پارتیا کارکه‌رێن کوردستانێ (پەکەکە) بریارێن کۆنگره‌یا خوە یا ۱۲ئان کو، ل ٥-٧ێ ڤێ مەهێ ئەنجام دابوو، ئیرۆ ١١\٥\٢٠٢٥ێ ب داخویانییەکێ ئاشکه‌ره کرن.
ل گۆر داخویانییێ پەکەکێ بریاراخوەهلوەشاندنێ و چەکدانینێ دایە.
سه‌رۆکێ هه‌رێما کوردستانێ نێچیرڤان بارزانی ل سه‌ر بریارا خوەهلوەشاندن و چه‌کدانینا پەکەکێ په‌یامه‌ک به‌لاڤ کر.
نێچیرڤان بارزانی د په‌یاما خوه‌دا دبێژە:
“ئه‌م پێشوازییێ ل بریارا پەکەکێ یا خوەهلوەشاندن و دانینا چه‌کان و گوهدانا بانگا برێز ئۆجەلان دکن و وێ وه‌کی گاڤه‌کا چاره‌نووساز دبینن کو ڕووپه‌له‌ک نوو ل هه‌رێمێ ڤه‌دکه.
ئه‌ڤ گاڤ نیشانا پێگەهشتنا سیاسی یه و ڕێ ژ دیالۆگه‌کا ڕاستین را ڤه‌دکه کو بهه‌ڤره‌ژیانێ و ئارامیێ ل ترکیێ و سه‌رانسه‌رێ هه‌رێمێ خورت دکه.
نها ده‌ما وێ یه‌کێ یە و چاڤێن هه‌موویان لێ یه کو ئه‌ڤ گاڤا گرنگ ب گاڤێن دن یێن ئه‌رێنی و پێویست ژ ئالیێ هه‌موو ئالیێن تێکلدار ڤە بێ به‌رسڤدان.
ئه‌ڤ زه‌مینه‌یه‌ک ڕاست و دروست تینه هۆلێ و دبه بنگه‌ها ئاشتیه‌کا مایینده و ته‌ڤاهی کو داویێ ل ده‌هان سالێن توندی، ئێش و ژانان تینه و هه‌رێمێ به‌ر ب ئاسۆیه‌کا نوو یا بپێشکه‌تنێ ڤه دبه.
ته‌ڤی پێزانین و سپاسداریا ژ بۆ ڕۆلا سه‌رۆک ئه‌ردۆگان یا پشتگریکرن و هه‌ولێن وی یێن ژ بۆ سه‌رخستنا ڤێ پێڤاژۆیێ، ئه‌م دوباره دکن کو هه‌رێما کوردستانێ وه‌کی هه‌ر تم پشتگریا هه‌موو هه‌ولێن ژ بۆ چاره‌سه‌رکرنا ناکۆکیان ب ئاوایه‌کی ئاشتیانه دکه و ئه‌م هێڤیدارن کو ئه‌ڤ ده‌ستپێشخه‌ری ببه خالا گوهه‌رتنه‌كا یه‌کجاری.
هه‌ر وها ئه‌م هه‌موو ئاماده‌بوونا خوه دیار دکن ژ بۆ به‌رده‌وامیا پێشکێشکرنا هه‌موو ئاوایێن ئالیکاری و هه‌ڤکاریێ ژ بۆنا سه‌رکه‌فتنا ڤێ ده‌رفه‌تا دیرۆکی.”
