سه‌رۆکێ هه‌رێما کوردستانێ نێچیرڤان بارزانی، ئیرۆ (٨\١٠\٢٠٢٥) ب سه‌ردانه‌که فه‌رمی چوو ئه‌نقه‌ره‌یێ و ب هاکان فیدان و ڕه‌جه‌پ تەیییپ ئه‌ردۆگان را جڤیا.
د جڤینان دا، ژ نووڤه ده‌ستپێکرنا هنارده‌کرنا په‌ترۆلا هه‌رێما کوردستانێ، پێوه‌ندیێن دوئالی و ڕه‌وشا هه‌رێمی مژارێن سه‌ره‌کی بوون.
نێچیرڤان بارزانی سه‌رێ سبه‌هێ (٨\١٠\٢٠٢٥) گەهشت ئه‌نقه‌ره‌یێ و ده‌ستپێکێ ب وه‌زیرێ کارێن ده‌رڤه یێ ترکیه‌یێ هاکان فیدان را جڤیا.
پشتی نیڤرۆ ژی ل کۆشکا سه‌رۆککۆماریێ یا ترکیه‌یێ ب ڕه‌جه‌پ تەیییپ ئه‌ردۆگان را جڤیا و ڤێ جڤینا وان سەعەتەکێ ڤەکێشا.
بارزانی: مه هه‌ڤکاریا ستراته‌ژیک گۆتووبێژ کر
سه‌رۆکێ هه‌رێما کوردستانێ پشتی هه‌ڤدیتنا ب هاکان فیدان را ل سه‌ر تۆرا جڤاکی یا ئێکس گۆت: “مه ل گه‌ل وه‌زیرێ کارێن ده‌رڤه یێ ترکیه‌یێ هاکان فیدان گۆتووبێژ ل سه‌ر هه‌ڤاهه‌نگیا به‌رده‌وام یا د ناڤبه‌را ئیراق، هه‌رێما کوردستان و ترکیه‌یێ دا کر.”
وی هه‌روەسا دا زانین کو وان ته‌که‌زی ل سه‌ر گرنگیا هه‌ولێن هه‌رێمی یێن ژ بۆ هەڤکاری و هەڤئاهەبگیا ژ بۆ چاره‌سه‌رکرنا پرسێن خوەدی به‌رژه‌وه‌ندیێن هه‌ڤبه‌ش و بپێشخستنا سه‌قامگریێ ل سه‌رانسه‌رێ ناڤچه‌یێ کریه.
نێچیرڤان بارزانی پشتی هه‌ڤدیتنا ب ئه‌ردۆگان را و کێفخوه‌شیا خوە ل هەمبەر وێ هەڤدیتنێ دیار کر و گۆت: ” ئەڤ هەڤدیتن ده‌رفه‌ته‌ک د ده‌ما خوه دا بوو ژ بۆ کو ئه‌م نێرینێن خوه ل سه‌ر مژارێن هه‌رێمی و پێوه‌ندیێن ستراته‌ژیک یێن ئیراق و هه‌رێما کوردستانێ یێن ب ترکیه‌یێ را پارڤه بکن”.
مه هه‌ر وها به‌هسا ڕێیێن بهێزکرنا زێده‌تر ئا هه‌ڤکاریا خوه و بپێشخستنا ئاشتی، ئارامی و گه‌شه‌دانا هه‌رێمی کر.”
سه‌رۆکاتیا هه‌رێما کوردستانێ: ئه‌ردۆگان پشتگریا خوه دوباره کر
سه‌رۆکاتیا هه‌رێما کوردستانێ ده‌ربارێ جڤینان دا ل سەر مالپەرا خوە یا فەرمی داخویانیه‌ک به‌لاڤ کر و ڕاگەهاند کو هه‌ر دو ئالیان ته‌که‌زی ل سه‌ر خوه‌سته‌کا دوئالی یا ژ بۆ پێشخستنا پێوه‌ندیێن ترکیه‌یێ یێن ب ئیراق و هه‌رێما کوردستانێ را کریه.
شەرۆکاتیا هەرێما کوردستانێ د داخویانیا خوە دا دیار کر کو، د جڤینان دا مژارێن وه‌کی ڕه‌وشا گشتی یا ئیراقێ، پێڤاژۆیا سیاسی، هلبژارتنێن پارلامه‌نتۆیا ئیراقێ ڕه‌وشا ناڤخوه‌یی یا هه‌رێما کوردستانێ و پێشهاتێن سووریه‌یێ هاتنه گۆتووبێژکرن.
مژارا سه‌ره‌که یا جڤینان ژ نووڤه ده‌ستپێکرنا هنارده‌کرنا په‌ترۆلا هه‌رێما کوردستانێ بوو.
هه‌روەسا د داخویانیێ دا هات گۆتن: “هه‌ر دو ئالی ل سه‌ر وێ یه‌کێ هه‌ڤفکر بوون کو ئه‌ڤ پێڤاژۆ خزمه‌تا ئارامی و سه‌قامگیریا ئیراقێ دکه و د به‌رژه‌وه‌ندیا ئابۆریا ته‌ڤاهیا ئیراقێ ده یه.”
ل گۆری داخویانییا سەرۆکاتییا هەرێما کوردستانێ، ئه‌ردۆگان به‌رده‌وامیا پشتگری و پشته‌ڤانیا وه‌لاتێ خوه ژ بۆ ئیراق و هه‌رێما کوردستانێ دوباره کر.
ده‌ما سه‌ردانێ گرنگه
سه‌ردانا نێچیرڤان بارزانی د ده‌مه‌کێ دا یه کو گه‌له‌ک مژارێن گرنگ د ڕۆژه‌ڤێ دا نه.
