نێچیرڤان بارزانی، سه‌رۆکێ هه‌رێما کوردستانێ، نامه‌یه‌ک ژ ماركۆ ڕوبیۆ، وه‌زیرێ ده‌رڤه یێ ئامه‌ریکایێ، وه‌رگرت.
د نامه‌یا خوه دا، ڕوبیۆ ڕۆلا سه‌رۆک نێچیرڤان بارزانی د ڤه‌کرنا بۆریێیا نەفتێ یا د ناڤبه‌را ئیراق و ترکیه‌یێ دا ژ بۆ ژ نوو ڤه هنارده‌کرنا نه‌فتا هه‌رێما کوردستانێ بلند دنرخینه، هه‌روها پێشوازیێ ل ڤێ پێنگاڤێ دکه.
د به‌شه‌که دن یا نامه‌یێ دا، ڕوبیۆ ژ بۆ ڕۆلا به‌رده‌وام یا سه‌رۆک نێچیرڤان بارزانی یا د وارێ هێسانکرنا دیالۆگا د ناڤبه‌را ترکیێ و پەكەكێ دا و هه‌ولدانێن وی یێن ژ بۆ پاراستنا ئارامی و ئه‌وله‌هیا ل سووریێ، رێز و حورمەتا خوە نیشان دا.
رۆبیۆ هه‌ڤکاریا به‌رده‌وام یا د ناڤبه‌را ئامه‌ریکا و هه‌رێما کوردستانێ دا وه‌کی بنگه‌هێ ئارامی و پێشکه‌تنێ ب ناڤ دکه. د ڤێ ده‌ربارێ دا ژ سه‌رۆک نێچیرڤان بارزانی را دنڤیسه: “رێبه‌ری و هه‌ڤکاریا وه یا ئاڤاکه‌ر گیانێ به‌رپرسیاری و ژێهاتییا نیشان دده کو دبه سه‌ده‌ما خورتکرنا ئاشتی و هه‌ڤکاریێ.”
د داویا نامه‌یا خوه دا، وه‌زیرێ ده‌رڤه یێ ئامه‌ریکایێ تەڤی سلاڤ، ڕێز و سپاسداریا ژ بۆ هه‌ڤپه‌یمانیا به‌رده‌وام یا هه‌ر دو ئالیان، هه‌ولدانێن سه‌رۆک نێچیرڤان بارزانی یێن ژ بۆ هه‌ڤکاریێ و یه‌کیتیێ بلند دنرخینه، هه‌روها ته‌که‌ز دکه کو خورتکرنا هه‌ڤکاریا ئابۆری یا د ناڤبه‌را ئامه‌ریکا و هه‌رێما کوردستانێ دا، به‌رژه‌وه‌ندیێن وان یێن هه‌ڤبه‌ش بهێز دکه.
