ب ئاماده‌بوونا جیگرێ سه‌رۆکێ پارتییا ده‌مۆکراتا کوردستانێ (پدک) مه‌سرور بارزانی، ل باژارێ ئامێدیێ میتینگه‌کا مه‌زن یا بانگه‌شه‌یا هلبژارتنێ ژ بۆ لیسته‌یا ۲۷٥ ئا پارتییێ هات لدارخستن. د گۆتارا خوه دا، مه‌سرور بارزانی ته‌که‌زی ل سه‌ر گرنگیا به‌شداربوونا د هلبژارتنان دا کر و ڕاگەهاند کو پرسگرێکا هه‌رێما کوردستانێ ب به‌غدایێ را نه ته‌نێ مژارا مووچه‌یانه، لێ به‌لێ بنپێکرنا مافێن ده‌ستووری یه.
مه‌سرور بارزانی، رۆژا ۲۲ێ جۆتمه‌هێ د میتینگا بانگه‌شه‌یا هلبژارتنێ یا ل ئامێدیێ دا گۆتاره‌ک پێشکێش کر و د ده‌ستپێکا گۆتارا خوه دا ئاماژه ب ڕۆلا دیرۆکی یا ده‌ڤه‌را ئامێدیێ کر و گۆت: “ده‌ڤه‌را ئامێدیێ لاندکا شۆره‌ش و دا‌ستانێن گه‌لێ کورد بوویه. ئه‌ڤ ده‌ر جهێ پێشمه‌رگه و شه‌هیدێن مه یه. گه‌له‌ک جاران داگیرکه‌ران خوه‌ستیه ئاخا وه‌لاتێ مه داگیر بکن، لێ پێشمه‌رگه و خه‌لکێ وه‌لاتپارێزێ وه‌لاتێ مه نه‌هیشتنه ئاخا وان بێ داگیرکرن.”
جیگرێ سه‌رۆکێ پەدەکێ بانگ ل خه‌لکێ کر کو ب خورتی به‌شداری هلبژارتنان ببن و گۆت: “گەلەک پێویسته ئه‌م بچن سه‌ر سندۆقێن ده‌نگدانێ و ڕێ ل به‌ر پیلانا نه‌یار و داگیرکه‌ران بگرن. پێویسته ئه‌م ده‌نگێ خوه بدن نوونه‌رێن خوه دا کو بچن به‌غدایێ به‌ره‌ڤانیێ ل مافێن ده‌ستووری یێن خه‌لکێ کوردستانێ بکن.”
ده‌ربارێ پێوه‌ندیێن ب به‌غدایێ را، بارزانی ڕه‌وشا پشتی ڕووخاندنا رژێما به‌عس ب بیر خست و گۆت: “راسته پشتی ڕووخاندنا رژێما بەعس یا به‌رێ، مه ڕووپه‌له‌که نوو ڤه‌کر و هێڤیه‌کا مه یا مه‌زن هه‌بوو کو ده‌مۆکراسی و فه‌ده‌رالی دێ مافێن ده‌ستووری یێن خه‌لکێ هه‌رێما کوردستانێ مسۆگه‌ر بکن، لێ مخابن مافێن مه یێن ده‌ستووری هاتن بنپێکرن.”
مه‌سروور بارزانی هه‌روها ته‌که‌ز کر کو پرسگرێک ژ مژارا مووچه‌یان کوورتره و ڕاگەهاند: “پرسگرێکا مه ب به‌غدایێ را نه ته‌نێ مووچه یه، لێ گه‌له‌ک جاران نه‌یارێن مه خوه‌ستنه مه ب مژارا مووچه‌یێ ڤه مژوول بکن. ئه‌و مافه‌کێ ده‌ستپێکی یێ خه‌لکێ هه‌رێما کوردستانێ یه کو وه‌ک هه‌ر که‌سه‌کی دن مووچه‌یێ خوه وه‌ربگره، نه منه‌ته و که‌س خێرێ ب مه ناکه. مافێن مه ژ ڤێ پرسێ گه‌له‌ک مه‌زنترن.”
مه‌سروور بارزانی ته‌که‌زی ل سه‌ر وێ یه‌کێ کر کو ئارمانجا پەدەکێ ژ سیاسه‌تێ، نه ته‌نێ دابینکرنا مووچه‌یانه، لێ به‌لێ ئاڤاکرنا ژیانه‌کا شایه‌سته یه ژ بۆ هه‌موو وه‌لاتیان. وی گۆت: “ئه‌م دخوازن باشترین ژیان پێشکێشی خه‌لکێ هه‌رێما کوردستانێ بکن. ئه‌م ناخوازن چاڤێ مه ته‌نێ ل مووچه‌یێ به، ئه‌م دخوازن ژیانا خه‌لکێ مه وه‌ک یا وه‌لاتیێن ل وه‌لاتێن پێشکه‌تی یێن جیهانێ به. ئه‌م ژ وان تشته‌کی کێمتر نینن.”
