جیگرێ سه‌رۆکێ پارتییا ده‌مۆکراتا کوردستانێ (پدک) نێچیرڤان بارزانی ل نەینەوایێ (مووسل) ته‌ڤلی بانگه‌شه‌یا هلبژارتنێن پەرلامه‌نتۆیا ئیراقێ بوو و گۆتارەک پێشکەشی ئامادەبوویان کر و گۆت: ژ بۆ دوورخستنا پارتییێ ژ شنگالێ پلانه‌ک هه‌یه لێ که‌س نکاره پارتی و شنگالێ ژ هه‌ڤ جودا بکه.
نێچیرڤان بارزانی د پەیڤا خوە دا بەحسا رزگارکرنا شنگالێ ژ بن دەستێ تەرۆریستێن داعشێ کر و ئاخاڤتنا خوە ب قەولەکێ ئێزدیان دەست پێ کر:
جەوابێ بدەن کوردستانێ
بلا قایمکەن ئیمانێ
شەرەفەدین میرە ل دیوانێ
ئێزدیخان، ئێزدیخان جەواب گەهشتە سه‌رۆک بارزانی ب پێشمه‌رگه‌یان را هاتن سەحێلا و سۆزا خوه یا ژ بابە شێخ و ئێزدیان را ژ بۆ رزگارکرنا شنگالێ بجهئانی. هه‌تا کو نه‌چوو سەرێ چیایێ شنگالێ و مزگینییا ئازادییا شنگالێ نه‌دا هه‌موو پێکهاتەیێن هه‌رێمێ، ئه‌و ڤه‌نه‌گه‌ریا مالا خوە. شه‌رفه‌دین ژی هەتا رۆژا ئەڤرۆ سه‌ربلند مایە و دێ سەربلند ژی بمینه و میر ل مه‌یدانێ یه و داعش ژی شکەستن و شه‌رم و روورەشی ل جیهانێ ژێ را ما. ب سایا وێره‌کیا برێز سه‌رۆک بارزانی و که‌د و خوینا پێشمه‌رگه‌یێن قه‌هره‌مان یێن کوردستانێ، ئێزدیخان هه‌تا ئیرۆ گه‌ش و سه‌ربلند مایه و دێ سه‌ربلند بمینه.
ژ بۆ جارا یه‌که‌م، پێشمه‌رگه‌یان، د بن فه‌رمانداریا ڕاسته‌راست یا سه‌رۆک بارزانی دا، ئه‌فسانه‌یا دعاشێ ل شنگالێ، مه‌خموور و ده‌ڤه‌رێن دن یێن کوردستانێ تێکشکاندن. قه‌هره‌مانی و خوینا پێشمه‌رگه‌یێن مه ئیراده‌یا هێزێن دن ئێن ئیراقێ خورت کرڤە. یەکەمین هێز هێزا پەشمەرگەیێن مە بوو دەرگەهێ ئازادییا مووسلێ ژ دەستێ داعشێ ڤەکرن و چوونە د ناڤ باژێر دا.
شه‌نگال جاره‌که دن ب خوینا شه‌هیدێن پێشمه‌رگه هات ئاڤدان. ب ده‌هان هەڤچپەرێن مه‌حموود ئێزدی ل شنگالێ خوینا خوه دان دا کو ئێزدیخان ژ ده‌ستێن داعشێ ڕزگار بکن. ئه‌ڤ وێستگەهەک دیرۆکی یه کو ئه‌م پێ سه‌ربلندن. شنگال قه‌ت ژ پارتییێ نه‌هاتیه ڤه‌قه‌تاندن و چو ئارمانج و به‌رنامه‌یێن پارتی بێی شنگالێ نه‌بوونه.
که‌س نکاره تیرۆژکێن ڕۆژا پارتییێ ل شنگالێ ڕاوه‌ستینه. ئه‌م دبینن و دزانن کو هندەک سیاسه‌تمه‌دارێن ئیراقی چ دکن، هه‌ول ددن کو دونەرەکییێ د ناڤ براتییا مه دا چێکن، د ناڤ براتییا مه دا وەکی عه‌ره‌ب و کورد دوبه‌ندیێ چێبکن. ئه‌م ژ وان که‌سێن کو دخوازن نەینەوا د ناڤبه‌را کورد، عه‌ره‌ب، ئێزدی، کرستیان و شه‌به‌کیان دا ل نینه‌وا دوبه‌ندیێ چێبکن را دبێژن کو ئه‌و دێ خه‌ونێن خوه ب خوە را ببن گۆرێ و هوون قه‌ت بێتفاقی و نه‌خوه‌شییا د ناڤبه‌را ملەتێ مه دا نابینن.
ئه‌م دخوازن کو قانوون ل شنگالێ سەردەست بە، دڤێ ده‌ستهلاتداریا سڤیل هه‌به، دڤێ خزمه‌ت هه‌به و دڤێ خەلک دیسا بکاربن ڤه‌گه‌رن شنگالێ. ب تایبەتی ژی هوون یێن کو نوونەراتییا شنگالا بریندار دکنل هەموو دەڤەرێن ئزدیان مه چو جاری هوون ژ بیر نه‌کرنه و سۆز ددن وه کو پارتی پارێزڤانێ سه‌ره‌کی یێ هه‌موو پێکهاتەیێن ل ئیراقێ، نه‌مازه ل نینه‌وا بن
شه‌به‌ک ژ مه‌نە، ڕه‌ژێما به‌رێ نکاریبوو شەبەکان ژ کوردان جودا بکه. دڤێ ئه‌م زێده‌تر ب هه‌ڤ را بن دا یه‌ک هێزبین. دڤێ پرسگرێک د ناڤبه‌را مه دا نەمینن. شه‌به‌ک، ئێزدی، مه‌سیحی، دڤێ ئه‌م ل ده‌شتا نەینەوا ب هه‌ڤ را بن و براتییا مه ژ بۆ پاشه‌رۆژه‌کا ئاڤەدان و گه‌شتر ژ بۆ هه‌رێما کوردستانێ و ئیراقێ.
لیسته‌یا مه لیسته‌یا هه‌موو پێکهاته‌یێن ئیراقێ یه، چ ل کوردستانێ، چ ل نەینەوا و چ ل هه‌ر جهه‌کی دن ل ئیراقێ بە. پارتی ژ بۆ ته‌ڤاهیا ئیراقێ هه‌ڤسه‌نگیا خێرێ یه و خه‌ما مه ژی ئارامیا ته‌ڤاهیا ئیراقێ یه. مه ژ مێژ ڤه گۆتیه کو ئه‌وله‌هیا ئیراقێ ژ بۆ کوردستانێ گرنگه.
– پارتی ل نەینەوا چ قاسی ب هێز به، دێ ل به‌غدایێ ژی ئه‌و قاسی بهێزتر ببه. ته‌جروبه‌یێ ژی سه‌لماندیه کو پارتی ل کیژان جهی بهێز به ل وی جهی ئارامی، ئاڤه‌دانی و پێکڤه‌ژیان هه‌یه.
