پشتی بانگا سه‌رۆکێ مەهەپێ ژ بۆ ئۆجەلان و به‌رسڤا ئۆجەلان بۆ بانگا باخچه‌لی، ل ترکیێ و کوردستانێ پێڤاژۆیه‌ک نوو هاته ده‌ستپێکرن. ده‌وله‌تا ترک ژ بۆ پێڤاژۆیێ گه‌له‌ک ڤه‌کری دبێژه کو، ئه‌ڤ پرۆژه‌یا ” ترکیا بێ ته‌رۆره”. وه‌ک دن کی چ ناڤی ل ڤێ پێڤاژۆیێ دکه نه گه‌له‌کی گرینگه. سه‌رۆککۆمارێ ترکیێ و به‌رپرسێن ده‌وله‌تێ گه‌له‌ک ب زه‌لالی دبێژن کو، د ده‌ستپێکا ڤێ پرۆژه‌یێ دا را چو بازار ب چو کەس و ئالیان را نه‌هاتیه کرن. یانی ئه‌ڤ یه‌ک تێ واته‌یا ده‌وله‌تێ پرۆژه‌یا خوه چێکریه و هه‌موو ڕوودان ل گۆرا ڤێ پرۆژه‌یێ پێکتێن.
نها یاکو، کورد وه‌ک ئالیێن سیاسی، سیاسه‌تمه‌دار و که‌سایه‌تێن دن گۆتوبووژ بکن، نرخاندنا ڤێ پرۆژه‌یێ یه. گازند یان ژی ڕه‌خنه‌کرنا پەکەکێ ئێدی نه خوه‌دی نرخه‌ک گه‌له‌کی تایبه‌ته. ژ به‌ر کو، ئه‌م هه‌موو دزانن کو، ڕۆژا ڕۆژ هه‌تا وه‌ک ڤێ گاڤێ، تایبه‌تی ل باکورێ کوردستانێ، هه‌لوه‌ستا ئالیێن سیاسی و سیاسه‌تمه‌دارێن کورد ل هەمبه‌ر پەکەکێ چه‌وهابوو. پەکەکێ چارچۆڤه‌یه‌ک دانیبوو، مخابن پرانیا ئالیێن سیاسی و سیاسه‌تمه‌دارێن کورد د وێ چارچۆڤه‌یێ دا جار بجارا هنده‌ک ڕه‌خنه دکران. لێ مخابن هژمارا که‌سایه‌تێن ب زه‌لالی سیاسه‌تا پەکەکێ ڕه‌خنه دکران و هه‌ولددان ڕاستیا پەکەکێ ده‌ینن هۆلێ، وه‌ک تلیێن ده‌ستا بوون.
ئه‌گه‌ر ئارشیڤ و نڤیساندن و شرۆڤه‌یێن د ده‌ربارێ پەکەکێ دا هاتین کرن به‌ر ب چاڤ را بێن ده‌رباس کرن هه‌رتشت ڤه‌کری دێ خوویاببه. ڤێجا نه هه‌وجه‌یه ، ئیرۆ مرۆڤ ڤێ بابه‌تێ بکه مژاره‌کا گۆتوبێژێ. کی چبه و کی چ کربه ڕاستیا خوه دزانه.
پێڤاژۆیا کو ئیرۆ که‌تی د ڕۆژه‌ڤا ترکیێ و کوردستانێ دا، وه‌ک کو ده‌وله‌تا ترک دبێژه ”پێڤاژۆیا ترکیا بێ ته‌رۆر”ە. ل گۆرا ڤێ پێڤاژۆیێ ئەبدولا ئۆجەلان بانگا ل پەکەکێ کر و ۳ تشت ژێ داخوازکر:
ئۆجالان گۆت: هون دێ چەکێ خوە ددەینن، پەککەێ هلوەشینن و به‌حسا سه‌رخوه‌بوونێ، فه‌ده‌راسیۆنێ، خوه‌سه‌ریێ ژ بۆ کوردا نه‌کر. هون دێ سیاسه‌ته‌کا ”ترکیه یا ده‌مۆکراتک” بکن.
پەکەکێ به‌رسڤا بانگا ئۆجەلان دا و خوه هلوەشاند، چەکدانان و نها ژی خوه ژ بۆ سیاسه‌تا ”ترکیه‌یا ده‌مۆکراتیک” ل گه‌ل ئاک پارتیێ و مەهەپێ ئاماده دکه و د ناڤا هه‌ولدانا دا یه.
د ڤێ پێڤاژۆیێ دا هلوەشاندنا پەکەکێ ودانینا چەکان ژ بۆ ته‌ڤگه‌را ئازادخوازا کوردستانێ گه‌له‌ک باشه و ژ بۆ کوردا ده‌ستکه‌فتیه‌که. سها تڤەنگێ ل سه‌ر کوردان ڕابه دێ سیاسه‌تا ده‌مۆکراتک ب ڕێیا دیالۆگێ بێ ڕێڤه‌برن. ژ خوه ئه‌ڤه ب سالانه گه‌له‌ک که‌سان به‌هسا ڤێ سیاسه‌تێ دکرا. یانی ل شوونا چه‌کان دا سیاسه‌ته‌ک له‌گال، ب مه‌تۆدێن ده‌مۆکراتیک و ڕێیا دیالۆگێ بێ ڕێڤه‌برن د قۆناغا کو تێ ژیاندن دا ژ بۆ دۆزا کورد باشتره و دێ سه‌رکه‌فتیتربه.
