه‌ر ژنا کورد بوو. ئه‌و پێشمه‌رگه‌یێ کو ل جه‌بهه بوو، پشتراست بوو کو دایک یان هەڤژینا وی، یان خووشکا وی چاڤ ل زارۆکێن خوه یه و نانێ وان ژی دیسا مسۆگه‌ره، ژ بۆ وێ یه‌کێ هه‌ر چ به‌حسا ژنا کورد بێ کرن، هه‌ر کێمه. ل شۆره‌شا گولانێ ژی هه‌مان تشت، میناک گه‌له‌کن، وه‌کی دایکا ئامینه، دایکا حه‌لیمه، دایکا عایشه. ل شه‌رێ داعیش ژی که‌چێن مه ئه‌وه‌نده وێره‌ک و ئازابوون کو جهێ شانازیێ بوون ژ بۆ مه. ل چه‌ندین جار ئه‌و ب خوه تووشی شه‌ر بوون، یان کو داعیش ئێریشی وان کر وان جیهێن وان کو ئه‌و لێ بوون، شه‌ره‌که زێده قه‌هره‌مانه کرن.
ئه‌ز گه‌له‌ک خوه‌شحالم کو دبینم هه‌ژماره‌کا زێده ژ ژنان، ل زانینگه‌ه، ل په‌یمانگه‌ه، ل گه‌له‌ک وارێن دن و ل گه‌له‌ک جهێن دن دا ژی وان ڕۆله‌که به‌ر ب چاڤ هه‌یه. پێویسته ل هه‌موو واران، ژنا کورد ڕۆلا خوه ببینه.
درووشما وه خوه‌شکه (ب شیانێن خوه پاشه‌رۆژێ ئاڤا دکین)، ئه‌ز ژی ژ وه را دبێژم ب شیانێن خوه ڤه پاشه‌رۆژێ ئاڤا بکن و ئه‌م ژی پشته‌ڤانێ وه نه.
ژ بۆ یه‌که‌مجار ل ئیراقێ کو ژنه‌ک هاته سێداره دان، ئه‌و ژی که‌چه‌کا کورد بوو کو بوو سه‌مبۆلا تێکۆشین و به‌رخوه‌دان و خوه نه‌چه‌ماندنێ. ئه‌و ژی له‌یلا قاسم بوو. چوونه جه‌م وێ و ژێ را گۆتن نامه‌یه‌ک بنڤیسه ژ بۆ ئه‌حمه‌د حه‌سه‌ن به‌کر، داخوازا لێبۆرینێ بکه، تو که‌چی و ژنی، وێ ل ته ببۆرن، گۆت هوون ژ وێ کێمترن ئه‌ز نامه‌یا لێبۆرینێ ژ بۆ وه بنڤیسم، ئه‌ز داخوازا لێبۆرینێ میڵه‌تێ خوه دکم.
میناک گه‌له‌ک گه‌له‌کن، میناکا ژنا کورد، ب راستی هه‌ر ئه‌و پێشمه‌رگه‌یێ قه‌هره‌مان ژی په‌روه‌رده‌یێ ده‌ستێ وان شێره ژنانه بوون، نها ژی ئه‌رکه‌ک گه‌له‌ک مه‌زن و گه‌له‌ک پیرۆز ل سه‌ر ملێن وه یه. په‌روه‌رده کرنا ئه‌ڤ نفشا نوو، مخابن نه‌حه‌زێن گه‌لێ کوردستانێ گه‌له‌ک هه‌ول دان کو جوانێن مه ژ ڕێ دەرخن. ئینسان ئه‌گه‌ر وه‌فا ژ بۆ گه‌ل و نشتمانی نه‌بوو، بهایا خوه نامینه، سه‌رگه‌ردان دبه. ئه‌و شه‌رێ کو د وی واری دا ب مه را کرن، ژ ئالیێ من ڤه گه‌له‌ک گه‌له‌ک مه‌ترسیدارتر و مه‌زنتر بوو ژ شه‌رێ تانک و فرۆکه و هه‌ر وها کیمیایی و ئه‌نفالێ. ده‌ما جوانه‌ک هاته په‌روه‌رده کرن و مه‌زن بوو، هیچ وه‌فایا وی ژ بۆ ئاخا خوه نه‌بوو، به‌ر ب کووده‌رێ ڤه دچه؟ مرۆڤ ئه‌گه‌ر ئاخا خوه نه‌بوو، سه‌رگه‌ردانه، بێقیمه‌ته، که‌س قه‌درێ وی ژی نزانە. ئاخ ژی ئه‌گه‌ر میڵه‌ت ل سه‌ر نه‌بە، هیچ واته‌یه‌که خوه نامینه. ژ به‌ر وێ مرۆڤ و ئاخ پێکڤه هاتنه به‌ستن. ئه‌ز داخوازێ ژ وه دکم د هه‌موو واره‌ک دا ڕۆلا خوه ببینن، لێ به‌لێ د ڤی واری دا دڤێ خه‌باته‌کا گه‌له‌ک مه‌زن بکن، بچن ناڤ جڤاکێ، دایکان تێبگەهینن کو ئه‌ڤه مه‌ترسیه‌کا مه‌زنه ڕووبروویێ مه بوویه و مخابن هه‌تا ئاسته‌ک زێده ژی باندۆرا خوه ژی کربوو. نها باشتره. ئه‌م خوه‌شحالین کو مه دیت د ڤێ ده‌ما داوی دا هشیاریه‌ک نه‌ته‌وه‌یی ل سه‌ر ڕێیه‌کا ڕاست تێ دیتن، ل ئه‌ورووپا، ل ناڤ کوردستانێ. ئه‌ڤه جهێ خوه‌شحالیێ یه و هێڤیدارین ب هێڤیا خوه‌دێ ئه‌ڤه به‌رده‌وام بە و به‌ر ب زێده‌تر ژی بچه.