یه‌ک ژ وان هلبژارتنێن پارلامه‌نتۆیا ئیراقێ یه کو دێ ۱۱ێ چریا پاشین دێ بێن کرن.
برێڤه‌برێ ناڤه‌ندا لێکۆلینان ئا ڕووداوێ، زریان ڕۆژهلاتی ل سه‌ر سەردانا نێچیرڤان بارزانی گۆت: “ژ بۆ ترکیه‌یێ گرنگه کو بزانه هه‌رێما کوردستانێ دێ پشتگریێ بده کێ ژ به‌ر کو ترکیه دخوازه سوودانی د پۆستا خوه ده بمینه.”
مژاره‌که دن ئا گرنگ ژ نووڤه ده‌ستپێکرنا هنارده‌کرنا په‌ترۆلێ یه.
ڕۆژهلاتی گۆت: “ترەمپ و ئه‌ردۆگان ل سه‌ر کێمکرنا وەرگرتنا گاز و په‌ترۆلا ڕووسیایێ ل هه‌ڤ کرنه، ژ به‌ر ڤێ یه‌کێ پێویستیا ترکیه‌یێ ب چاڤکانیێن ئالته‌رناتیف هه‌یه کو یه‌ک ژ وان هه‌رێما کوردستانێ یه.”
هه‌روەسا ئه‌ڤ سه‌ردان د ده‌مه‌کێ دا یه کو ل ترکیه‌یێ به‌حسا پێڤاژۆیا چاره‌سه‌ریێ تێ کرن.
سه‌رۆکێ ناڤه‌ندا ئۆرسامێ کادیر ته‌میز ژ ڕووداوێ را گۆت: “برێز نێچیرڤان بارزانی یه‌ک ژ سه‌رکرده‌یێن هه‌ری ب باندۆر ئێن هه‌رێمێ یه و ب تایبه‌تی د مژارا دانینا چه‌کان و خوەهلوەشاندناا پەکەکێ دا دکاره باندۆره‌که به‌ربچاڤ بکه.”
زریان ڕۆژهلاتی ئاماژه پێ کر کو سه‌رۆکێ هه‌رێما کوردستانێ د هێسانکرنا دان و ستاندنێن د ناڤبه‌را هەسەدە و ترکیه‌یێ دا ڕۆلا ناڤبه‌ینکاریێ لیستیه.
ئه‌ردۆگان: ئه‌م لهه‌ڤکرنا په‌ترۆلێ ب کێفخوه‌شی پێشوازی دکن
سه‌رۆکاتییا ڕاگەهاندنێ یا ترکیه‌یێ ژی ل سه‌ر جڤینێ داخویانیه‌ک به‌لاڤ کر.
ل گۆری داخویانیێ د هه‌ڤدیتنێ دا پێوه‌ندیێن ترکیێ، ئیراق و هه‌رێما کوردستانێ و پێشهاتێن هه‌رێمی هاتن نرخاندن.
مژارێن سه‌ره‌که: په‌ترۆل و ڕێیا پێشکه‌تنێ بوون
ئه‌ردۆگان دا زانین کو ئه‌و ب کێفخوه‌شی بپێشوازیێ ل رێکەفتنا د ناڤبه‌را حکومه‌تا ئیراقێ و حکومه‌تا هه‌رێما کوردستانێ دا یا د وارێ په‌ترۆلێ دا دکن.
وی ده‌ستنیشان کر کو رێکەفتن ل سه‌ر پرۆژه‌یا ڕێیا بپێشکه‌تنێ ژی دێ د ده‌مه‌که کورت دا د به‌رژه‌وه‌ندیا ته‌ڤاهیا هه‌رێمێ دا به.
“دڤێ ئیراق ژ تووندیێ دوور بمینه“
ئه‌ردۆگان د هه‌ڤدیتنێ دا ئانی زمان کو ترکیێ دخوازە کو ئارامی و سه‌قامگیری ل هه‌رێمێ هه‌به و دوورخستنا ئیراقێ ژ ئالۆزیێن توندووتووژیێ یێن ل هه‌رێمێ گه‌له‌ک گرنگه.
سه‌رۆککۆمارێ ترکیه‌یێ دا زانین کو ئه‌و پێنگاڤێن هه‌رێما کوردستانێ د ڤی واری دا داڤێژه، ئەو دشۆپینن.
ڕه‌جه‌پ تەیییپ ئه‌ردۆگان هێڤی کر کو هلبژارتنێن پارلامه‌نتۆیا ئیراقێ ژ بۆ ته‌ڤاهیا گه‌لێ ئیراقێ ب خێر بن و ته‌که‌ز کر کو ئه‌و ئارامی و ئه‌وله‌هیا ئیراقێ ژ یا وه‌لاتێ خوه جودا نابینن.
پێڤاژۆیا چاره‌سه‌ریێ
سه‌رۆککۆمارێ ترکیه‌یێ ڕاگەهاند کو ئه‌و د سه‌رکه‌فتنا پێڤاژۆیا چاره‌سه‌ریێ ژی دا ب بریارن و گۆت کو ئه‌و پشتگریا هه‌رێما کوردستانێ یا ژ بۆ یه‌کپارچه‌بوونا ئاخا سووریه‌یێ گرنگ دبینن.
د هه‌ڤدیتنێ دا سه‌رۆکێ میتێ ئیبراهیم کالن، سه‌رۆکێ ڕاگەهاندنا سه‌رۆککۆماریێ بورهانه‌تتین دوران و سه‌ره‌کشێورمه‌ندێ پۆلیتیکایا ده‌رڤه و ئه‌وله‌هیێ یێ سه‌رۆککۆماریێ ئاکیف چاگاتای کلچ ئاماده بوون.
