ڕۆژا ۲۸ێ نیسانا ۲۰۲٥ێ درۆنه‌کا بۆمبه‌کری ل ئامێدیێ ئێرشی خاله‌که هێزێن پێشمه‌رگه کر و ژ ئەنجامێ وێ ئێریشێ ۳ پێشمه‌رگه بریندار بوون. هه‌روەسا ل رۆژا ۳۰ێ نیسانێ جاردن ل هه‌مان جهی ب درۆنه‌کا دن ئێرشی سەنگەرێ پێشمه‌رگه هات کرن و ۲ پێشمه‌رگه بریندار بوون.
ده‌ما ئێریشا ئه‌ول هاتی کرن، د هنده‌ک نرخاندنان دا و هه‌ر وه‌ها د به‌شه‌ک مه‌دیایێ دا هاته گۆتن کو، دبه ئه‌ڤ ئێریش ژ ئالیێ ترکیێ ڤه هاتبه کرن. لێ ئا‌شکه‌را بوو کو، ئه‌ڤ ئێریش ژ ئالیێ چه‌کدارێن پەکەکێ ڤه هاتیه کرن.
هێزا چه‌کدارێن پەکەکێ، هەپەگە، ب داخوویانیه‌کێ ڕاگەهاند کو، ئه‌ڤ ئێریش ژ ئالیێ وان ڤه هاتیه کرن. ئەگەرێ ئێریشێ ژی، بێی کو شه‌رمێ ژ خوه بکن، دبێژن کو؛ ”فه‌رمانداریا مه یا ل ڤێ قادێ ۲۸ و ۲۹ێ نیسانێ ب هه‌ساسیه‌تا کو ونداهی چێنه‌به، د ئاسته‌کا سڤک دا ژ بۆ هشیارکرنێ ده‌ستوه‌ردان کر”
وه‌ک تێ زانین نها هه‌رکه‌س ل بەندێ یە کو، پەکەکە به‌رسڤا بانگا ئۆجەلان بدە، پەکەکە کۆنگره‌یا خوه بکە و دەست ژ چه‌کا به‌ردە و خوه هلوەشینینە. لێ به‌شه‌ک ژ پەکەکێ، ئا‌شکه‌ره نه‌بێژن ژی، ل دژێ ڤێ پێڤاژۆیێنه و ئه‌و ژ بۆ گوه نه‌دن بانگا سه‌رۆکێ خوه هێجه‌تا ددن پێش. ئێریشا سەر هێزێن پێشمه‌رگه نیشانا ڤێ یه‌کێ یه کو، پەکەکە، یان ژی ئه‌ڤ ئالیێ د ناڤا پەکەکێ دا هه‌ولدده هەر وەک گەفەک ل سه‌ر ده‌ستکه‌فتیێن کوردستانێ بمینە.
ئامێدییێ نه قادا وه‌یه، هه‌تا هون ب سیخووریا پاسدارێن ئیرانێ بکن و ل دژێ ده‌ستکه‌فتیێن کوردا ته‌ڤبگه‌رن، هونێ وه‌ک ڕێخستنه‌ک ته‌رۆریست بێنه ب ناڤکرن. ئێدی کورد ژی وه‌ک به‌رێ ل وه نانێرن و دێ وه ب هه‌موو ئاوایان مه‌حکوم بکن.
هه‌ر ئالیه‌ک کوردستانی، د ناڤ دا هنده‌ک پێکهاتێن پەکەکێ ژی، گه‌ره‌ک ڤێ ئێریشا قرێژ شه‌رمه‌زار بکن وب ده‌نگه‌ک بلند ڤێ یه‌کێ بدن خوویاکرن. هه‌ر که‌س یان ژی ئالیێ بانگا ئۆجەلان ب ئه‌رێنی دنرخینه ، دڤێ ل دژێ ڤی بوویه‌را پرۆڤاکاتۆر ده‌نگێ خوه بلند بکه.
ئه‌ڤ ئێریش ئا‌شکه‌ره دکه کو، ئارمانجا چه‌کدارێن پەکەکێ ب ته‌نێ تێکبرنا ڕه‌وشا ئارام یا هه‌رێما کوردستانێ یه. ئەگەرەک ژی یێ پرۆڤاکاسیۆنێ ئه‌وه کو، ده‌ستهلاتا هه‌رێما کوردستانێ و تایبه‌تی سه‌رۆک بارزانی و سه‌رۆکێ هه‌رێما کوردستانێ د ڤێ پێڤاژۆیا ل ڕۆژاڤایێ کوردستانێ دا ده‌ستپێکری ڕۆله‌ک سه‌ره‌که دله‌یزن. هه‌روه‌سا ئه‌و پشتگریێ ددن بانگا ئۆجەلان و ژ پەکەکێ ژی داخوازکرن کو پابه‌ندێ بانگا ئۆجەلان بە.
لێ هێشتا سیخوورێن وه‌لاتێن داگیرکەر هه‌ولددن ب پرۆڤاکاسیۆنان پێڤاژۆیێ تێکببن. به‌ری ده‌مه‌کی د کاناله‌ک ته‌له‌ڤزیۆنا ترکان دا گه‌نه‌راله‌ک خانه‌شین و ئه‌ندامێ پارتییا نشتمان (پارتیا کو دۆگو په‌رنجه‌ک سه‌رۆکاتیێ دکه) د نرخاندنه‌کا خوه دا ڤه‌کری گۆت: ” چیه دبێژن بلا پەکەکە دهدەست ژ چه‌کان به‌ردە و خوه هلوەشینە. ئه‌گه‌ر پەکەکە نه‌مینه دێ چو ئەگەرەک ژ بۆ ئارتێشا ترکیه‌ئێ نه‌مینه کو ئێریشا باکورێ ئیراقێ و باکورێ سوریهیێ بکه.”
ئه‌ڤ چه‌کدارێن کو ئێریشا هێزا پێشمه‌رگه کرین، پرۆڤاکاتۆرن و هه‌ولددن ب بریارا ده‌زگه‌هێن ده‌وله‌تێن داگیرکه‌ر پێڤاژۆیا ده‌ستپێکری بخەتمینن .
٣ گولان ۲۰۲٥
نێرین/شرۆڤه
