ئەلمانیایێ ڕێ نه‌دا ئالیگرێن پەکەکێ بچن هه‌ولێرێ

سه‌رۆکا فراکسیۆنا  پارتیا چه‌پ  ل پەرلامه‌نتۆیا هه‌رێما هامبوورگێ یا ئەلمانیایێ جانسو ئۆزده‌مر و شاندا پێ را، خوه‌ستن ژ بالافرخانه‌یا دوسسه‌لدۆرفێ بچن هه‌ولێرێ. لێ پۆلیسێ ئەلمانیایێ ڕێ نه‌دا وان ئەو بەر ب ھەولێرێ پایتەختا ھەرێما كوردستانێ بفرن. ئه‌و که‌سێن دخوه‌ستن بچن هه‌ولێرێ، ئارمانجا وان ئه‌و بوو کو، هنده‌ک چالاکیان ل هه‌ولێرێ بکن و ئارامیا کوردستانێ تێک بدن. یانی تشتا کو چه‌کدارێن پەکەکێ ل چیایێن باشوورێ کوردستانێ دکن ڤێ شاندێ دخوه‌ست ل هه‌ولێر ژی بکن‌.

شا‌رەدارێ سورا ئامەدێ یێ به‌رێ ئەبدولا ده‌مرباش ژی د ناڤا ڤێ شاندەیێ دا‌ بوو. ئه‌و ئیدیعا دکن کو دخوازن ژ بۆ ئاشتیێ پێکبینن بچن کوردستانێ. ده‌مرباش دبێژه‌: “ئارمانجا مه‌ ئه‌ڤه‌ کو ناکۆکی کوور نه‌به‌ و ئه‌م دخوازن هندەك هه‌ڤدیتنان بکن. هێزێن کو چوونا مه‌ ئاسته‌نگ دکن، دخوازن کو کورد د سه‌دسالا 21ێ دا‌ بێ ستاتو/كیان بمینن و جاره‌کا‌ دن ئاخا کوردستانێ بھێتە‌ داگیرکرن.”

لێ ڕاستی نه‌ ئه‌ڤه‌یە. به‌ری نها ب چه‌ند ڕۆژه‌کان وه‌زه‌ره‌تا ناڤخوه‌ یا کوردستانێ داخوویانیه‌ک به‌لاڤ کر. وه‌زه‌ره‌تا ناڤخوه‌ یا کوردستانێ ڤه‌کری دا خوویاکرن کو، هنده‌ک ئالیگرێن پەکەکێ هه‌ولددن ژ ئه‌ورۆپایێ وه‌رن هه‌رێما کوردستانێ و خوه‌پێشاندانا ل دار بێخن و ئارامیا ھەولێرێ و باشوورێ كوردستانێ تێك بدن. لێ وه‌زاره‌تێ د هه‌مان ده‌می دا‌ دا خویاکرن کو، هه‌ولێر خه‌تا سۆره‌.

سه‌رۆکا فراکسیۆنا  پارتیا چه‌پ  ل پەرلامه‌نتۆیا هه‌رێما هامبوورگێ یا ئەلمانیایێ جانسو ئۆزده‌مر دبێژه‌: “ئه‌ڤ ژی ئیسپاتا به‌رچاڤه‌ کو حکومه‌تا ئەلمانیایێ ناخوازه‌ ل کوردستانێ ئاشتی چێببە. ئەلمانیا دخوازه‌ شه‌ر گرانتر ببه‌ و زیان نه‌گەهه‌ بازرگانیا وان یا چه‌کان یا ب ترکیێ ڕا‌.

نها بلا جانسو ئۆزده‌مر خوە نەخاپینە و  که‌سه‌کێ ژی نه‌خاپینه‌، ھەر كەس دزانە كو جانسۆ ئۆزدەمر پشتگره‌ک ئەکتیف یا پەکەکێ یه‌ و ئه‌و ب خوه‌ د ناڤ پارتیا چه‌پ یا ئەلمانیایێ دا‌ ژی هه‌ر پرۆپاگانده‌یا پەکەکێ دکه‌ و هه‌تا جاره‌کێ وێ د مالپەرا  خوه‌ یا تویتته‌رێ دا‌ وێنەیێ خوە دگەل  ئالایا پەکەکێ به‌لاڤ کربوو و ژ ئالیێ حکومه‌تا ئەلمانیایێ ڤه‌ هات بوو جه‌زاکرن و جه‌زایێ 4500 یۆرۆ  بوون. یانی جانسو چالاکڤانه‌کا پەکەکێ یه‌ و ل ئەلمانیایێ د ناڤ پارتیا چه‌پ دا کار دکه‌.