جیگرێ سه‌رۆکێ پەدەکێ، ب توندی ڕه‌خنه ل وان ئالیان گرت کو هه‌ول ددن هه‌رێما کوردستانێ لاواز بکن و گۆت: “گه‌له‌ک جاران نه‌یارێن مه یێن ناڤخوه‌یی و ده‌رڤه ده‌ستێن خوه کرنه یه‌ک و هه‌ڤپه‌یمانی پێک ئانینه دا کو مووچه‌یێ خه‌لکێ هه‌رێما کوردستانێ ببرن و ڕێ ل به‌ر پێشکه‌تن و ئاڤادانیا هه‌رێما کوردستانێ بگرن. وان خوه‌ستیه پەدەکێ تێک ببن، ژ به‌ر کو دزانن کو هێڤێنێ کوردایه‌تیێ، هێڤێنێ شۆره‌شێ و هێڤیا پاشه‌رۆژا کوردستانێ، پەدەکە یه.”
ده‌ربارێ پێگه‌ها هه‌رێما کوردستانێ یا د ناڤ ئیراقێ دا، مه‌سرور بارزانی ب زه‌لالی هه‌لوه‌ستا پەدەکێ بەرچاڤ کر و گۆت: “هه‌یا کو ئه‌م د ناڤ ئیراقێ دا بن، دڤێ مافێ خه‌لکێ مه وه‌ک مافێ هه‌ر وه‌لاتیه‌کی دن یێ ئراقێ یه‌کسان به. ئه‌م ب چو ئاوایی قه‌بوول ناکن کو ئه‌م ژ چو که‌سه‌کی دن یێ ڤی وه‌لاتی کێمتر بن.”
هه‌روها ئه‌رکێ کاندیدێن پەدەکێ ل به‌غدایێ ده‌ستنیشان کر و گۆت، دڤێ ئه‌و نه ته‌نێ ژ بۆ کوردستانێ، لێ ژ بۆ ته‌ڤاهیا ئیراقێ بخه‌بتن. مه‌سرور بارزانی وها بەردەوام کر: “دڤێ کاندیدێن پەدەکێ ل به‌غدایێ، به‌ره‌ڤانیێ ل مافێن خه‌لکێ هه‌موو هه‌رێما کوردستانێ و ئیراقێ بکن. ل به‌شه‌که مه‌زن یا باژارێن ئیراقێ، ڕه‌وش و ده‌بارا خه‌لکێ گه‌له‌ک خرابه؛ ئاڤ، که‌هره‌ب، ئه‌وله‌هی و خزمه‌تگوزاریێن دن نینن. چو هێڤیا وان نینه، نها ته‌کانه هێڤیا وان ئه‌وه کو ئه‌م ئالیکاریا وان بکن.”
جیگرێ سه‌رۆکێ پەدەکێ گۆت ژی: “رژێما به‌رێ یا ئیراقێ د پێڤاژۆیێن ئه‌نفالێ دا گوندێن هه‌رێما کوردستانێ وێران کرن و خه‌لکێ مه ئه‌نفال کر. به‌رپرسێن به‌غدایێ، ل شوونا کو مه قه‌ره‌بوو بکن، ژ به‌ر پێشکه‌تن و ده‌ستکه‌فتیێن مه، مه جه‌زا دکن. ئه‌و په‌ره‌یێ کو ماف و شایستەیێ مه یه، ل جهێن دن خه‌رج دکن. ل سه‌ر خه‌لکێ خوه ژی خه‌رج ناکن؛ خوه‌زی ل سه‌ر خه‌لکێ خوه خه‌رج بکرا، لێ ناکن. ته‌نێ خوه‌دێ دزانه ئه‌و په‌ره ل کو ده‌رێ خه‌رج دکن.”
مه‌سرور بارزانی د به‌شه‌ک دن یا ئاخافتنا خوه دا ئاماژه ب پێڤاژۆیا ئاشتیێ یا ل ترکیێ و باکورێ کوردستانێ ژی کر و گۆت: هێڤیا مه ئه‌وه کو پرۆسه‌سا نوو یا ئاشتیێ (د ناڤبه‌را پەکەکە و ترکیێ دا) سه‌رکه‌تی به، دا ئه‌م بکاربن گوند و ناڤچه‌یێن خوه یێن سینۆری ئاڤا بکن و وان ڤه‌گوهه‌رینن ناڤه‌ندێن گه‌شتیاری یێن پێشکه‌تی کو دێ مفایێ بده ته‌ڤاهیا گه‌لێ کوردستانێ.”
