ئیرۆ سالڤه‌گه‌را شۆره‌شا ئیلۆنا پیرۆزه. بێ گومان سالانه ب مناسه‌به‌تا سالڤه‌گه‌را شۆره‌شا ئیلۆنێ گه‌له‌ک نڤیس و گۆتار تێنه نڤیساندن و گه‌له‌ک نرخاندنێن جودا ل سەر ڤێ شۆرەشێ تێنه کرن. گه‌له‌ک جاران هنده‌ک ئالیێن سیاسی یێن کورد قه‌ت به‌حسا ڤێ شۆره‌شا کو، د دیرۆکا ته‌ڤگه‌را ئازادخوازا کوردستانێ دا گه‌له‌ک گرینگە، ناکن و نابینن. هه‌تا ل گۆرا ڤان ئالیان ئه‌ڤ شۆره‌ش نه‌بوویه.
ئه‌م به‌حسا چه‌ند خالێن گرینگ یێن شۆره‌شا ئیلۆنێ بکن کو، ئیرۆ ژی دکاره ڕاستیا ته‌ڤگه‌را کورد ده‌رێخه هۆلێ و بهێله ئه‌م پتر پێشیا خوه ببینن. ژ به‌ری هه‌ر تشته‌کی شۆره‌شا ئیلۆنێ هه‌تا سالا ۱۹۹۲ێ ژی ته‌نێ ژ ئالیێ سیه‌سه‌ته‌کی ڤه دهاتا نرخاندن و بیرانین. پرانیا ئالیێن کورد ل به‌شێن دن یێن کوردستانێ، ئه‌ڤ شۆره‌ش، ناڤه‌رۆک و گرنگیا وێ نه‌دیدیتان و هه‌تا ڕاده‌یه‌کی ب ئاوایه‌ک خراب دنرخاندن.
بێگومان، ئەڤ شۆرەش، ته‌نێ ل ڕۆژاڤایێ کوردستانێ و باکورێ کوردستانێ ژ ئالیێن پارتیێن ده‌مۆکرتا کوردستانێ ل وان به‌شان دهاتا ب بیرانین.
هه‌تا به‌شه‌ک ژ ڤان ئالیێن سیاسی ئه‌ڤ شۆرەش وەکی شۆره‌ش قه‌بوول نه‌دکران. پشتی سالا ۱۹۹۱ێ کو، کوردستانا باشوور که‌ته د بن ده‌ستهلاتا کوردان دا و تایبه‌تی گرانیا پەدەکێ هێدی هێدی خوه دا خوویاکرن، ڤێ یه‌کێ گه‌له‌ک تشت گوهه‌رتن و خه‌لکه‌کی ده‌ستپێکر ب ئاوایه‌ک ئه‌رێنی بەحسا شۆره‌شێ ئیلۆنێ بکن. ئه‌ڤ خه‌لکێ هانێ دەست ژ ناڤه‌رۆکا شۆره‌شێ به‌ردان ب ته‌نێ وه‌سفێ وێ ب شه‌کلی دان.
یانی چ حکمه‌ت به، ئه‌و ئالیێن کو هه‌یینا شۆره‌شا ئیلۆنێ قه‌بول نه‌دکاران، ده‌ستپێ کرن وه‌سفێ وێ دان. بێ گومان دیتنا خه‌لکه‌کی یا ڕاستیێ جهێ دلخوه‌شیێ یه، لێ هه‌ر ده‌می دڤێ نرخاندنێن ڤی جوره‌یێ خه‌لکێ ب گه‌له‌ک ب بالکێشی بێته خوه‌ندن.
ژ ئالیه‌ک دن دڤێ ئه‌م ڕێبازا کو شۆره‌شا ئیلۆنێ کری د ڕۆژه‌ڤا سیاسی یا کوردستانێ دا، باش بزانن و کووراهیا وێ تێبگەهن. ئه‌ڤ یه‌ک گه‌له‌ک گرێنگه، ژ بۆ پێڤاژۆیا کو ئه‌م تێرا ده‌رباس دبن، دڤێ ئه‌م هه‌ر ده‌می ده‌رباسبوویا خوه یا سیاسی باش بزانبن و ل گۆرا وێ ژی سیاسه‌تا خوه یا پێشه‌رۆژێ ب هه‌موو ئاوایی دا ته‌سبیت بکن.
ئه‌گه‌ر د سیاسه‌تێ دا ئالیه‌ک بێ پره‌نسب و په‌رسپه‌کتیڤه‌ک سیاسی به گه‌له‌ک زه‌همه‌ته کو مرۆڤ بوویه‌ران ژ هه‌ڤ ده‌رێخه و ب زه‌لالی پێشیا خوه ببینه.
