ل سالا ١٩٦١ بارزانی یێ نەمر هەموو نەتەوە و ئاینێن کوردستانێ ل بن خیفەتا خوە یا مەزن خرڤەکرن و ب هشمەندی و عەدالەتا ریبازا خوە تەڤ تەخ وچین وئاین ونەتەوە ل سەر ئێک ئارمانج ئاراستەکرن کو، ئەوژی خەبات ژ بۆ رزگارییا کوردستانێ بوو.
یا من دڤێت بێژم ئەڤەیە:
ئێزدی، وەکو پشکەکا رەسەن ژگەلێ کورد، ب سەر ومال و گیان و ب مۆرالەک بلند تێکەلی ڤێ شۆرشێ بوون، چنکو بۆ وان ئەو شۆرەش دەروازەیا رزگاربونێ ژ دو ستەمان: ئێک، ژ ستەما ئاینی و یا دی ژی ژ ستەما یا نەتەوەیی بوو.
د وێ قۆناغێ دا رۆژ بۆ رۆژێ گیانێ پێکڤەژیانێ خورتردبوو، هەرچەندە ئەو چەمکە وەکی نۆکە د کۆڕ و سمیناران دا نەدهاتە گۆتن، بەلکو د قادا خەبات و بەرخوەدانێ دا ب کرداری دهاتە بجی ئینان.
هۆسا ل شۆرەشا گولانێ ژی کو، هەر درێژەپێدانا شۆەرشا ئیلونێ بوو، ئەو کاروانێ پێکڤەخەبات و پێکڤەقوربانیدانێ بەردەوام بوو بێی کو د کۆڕ و سمیناران دا بەحسێ پێکڤەژیانێ بهێتە کرن.
پشتی سەرهلدانێ کو، ١٠% یا ئێزدییا کەتنە بەر ئەو پشکا کوردستانێ یا رزگار کری، ئێدی وێ پشکا ئێزدییا خوە دیت دئازاد و سەرفراز ژ هەردوو ستەمێن ئاینی و نەتەوەی. لێ ئەو پشکا مەزن یا ئێزدیان یا کو، مایە ل بن دەسهەلاتا سەدامی ڤە، خۆزیک ب حال و رەوشا مە، یێن ل کوردستانا رزگارکری، دخواستن.
جەژنێن مە ژبلندترین ئاست دهاتنە پیرۆزکرن و بەشداریەکا مەزنا جەماوەری و حکومی وحزبی دهاتەکرن، هەتا کو شەڕێ خوەکوژیێ پەیدابوی و ئیسلاما سیاسی گەشەکری و بەرامبەری وان ژی بزاڤا سەلەفی بهێزبووی ل دەڤەرێ و ل کوردستانێ، ئێدی رۆژ بۆ رۆژێ ئەو گەنجێن نووپێگەهشتی، ئەوێن نە زولم وستەما داگیرکەرا دیتی و نەئەنفال و کیمیاباران دیتی، کەفتنە بن بانۆدۆرا وان و وەکی فریزی رەهێت خوە بەردانە خوارێ وبەلاڤەژی کرن. پشتی سیستەمێ سەقەتێ هەلبژارتنا، ئەوا دبێژنێ لیستا ڤەکری، هاتیە پەیرەوکرن ئێدی هەردو حزبێن مەزن، پارتی و ئێکەتی، بوونە پۆڕ د دەستێ ئاغا و مەلا و بازرگان و خوەدان کۆچک ودیوانان دا. ژ ترسا بەرزەکرنا دەنگدەران دوورکەفتن ژ بجهئینانا یاسایان هەتا بگەهێت وی رادەی خەلکەکێ بکێرنەهاتی هەبت هیچ حسابەکی نەبو حکومەتی بکەت و نەژی بۆ چ حزبا، ئها د رەوشەکا هۆسان دا تەرازوو بۆ ئالیێ دز و زالم و منافق وهەلپەرستان دا دشکێت. ئێزدی ژی د ڤێ هاوکێشێ دا ئالیێ لاوازن، ڤیجا هەزار گۆتار و سمینار و کۆنفرانسێن پێکڤەژیانێ ناگەهنە وێ روحا پێکڤەقوربانیدانا شۆرشێن ئیلون وگولانێ.
ئێزدی ژمێژە گەهشتینە وێ قەناعەتێ کو، هەر رۆژا پارتی و بارزانی ل سەر دەسەلاتێ نەمان ئێدی فەتوایەکا ڤی مەلای یان یێ هەنێ بەسە کو شانەیێن خەلیفەیێ بەغدایێ رابنە سەرخوە و ل دژی ئێزدیان فەرمانان راکەن.
ئەمێ ل هیڤیا هندێ هندەک ژ عەدالەتا بارازنی یێ نەمر، دبێژم هندەک چنکو هەموو هەرنابت، ڤەگەرینن و ئاشتییا جڤاکی یا کوردستانێ بهێز بکەن و ب یاسا و رێنمایی ئەڤ بەرەلاییا ل بن ناڤێ ئازادییا دەربرینێ رێکبێخن ب شیوەیەکی هەر تاکەک و پێکهاتەک هەست ب مەترسیێ نەکەت د ناڤ مالا خوەدا کو کوردستانە.
هەزار سلاڤ ل سەر گیانێ بارزانی یێ نەمر و تەڤ شەهیدێن شۆرەشا ئیلونێ.
ژ فێسبۆکێ: فەرەج میرزا
٢٠٢٥\٩\١١