جانسو ئۆزده‌مر ئەڤ وێنەیێ خوە د تۆیتەرا خوە دا بەلاڤ كربوو و ژ ئالیێ پۆلیسێ ئەلمانیایێ ڤە 4500 یۆرۆ ھات جەزا كرن

هاتنا ڤێ شاندێ ب پلاندانا پەکەکێ یه‌ و ئارمانجا وان تێکدانا ئارامیا باشوورێ کوردستانێ یه‌. نه‌ کو ئه‌و دخوازن ئاشتی چێببه‌. ژ ئالیه‌ک دن ڤه‌ ئەبدوڵا ده‌مرباش ئه‌ڤه‌ ده‌مه‌که‌ ل ئەلمانیایێ یه‌ و ئه‌و ب خوه‌ گه‌له‌ک جاران گازندا ژ پەکەکێ دکه‌. لێ دخوه‌یێ نه‌کاریه‌ ب ئیرادا خوه‌ یا ئازاد ب کار بینه‌ و ئه‌و ژی مه‌جبور کرنه‌ د ڤێ شاندەیێ دا‌ جھ بگره‌. ده‌مرباش ئه‌ندام و چالاکڤانێ پەکەکێ یه‌.

نها حوکومه‌تا ئەلمانیایێ نه‌هشت ئه‌ڤ که‌س سه‌ردانا کوردستانێ بکن. ئه‌گه‌ر ئه‌و هاتبانە هه‌ولێرێ و ده‌ست ب کارێن نه‌ یاسایی کربانە و ژ ئالیێ حکومه‌تا كوردستانێ ڤه‌ هاتبانە گرتن، دێ پەکەکێ ژ بۆ پۆرپاگانده‌یا دژی هه‌رێما کوردستانێ دنیا خراب کربایە.

لێ ژ ئالیه‌ک دن د ڕاستیا خوه‌ ده‌، مه‌دیایا باشوور ژی د ڤان نووچه‌یان دا‌ ڕۆله‌ک خراب دله‌یزه‌ و هه‌تا ڕاده‌یه‌کی دبه‌ وا‌سته‌یا پرۆپاگاندەیا پەکەکێ ب خوه‌.

داخوویانیا ده‌مرباش و جانسو   ژ داخوویانیێن پەکەکێ نە جودانه‌. ئه‌و هه‌مان پرۆپاگانده‌یێ دکن و زانیاریێن شاش به‌لاڤ دکن. دڤێ د سه‌ری دا‌ پەکەکە و هه‌رکه‌سه‌ک دن تێ بگهه‌ کو، ده‌زگه‌هێن حکومه‌تا کوردستانێ ب هه‌موو ئمکانێن خوه‌ ژ بۆ پاراستنا ئارامیا خه‌لکێ و کوردستانێ به‌رپرسیارن.

به‌ری كو   دیالۆگ دەست پێ بكە، دڤێت هه‌ر ئالیه‌ک ڕێزێ ل سه‌روه‌ریا کوردستانێ بگره‌ و ل گۆر  یاسایێن کوردستانێ ته‌ڤبگه‌رە. پەکەکە ب هه‌موو دام و ده‌زگه‌هێن خوه‌ ڤە ئێریشێ کوردستانێ دکه‌. ئه‌گه‌ر مرۆڤ شه‌رێ هنده‌کا بکه، پێشمه‌رگه‌یان شه‌هید بکه‌ و د مه‌دیایا خوه‌ دا هنده‌ک ئالیان ب خیانه‌تێ ئیتهام بکه‌ به‌حسا دیالۆگا چ و چه‌وا‌ دکه‌؟ ئارمانجا پەکەکێ نه‌ دیالۆگ یان ژی ئاشتیه‌، ئارمانجا وان تێکدانا ده‌ستکه‌فتیێن نه‌ته‌وی ل باشوورێ کوردستانێ یه‌. یێن وه‌ک جانسو و ده‌مرباش ژی پیۆنێ ڤێ له‌یزتاکا قرێژن.

نووچه‌/ئەنالیز

2021.06.13

نێرین / شیرۆڤە