رۆمانا (ساپۆ) راستیا رەوشا مە
![](/wp-content/uploads/2023/05/IMG_1130.png)
ب دیتنا نڤیسکارێ کورد ژ باکورێ کوردستانێ ئەز گەلەک کێفخوەش بووم، دیارییا وی یا گرانبها، رۆمانا (ساپۆ) ئەز کێفخوەشتر کرم. گەلەک سپاس ژ بۆ نڤیسکار کاک بووبێ ئەسەر و هیڤیدارم د کار و خەباتێن خوە دا سەرکەفتی بە و ژ بۆنا خزمەتکرنا زمان و ئەدەبیاتا کوردی خودێ سحەتێ بدە وی.
رۆمانا (ساپۆ) کەدا نڤیسکار یا حەفت سالانە. د وارێ جڤاکی و سیاسی دا رۆمان خوەدی ناڤەرۆکەک گەلەک زەنگینە و نڤیسکار گەلەک ب شارەزایی و پسپۆری هەر دو ئالی، یێ جڤاکی و سیاسی، ب هەڤرا گرێداینە. لەوما دڤێ هەر کوردەک و بتایبەتی کوردێن باکور ڤێ رۆمانێ ب هووری بخوینن. ئەز د وێ باوەریێ دا مە کو پشتی خواندنا رۆمانێ دێ بەرسڤا گەلەک پرس و پرسگرێکان د مەژیێ وان دا زەلال ببە و دێ باشتر د رەوشا ئیرۆ یا باکورێ کوردستانێ تێدایە تێبگەهن، کا چما باکورێ وەلاتێ مە کەتیە ڤی حالی و ڤێ رەوشێ کو چو کەس حەسوودیێ پێ نابە.
ب دیتنا من گەلەک باش بوو کو، رۆمانا (ساپۆ) د ڤێ دەمێ و د ڤان رۆژان دا ژ چاپێ دەرکەتی و کەتیە بەر دەستێ خوەندەڤانان. چما دبێژم گەلەک گرنگ بوو د ڤان رۆژان دا کەتە بەر دەستێ خوەندەڤانان؟ ژ بەر کو ڤان رۆژان ل ترکیی و باکورێ کوردستانێ هلبژارتنێن سەرککۆماریێ و پەرلەمانتۆیا ترکیێ هاتن ئەنجام دان و ژ وان هلبژارتنان ئەنجامێن گەلەک عەجێب و غەریب دەرکەتن هۆلێ. ئەڤ رۆمان بەرسڤا گەلەک ژ وان پرسان ددە.
ئێدی نە حەوجەیی شرۆڤە و ئەنالیزێن هرڤە و وێڤەیە. ئێدی نەحەوجەیە کەسەک خوە بوەستینە و ل بەرسڤان بگەرە. چما کورد دەنگ ب نەتەوەپەرستێن ترک ددن؟ چما کورد دەنگ ب ئۆلدارێن ترک ددن؟ چما کورد دەنگ ب چەپێن کەمالیست یێن کو ب دەهان کۆمکوژی ب سەرێ گەلێ کورد ئانینە ددن؟ چما دەنگ ب سیاسەتا شاش “براتیا گەلان” ددن؟ چما خەلکێ مە ل باکورێ کوردستانێ دەنگێ خوە ب ئالی و رێکخستنێن وەلاتپارێز و نەتەوەیی نادە؟ چما دەنگ ب وان ئالیێن داخوازا مافێن رەوا یێن گەلێ کورد دکن نادن؟
ئەگەر تو بخوازی بەرسڤا ڤان پرسان هەموویان بزانی، ڤێ رۆمانێ، رۆمانا (ساپۆ) ب هووری بخوینە.
هوون ڤێ رۆمانێ بخوینن هوون دێ دگەل بێریڤانان بچن بێرێ و دێ حەنەک و لاقردیێن بێریڤانان دگەل شڤانی ب چاڤێن خوە ببینن. رۆمان دێ وە د ناڤ خوەزا و سروشتێ سپەهی، رند و دلڤەکەر یێ کوردستانێ دا بگێرینە. دێ بن بەشەک ژ ژین و ژیارا گوندیان. دێ ببن شاهدێ عەشق و ئەڤینینا کەچ و خورتێن گوند، عەسق و ئەڤینا بێ غش و پاقژ و ژ دل.
دەما تو دگەهیە بەشێن بەری داویێ ژ رۆمانێ، دێ خوە ببینی خورتەک جوان و ژێهاتی ژ خورتێن گوندی. ئێدی تو خورتەکی هەستا نەتەوەیی ل جەم تە بلند و بهێزە، ئێدی تو هەست پێ دکی وەلاتێ تە پارچەکریە و گەلێ کورد د بن نیرێ بندەستیێ دا ژ ئێش و ئازاران دنالە. تو ب روحەک نەتەوەیی وەلاتپارێزی داخوازا مافێن رەوا یێن گەلێ خوە یێ بن دەست دکی هەتا تو دگەل هەڤالێن خوە یێن وەلاتپارێز دگەهن کۆپیتکا بەرخوەدانێ. د ڤێ قۆناغێ دا دەولەتا کوور حساب و هزرەکێ ژ بۆ تە دکە و ژ تە دترسە تو بسەرکەڤی و دڤێ رێ ل تە بگرە.
ئها د ڤێ قۆناغێ دا دەولەتا کوور دکەڤە تەڤگەرێ و دخوازە رێ ل بەر تە بگرە و تە ژناڤ ببە و ژ هۆلێ راکە. دەولەت دئینە و دبە، دنژینە و خەراب دکە، داویێ قەهرەمانێ خوە پەیدا دکە و (ساپۆ) دئافرینە.
ل بەرپەرێن داویێ ژ رۆمانێ، ساپۆ دبە قەهرەمانێ دەولەتێ و ب ئالیکاریا دەولەتا کوور دبە گۆرەک هار، هۆڤ و درنەدە و بەرددن گیانێ خەلکێ باکورێ کوردستانێ و دەست ب شەرێ دژی وەلاتپارێز و کوردپەروەران دکە.
ئها د ڤێ قۆناغێ دا، دەما گەلێ مە ل باکور گاڤان بەر ب پێش دئاڤێژە، رێکخستن و سازیێن خوە یێن نەتەوەیی ئاڤا دکە و داخوازا مافێن خوە یێن رەوا دکە، ساپۆ ل سەر ناڤێ کوردان و ب ئالیکاریا دەولەتێ هەر تشتی ژ ناڤ دبە و هەتا رۆژا ئیرۆ ژی گەلێ مە ل باکورێ کوردستانێ د بن سیاسەتا ساپۆ دا دنالە و ژ هەموو مافێن خوە بێپار مایە.
![](/wp-content/uploads/2023/05/Sapo-1.jpeg)
Bûbê Eser û Nasrat Hacî