بێگومان وەختێ مرۆڤ تشتەکی بنڤێسیت دبیت بکەڤیت دبن هندەک رەخنان یان ئاخفتێت زڤردا، لێ یا من دڤێتن بێژم هەر گاڤەکا مە کوردان شیا بەرژەوندیێن خوە یێن کەسۆکی نە کەینە ئارمانجا خوە یا سەرەکی هینگێ دێ کارین هەستا نەتەوەیی ل دەف هەر تاکەکێ کورد بهێز نیشان بدین.
جارێ دڤێت ژ لایێ نەتەوەیی ڤە ئەم تەماشەیی هەڤسۆیێن خوە بکەین وەکو ترکیێ پشتی کو دەولەتا ترکیێ یا نووی هاتیە دامەزراندن ب سەرکێشیا (مصطفی کمال پاشا ئەتاتورک) سێ خالێن هەری گرنگ هەتا نوکە ل دەف خەلکێ تورک هەنە وبەردەوامیێ پێ ددن: ل هەر قۆلاچکەکا جیهانێ ترکەک ب تەنێ لێ بژیت دێ بینی وێنەیێ ئەتاتورکی یان ژی ئالایێ ترکیێ یێ ل وێرێ. هەروەسا زارۆکێن خوە ژی ژبیر ناکەن وان فێری زمانێ دایکێ دکەن، ل ڤێرێ خوەیا دبیت، بەروڤاژی ئەم کورد ب تنێ ب بەژن وبالا سەرکردەیێن خوە دبێژین و رێزێ لێ ناگرین و ژ لایێ ئالایی ژی ڤە ئەز د وێ باوەریێ دا مە ٩٠٪ خەلکێ مە ل مالێت خوە ئالایێ کوردستانێ نینە. ژ لایێ زمانێ دایکێ ژی ڤە ب تایبەتی ئەڤ کورد یێن ئەم ل دەرەڤە دژین، لێ گەلەک ب مخابنیڤە وەکو پێدڤی ئەم گرنگیێ پێ نادەن و مە هزر ل هندێ نەکریە، یان ژی مە نەڤیایە هزرێ تێدا بکن، چونکی زارۆک نفشێ پاشەروژێ یە و وەلات ل سەر دەستێ وان پێشدکەڤیت یان ژی ئاڤا دبیت.
گەلۆ چما هەتا نوکە مە نەشیایە ئەڤێ بکەن؟ ما ئەم هەموو نە بەرپسیارین ژڤی چەندێ؟ یان ژی پارتییێن کوردستانێ و مەدیایا کوردی ب گشتی چەند دخەمسارن، هەتا بەلکی گەلەک جاران ژی یێن بووینە رێگر ل بەرامبەرهەستا نەتەوەیی، یان ژی ئایینێ چەند دکەینە رێگر ژ بەر کو پرانیا کوردان پێ داخبارن، ئەگەر ئەڤە ڕاستە بۆچی عەرب، ترک و فارس نەکەفتینە د بن باندۆرا وێ دا، یان ژی ئەم ب بهانەنە ئەڤە ب دوورشم و پەیڤێن بریقەدار پەیدا نابیت؟ گەلۆ جڤاکا کوردی چەند بەرپسیارە ژڤێ چەندێ؟ ئەز د وێ باوەریێ دا مە ئەگەر ئەڤرۆ راپرسیەکێ ل کوردستانێ ئەنجام بدەن ب تەنێ ٢ پسیارێن کورت ئاراستەیی خەلکێ خوە بکن، تە پارە یان ئاخ؟ بێ دودلی بەهراپتر دێ یا ئێکێ، پارەی، هەلبژێرین، ئەرێ وێ چەندێ ناگەهینیت کو هەر پارتییەکا کوردستانێ یان رێکخراوەک هاتیە دامەزراندن، ئەف خەلکە چەند پالپشت بوویە و ل پشت وان ڕاوستیایە و قوربانی ژی بۆ داینە، لێ ئەڤرۆ هەمی تشتەک بوویە بەرژەوەندییێن رۆژانە دوور ژ هەر پرەنسیپەکێ ئەوا وان ڤیایی گەهشتنە وان ئارمانجێن خوە، خەلک ب درووشمێن بریقەدار خاپاندیە یا ن ژی چەند ئەو بوونە ئەگەرێ هندێ، لەوما دێ بینی هەستا نەتەوەیی لاوازە یان ژی ئەم ل دەڤەرەکێ دژین هیشتا تێگەهشتنا مە بۆ ئاخ ووەلاتی نە ل ئاستێ پێدڤیە.
یا دورست ئەم هەموو پێکڤە خزمەتێ بکن و ئارمانجا مە یا سەرەکی ئەو بیت ئەو ژی سەرخوەبوونا کوردستانێ یە، یان ژی مە چەند شیایە وەکو تاک شانازیێ ب کوردستانا خوە بکەین، نە بینە دارو دەستێن دۆژمنا ن و هێزێن داگیرکەر، گەلۆ چما ئەم نکارین ب هەڤرا بژین، لێ بەروڤاژی، ل گەل دوژمنێن کوردان وەکو براینە و هیچ پرۆبلمەک مه نینە، ب تەنێ ژ بۆ ئێکدوو دۆژمنین و هەڤدو بشکێنین، لەوما دبێژم هەستا نەتەوەیی ل دەف مە نە ل ئاستێ پێدڤیە. ئەڤێ ژی خزمەتەک وخەباتەکا بەردەوام پێدڤیت یا بێ ئاستەنگ وئالۆزی ژی نابت، چونکی ژ لایێ جیۆپۆلتیک ژ ی ڤە باندۆرا خوە هەیە، لێ دڤێتن ل بەرامبەری وێ تێکۆشانێ وئەوا مە بڤێتن بکەین ئارمانجا خوە و خەباتێ بۆ بکەین.
ل دوماهیێ ژی دێ بێژم بەری زيدەتر ژ ٣٠٠ سالان ئەحمدێ خانی دبێژیت: ئەز تاسەکێ ژ ئاڤا کوردستانێ نادەم ب ئاڤا کەوسەرێ. ئها ل ڤێرێ دیار دبیت چ هەستەک نەتەوەیی هەبوو، دڤیا رێیا وی بەردەوام بیت ئەم هەموو پێکڤە ل دوزا خوە خوەدی دەربکەڤین هەستا نەتەوەیی ب پەیڤا ن ناهێت زمان. دڤیا دناڤ ناخێ خوەدا هەست پێ بکەین دوور ژ هەر بەرژەوەندیەکێ، چونکی ل سەر ڤی ئەردی تو نکاری ژیانێ بەردەوام بکریتا رادەیەکێ پێکڤە گرێدانەکا هەیی ب هەڤدو ڤە. ب ئومێدا هندێ ئەم هەموو پێکڤە بێ جوداهی هەست ب ڤێ لاوازیا خوە بکن و ئەگەرێت سەرەکی بەرچاڤ بکن تەماشەیی بەری نها بکن بۆچی د کاودانێن شورەشێن کوردی دا خەلکێ مە ب گشتی پتر هەست پێ دکر و ئەڤرۆ هەمی تشت بەرۆڤاژی دبن و ب مخابنی ڤە یان ژی ئەو بەرپسیارەتیا کەفتیە سەر ملێ مە مە نەشیایە ب ئەمانەت بگەهینین.