شۆره‌شا ئیلۆنێ یه‌که‌م شۆره‌شا نه‌ته‌وی بوو د دیرۆکا سیاسی یا کوردستانێ دا، بێ گومان ژ به‌ری ڤێ شۆره‌شێ گه‌له‌ک سه‌رهلدانێن نه‌ته‌وی پێکهاتنه و کوردا ژ بۆ کورده‌یاتیێ ڕاپه‌رین و سه‌رهلدان کرنه، لێ شۆره‌شا ئیلۆنێ شۆره‌شه‌ک نه‌ته‌وی و ل ته‌ڤاهیا کوردستانێ باندۆرا خوه کریه و ب ده‌ستپێکا ڤێ شۆره‌شێ ژی یه‌کتیه‌ک نه‌ته‌وی د ناڤا کوردان ده پێکانیه.
ئه‌گه‌ر د ڤێ قۆناخا کو ته‌ڤگه‌را ئازادخوازا کورد تێره ده‌رباس دبه و گه‌له‌ک ئالی به‌حسا یه‌کتیه‌ک نه‌ته‌وی دکن، دڤێ پێڤاژۆ شۆره‌شا ئیلۆنێ دا چاوه ژ ئالیێ سه‌رۆکێ نه‌مر بارزانی ڤه ئه‌ڤ یه‌کتیا نه‌ته‌وی هاتیه پێکانین، باش بێ نرخاندن و ل گۆرا وێ ژی گاڤ بێنه ئاڤێتن.
بێ گومان مه‌رجێن وێ ده‌مێ و یێ ئیرۆ جودانه، لێ هه‌ر گاڤه‌ک سیاسی خوه‌دییێ بنیاته‌ک دیرۆکیه کو ژ ڕێبازه‌کی تێ. ژ خوه د ناڤه‌رۆکا شۆره‌شا ئیلۆنێ دا ڕێبازا بارزانی هاتیه ئاڤاکرن و هه‌تا وه‌ک ڤێ گاڤێ باندۆرا خوه د ناڤا ته‌ڤگه‌را کوردستانێ دا دده خوویاکرن.
ژ خوه گەرانتییا خه‌تا نه‌ته‌وی د ڕۆژا مه دا، جاردن پاراستن و خوه‌دی لێ ده‌رکه‌تنا ڤێ ڕێبازا پیرۆزه.
د ده‌ستپێکا شۆره‌شێ هاتا کو سالا ۱۹۷۰ رێکەفتنا ۱۱ێ ئادارێ هاتی ئیمزه‌کرن، گه‌له‌ک پێڤاژۆیێ جودا هاتنه ژیاندن. ب ئاوایه‌کێ شۆره‌شێ ئاخا مری ل سه‌ر کوردان ئاڤێت و هه‌ستێن نه‌ته‌وی ڤه‌ژاندن و ب هێز کرن.
لێ مخابن ڤێ شۆره‌شێ گه‌له‌ک نه‌خوه‌شی و خیانه‌ت ژی دیتن. هه‌روه‌ها ئه‌ڤ شۆره‌ش گەهشت ئارمانجا خوه و رێکەفتنا ۱۱ێ ئادارێ سالا ۱۹۷۰ێ ل گه‌ل حکومه‌تا ئیراقێ ئیمزا کر. نه‌مر مسته‌فا بارزانی خه‌باتا خوه یا ب سالان ب ده‌ستپێکرنا شۆره‌شا ئیلۆنێ گەهاند ڕاده‌یا هه‌ری بلند.
شۆره‌شا ئیلۆنێ د سه‌رۆکاتیا سه‌رۆکێ نه‌ته‌وی دا وه‌ک شۆره‌شه‌ک نه‌ته‌وی ده‌ستپێکر و هه‌تا گەهشتی ئارمانجا خوه به‌رده‌وام بوو. ژ بۆ ڤێ یه‌کێ ژی گه‌له‌ک جارا سیاسه‌تا کو بارزانی یێ نه‌مر ڕێڤه‌بری، کار و خه‌باتا کری و هه‌تا ژیانا وی، ب خه‌باتا ده‌ستکه‌فتنا مافێن نه‌ته‌وی یێن کوردا را هاته گرێدان.
هێدی بارزانی، کورد و کوردستان بوو یه‌ک گۆتن. ئیرۆ ده‌ما مرۆڤ به‌حسا ڕێبازا بارزانی دکه، گه‌ره‌ک ب هه‌موو ئاوایی هوورگولیێن ڤێ شۆره‌شا پیرۆز ب کوورایی بنرخینه دا کو ڕاستیا هه‌یی بێ خوویاکرن و هه‌روه‌ها ئه‌ڤ ڕێبازا پیرۆز کو گارانتییا ده‌ستکه‌فتیێن نه‌ته‌وه‌یه‌کی یه باش بێ زانین و نڤشێن نوو تێبگەهن.
ده‌ستکه‌فتیێن ئیرۆ ل باشوورێ کوردستانێ هه‌یین، و خه‌باتا کو د ڤێ قۆناخێ دا ب سه‌رۆکاتیا پەدەکێ تێ کرن ئه‌نجاما شۆره‌شا ئیلۆنا پیرۆزه. دڤێ ئه‌ڤ باش بێ زانین و نه‌یێ ژ بیر کرن…
١١\٩\٢٠٢٥
نێرین/شرۆڤه