ژ ئالیه‌ک دن ڤه پەکەکێ ب ڕێیا ئۆجەلان ڕاستیا خوه و نیه‌تا خوه و هه‌روه‌ها سیاسه‌تا خوه ڤه‌کری ژ ڕایا گشتی یا کوردستانێ و جهانێ را داخوویاکرن. ئێدی چو پێوه‌ندیا ڤێ ڕێخستنا کو خوه‌هلوەشاندی ب پرسا کورد را نه‌مایه. د ڕێیا ته‌ڤگه‌را کوردستانی دا، ئاسته‌نگا شه‌رێ بێ واته و سیاسه‌تا پەکەکێ ڕابوویه. یا کو ژ بۆ کوردا گه‌له‌ک گرینگ ئه‌ڤه.
من ڕۆژا ڕۆژ دا د گه‌له‌ک نڤیس و هه‌ڤپه‌یڤینان دا دایه خوویاکرن کو؛ هه‌تا خه‌له‌کا زنجیرا پەکەکێ نه‌یێ شکێناندن کورد پێشیا خوه نابینن. ئیرۆ پەکەکێ ب خوه ئه‌ڤ خه‌له‌ک شکێناندیه و ئێدی کورد ژی دکارن سیاستێ ب مه‌تۆدێن ده‌مۆکراتیک و ڕێیا دیالۆگێ ب کاربینن. ڕێ ڤه‌کریه. که‌نگی ئاسته‌نگ د ڤێ ڕێیێ دا په‌یدا ببه گه‌ره‌ک ب درووستی و زه‌لالی ئه‌و وان ئاسته‌نگان بنرخینن و ڕاستیێ بێژن.
کورد دێ هه‌ر ده‌می به‌حسا مافێن خوه یێن ڕه‌وا بکن. مافێ ده‌وله‌تبوونێ مافەک گه‌له‌ک خوه‌زایی یێ کوردانه. ڤێجا مه‌رجێن ده‌وله‌تبوونێ چه‌وا تێ نرخاندن ئه‌و بابه‌ته‌ک تایبه‌ت، به‌رفره و ب سه‌رێ خوه یه.
د ڤێ پێڤاژۆیا ده‌ستپێکری دا، ئۆجەلان و خەلکێ ل دووڤ، دێ هه‌ول بدن کوردا د ناڤ ترکان ئه‌نته‌گره بکن، بحەلینن. یانی ئالیه‌ک یێ ڤێ سیاسه‌تێ ل باکورێ وه‌لێت ئارمانجا حه‌لاندنا کوردان د ناڤا ترکیێ دا یه. کێماسی ئه‌ڤ هه‌تا وه‌ک ڤێ گاڤێ ب ڤی ئاوایی دخوه‌یێ. بێ گومان سیاسه‌تەک ل سه‌ر خه‌ته‌ک نه‌ته‌وی و کوردستانی بێ ڕێڤه‌برن دێ ژ ڤان هه‌ولدانان را ببه ئاسته‌نگ.
باندۆرا پرۆژه‌یا ترکیێ دێ ل به‌شێن دن یێن کوردستانێ ژی هه‌بە. ژ سالا ۲۰۲۲ێ ڤه ئه‌ڤ پرۆژه‌یە هاتیه پلانکرن و ئیرۆ که‌تیه ڕۆژه‌ڤێ دا. پەکەکە ل ترکیێ گه‌له‌ک ئالۆز ببوو. چه‌کدارێن پەکەکێ ئێدی ل سه‌ر هه‌رێما کوردستانێ ببوون ته‌هدیدا هه‌ری مه‌زن. بێچه‌ککرنا پەکەکێ دێ ببه سه‌ده‌مێ ڕه‌وشه‌ک ئارامتر ل هه‌رێما کوردستانێ. سه‌ده‌مێ بنگه‌هین یێ ڕۆلا سه‌رۆکێ هه‌رێما کوردستانێ ئه‌ڤ بوو. هه‌روه‌ها ڕۆلێ سه‌رۆکێ هه‌رێما کوردستانێ نێچیرڤان بارزانی و ڕۆلێ سه‌رۆک بارزانی، ب بێدەنگکرنا چه‌کان و بداویکرنا شه‌رێ بێ واته دا سه‌ره‌کی بوو. ممکنه هنده‌ک ڤێ گاڤێ ڕه‌خنه بکن، لێ دێ پاشه‌رۆژ گرنگیا ڕۆلا وان نیشا مه ته‌ڤا بدە.
ب باوەریا من د ڤێ پێڤاژۆیا نووژه‌ن دا، دێ سیاسه‌تێن نوو د ته‌ڤگه‌را ئازادخوازا کوردستانی دا بێنه ئاڤاکرن، دێ هه‌لوه‌ستێن جودا بێنه ڕۆژه‌ڤێ. تشتا بێ کرن بلا ب ته‌نێ ژ بۆ وه‌لات و نه‌ته‌وه به. بلا ئه‌ڤ ببه بنگه‌هێ سیاسه‌تێ، بلا ڕکنێن ئاڤاهیێن نوو ل سه‌ر ڤێ بنگه‌هێ بێنه دانین. پشتی ڤێ هه‌رتشته‌ک هه‌سانیتر و پتر به‌ر ب ئارمانجێن جهبجهکرنا داخوازیێن مله‌تێ کورد ببه…
