شێورمه‌ندێ به‌رێ یێ ئه‌وله‌کاریا نه‌ته‌وه‌یی یێ ئامه‌ریکایێ جۆن بۆلتۆن ئێریشی سه‌رۆک دۆنالد ترەمپ کر، ستراته‌ژیا وی یا ل هه‌مبه‌ر ئیرانێ ب گومان ب ناڤ کر و ئه‌و ب وێ یه‌کێ تاوانبار کر کو ل شوونا کو سیاسه‌ته‌ک ڕه‌ئالیست ل ڕۆژهلاتا ناڤین دەست پێ بکە، ل په‌ی به‌رژه‌وه‌ندیا خوە یا کەسی دچه.
بۆلتۆن پشتگری دا ئێریشێن ئاسمانی یێن داوی یێن ده‌وله‌تێن یه‌کبوویی یێن ئامه‌ریکایێ کو سێ وێستگەهێن نوکله‌ری یێن ئیرانێ ئارمانج گرتن، لێ دیار کر کو مەخسەدا ترەمپ “ژ پلانسازیەکا ستراته‌ژیک، بێتر ژ به‌ر هه‌وه‌سا تاکه‌که‌سی نه”.
بۆلتۆن ب حەنەکی گۆت، “وسا خویا دکه کو ترەمپ ل دووڤ خه‌لاتا ئاشتیێ یا نۆبه‌لێ یه. وی هه‌ول دا کو ب ڕێیا ڕۆلا خوه یا قاشۆ د شه‌رێ ڕووسیا-ئوکراینایێ دا وێ ب دەست بخە، لێ ب سه‌ر نه‌که‌ت، نها ئه‌و لێدخەبتە کو ب ڕێیا شەرێ دژی ئیرانێ ده‌رفه‌ته‌ک نوو ببینه.”
ئه‌ڤ گۆتنێن بۆلتۆن د ده‌مه‌کێ دا تێن کو د ناڤ پارتییا کۆماری دا هه‌ول تێ دایین کو ترەمپ ژ بۆ خه‌لاتا نۆبه‌لێ به‌ربژێر بکن
بۆلتۆن، کو ب هه‌لوه‌ستا خوه یا توند یا ل هه‌مبه‌ر ئیرانێ و دژبه‌ریا خوه یا ئا‌شکه‌ره یا ل هه‌مبه‌ر په‌یمانا ناڤۆکی یا کو د سه‌رده‌ما سه‌رۆکێ به‌رێ باراک ئۆباما دا هاتبوو ئیمزاکرن تێ ناسین، ئیحتیمالا سه‌رکه‌فتنا ترەمپ د دانووستاندنێن ب ته‌هرانێ را ڕه‌د کر.
وی گۆت کو، دانووستاندن ب ئیرانێ را نە هێسانە و ئیران جهێ باوەریێ نینە و گۆت: ئه‌م به‌حسا ڕه‌ژیمه‌ک ئیده‌ئۆلۆژیک ئا توندره‌و دکن کو ب زهنیه‌ته‌ک کارسازیێ تو ناکاری دانووستاندنان دگەل بکی.”
بۆلتۆن پتر پداچوو، ڕه‌ژیما ئیرانێ وه‌کی “کۆئالیسیۆنه‌ک توندره‌وێن ئۆلی یێن کو د سه‌رده‌ما ناڤین دا ئاسێ مانه” ب ناڤ کر، و ئیدا کر کو هه‌ر دانووستاندنه‌ک ناڤۆکی یا پاشه‌رۆژێ دێ “بێکێر و بێواته” به.