د ده‌ربارێ گرنگیا ژن و مافێ ژنان، ژ بۆ مه تشته‌ک گه‌له‌ک گه‌له‌ک پیرۆزه، ژ به‌ر کو به‌ری ۱۲۰ سالان، شێخێ شه‌هید، شێخێ مه‌زن شێخ ئه‌بدولسه‌لامێ بارزانی و پشتی وی ژی جه‌نابێ شێخ ئه‌حمه‌د، به‌رده‌وام بوون ل وێ یه‌کێ کو مافێ ژنان دڤێ پاراستی بە. ڕێز و ڕوومه‌تا ژنان دڤێ پاراستی بە. ئه‌ڤه یه‌ک ژ وان سه‌ده‌ما نه کو بارزان و ته‌ریقه‌یا بارزان گه‌له‌ک به‌ر ب پێشڤه چوو، ژ به‌ر کو ب چو ئاوایه‌کی ئه‌و هنده‌ک دابونه‌ریتێن کو به‌رێ هه‌بوون، مخابن نها ژی ل هنده‌ک جهان مایه، ب زۆرێ ب شوودانا که‌چان، ئه‌ڤه تشته‌که ژ تاوانێ زێده‌تره ب ڕایا من، دڤێ ب دلێ وان و دلخوازیا وان بە، که‌چ و کور. مه‌جال ب ژنان هاته دایین ڕۆلا خوه ببینه، ژنێ هه‌ست ب هه‌بوونا خوه کر. ژ بۆ وێ یه‌کێ ئه‌م سه‌ربلندن کو دبینین ئه‌و بنگه‌ه ۱۲۰ سال به‌رێ نها ل بارزان، ئه‌و مه‌سه‌له‌یا ڕێز گرتنا ل ژنان و ڕۆلا ژنان و گرینگیا ژنان هه‌ر ل وی ده‌می دا ل ور ئه‌و بنگه‌ها وێ هاتبوو دانین، ژ بۆ مه جهێ سه‌ربلندی و شانازیێ یه.
سبێ ڕۆژا ئه‌نفاله، ب سه‌دان و دکارم ببێژم ب هه‌زاران دایک ب زارۆکێن خوه ڤە ب زیندی هاتن بناخکرن. ئه‌م سلاڤ ژ بۆ گیانێ پاکێ وان هه‌موو شه‌هیدان و ب تایبه‌تی وان دایکێن کو ب زارۆکێن خوه ڤە ب زیندی هاتن بناخکرن را دشینن و ئه‌و چه‌ند گۆرێن ب کۆم کو هاتبوون دیتن، چه‌ندین جاران مه دیت کو دایک ب زارۆکێ خوه ڤە ب هه‌ڤ را هاتنه شه‌هید کرن.
گرنگ ئه‌وه کو دڤێ خه‌بات به‌رده‌وام بە، نابە خوه بچه‌مینین، دڤێ هه‌موو ده‌رگه‌هه‌ک و هه‌موو مه‌جاله‌ک ژ بۆ ژنان بێ ڤەکرن بۆ کو ب باشی ڕۆلا خوه ببینه، ئه‌ز پشتراستم کو دکارن ڕۆلا خوه ببینن.
ئه‌ز جاره‌که دن ژی ته‌که‌ز دکم، هوون درووشما خوه ب جی بکن، ئه‌م ژی ب هه‌موو شیانێن خوە ل پشتا وه نه.
ئه‌ز ناخوازم زێده‌تر ده‌ما وه بگرم، هێڤیا سه‌رکه‌فتنێ دکم ژ بۆ کۆنفه‌رانسا وه دخوام و سه‌رکه‌فتی بن.
گه‌له‌ک سپاس…
