چ ل باکورێ کوردستانێ مایه‌ گه‌لۆ

نڤیسینا: بووبێ ئه‌سه‌ر

ل باکورێ کوردستانێ عه‌رد چوو، نامووس چوو ھاسیه‌ت چوو، عۆرف و عاده‌ت نه‌ما، زمان قه‌دیا یه‌. هه‌ڤالینی و دۆستانی نه‌مایه‌ ئان نه‌هشتن. ب هه‌ڤرا و ل گه‌ل هه‌ڤ مه‌ش، خوه‌پێشاندان، سۆحبه‌ت و کۆمبوون ل  کوردان قه‌ده‌خه‌ کرنه‌.

نها  ژی بریار گرتن کو ل باکورێ کوردستانێ زمانێ کوردی  ل چایخانان، ل جافییان، ل خوارنگەھ و جهێ قه‌لاباخ ژی قه‌ده‌خه‌ بکن.  سبێ وێ ڤان پارتیێن مه‌ یێن ته‌نێ په‌سنێ خوه‌ ددن و ب پاچان سه‌رێ خوه‌ مه‌زن دکن،  ئالا پارتیا خوه‌ ژ یا کوردستانێ مه‌زنتر ڕێ ددن ژی یه‌ک ب یه‌ک بگرن.

ئه‌ڤ حالێ نها باکورێ کوردستانێ تێ دا‌ یه‌، زیندانا دیاربه‌کرێ یا ب ناڤێ نۆلی ئانی بیرا من. د زیندانا دیاربه‌کرێ دا‌ ژی وەسا ل مە کرن. به‌رێ دوایا خوارنێ ب مه‌ دانه‌ خوه‌ندن، دووره‌ مه‌شێن له‌شکه‌ری یا نه‌رمک و تالی چ ئانینە سه‌رێ مه‌ هوون هه‌می دزانن.

نها ل باکورێ کوردستانێ ژی وه‌ها دکن. ده‌ست ئاڤێتن که‌چ و ژنێن  کورد، پارتیان ده‌نگ ده‌رنه‌خستن. داگیرکه‌رێن ترک یێن خوه‌ستن گرتن ئان کوشتن، ده‌نگ نینە. چ دخوازن ل باکورێ کوردستانێ وه‌ها دکن. پارتیێن مه‌ نکارن تشته‌کی بێژن. ترس و خۆف خستنه‌ ناڤا خه‌لکێ، لێ مخابن ئه‌و ترس و خۆف که‌تیه‌ ناڤا پارتی و ڕێخستنێن مه‌ ژی.

پارتیا ژ بۆنا ئازادیا وه‌لات هاتبە دا‌مه‌زراندن و ل دژی زلم و زۆرداریا ل وی وه‌لاتی دھێتە کرن و ئه‌و بێده‌نگ به‌ و نه‌ خوه‌دی هه‌لوه‌ست به‌، ئه‌و پارتی زووترین ده‌م  دڤێ خوه‌ ھەلوەشینە. هێز، قوه‌ت ئان ئه‌نیه‌ک ‌ نه‌ته‌وه‌یی دڤێ بێ ‌ دامه‌زراندن. یا نه‌ ئه‌م هه‌می ل گه‌ل هه‌ڤ وه‌ندا دکن.

ئه‌ز دزانم دێ گه‌له‌ک ئه‌ندام ئان مریدێن پارتیێن ب پاچان سه‌رێ خوه‌ مه‌زن دکن، دێ  ب ڤێ نڤیسێ بکه‌نن، ژ به‌ر کو ئه‌و باوه‌ر دکن وێ پارتیا وان، وه‌لاتێ وان ئازاد بکه‌. لێ نزانن و فێم ناکن کو د ده‌مه‌که‌ کورت دا وێ دۆر وه‌ره‌ وان و پارتیێن وان ژی.

ئه‌م هه‌می باش دزانن کو ئه‌و پارتیێن ژ بۆنا ئازادیا وه‌لاته‌کی بێنه‌ دامه‌زراندن، دڤێ ژ به‌ده‌لدایینێ، ژ لێدان و زیندانێن دژمن نه‌ترسن. لێ گه‌له‌ک مخابن کو ئیرۆ ل باکورێ کوردستانێ ڕه‌وش نه‌ ئه‌و ڕه‌وشه‌.

پارتیێن نه‌خوازن و نکاربن ل هه‌مبه‌ر كریارێن دژمن به‌ده‌ل بدن، دڤێ هوون بزانبن ئه‌و پارتی دێ نکاربه‌ وه‌لاته‌کی ژی ئازاد بکه‌.

هه‌تا کو پارتیێن مه‌ ب هه‌ڤرا‌ ل سه‌ر کریار و بوویه‌رێن دژمن دئینیتە سه‌رێ گه‌لێ مه‌، موناقه‌شه‌ نه‌کن و ژ بۆنا  پێشی ل وان كریارا بگرن، ‌ ته‌ڤگه‌ره‌ک ‌ نه‌ته‌وه‌یی دانه‌مه‌زرینن وێ ئه‌و ژی ب گه‌ل ڕا‌ تێک هه‌رن.

ڕێبه‌راتی، سه‌رۆکاتی و پێشکێشێن گه‌ل دڤێ ب جه‌ساره‌ت بن، دڤێ خوه‌دی هه‌لوه‌ست و بریار بن، دڤێ د گه‌ل هه‌می به‌ده‌لێن کو بدن هازر بن. دڤێ نه‌ وه‌که‌ نانێ سێلێ بن، ها ل ور و ها ل ڤر بن. دڤێ گران بن، د خه‌ت و هه‌لوه‌ستا خوه‌ دا‌ زه‌لال بن

لێ هه‌زار مخابن ڕه‌وشا پارتیێن مه‌ یێن باکورێ کوردستانێ ئیرۆ نه‌ وه‌ها یه‌. ئیرۆ پرانیا پارتیێن مه‌ ل باکورێ کوردستانێ که‌تنه‌ ده‌ردێ خوه‌ و مه‌زنبوونا خوه‌. لێ مه‌زن و به‌رفره‌ھ نابن.

نابینن کو زێده‌یی ٤۰ سالانە ئەو پارتی ھەنە و قه‌ت مه‌زن نه‌بوونه‌، عه‌کسێ وێ ڕۆژ ب ڕۆژ وه‌ندا کرنه‌ لێ هه‌ر وه‌نداکرنه‌کا‌ خوه‌ وه‌که‌ سه‌رکه‌تنه‌کێ ددن نیشاندان.

هه‌می پارتی دزانن کو ب سه‌رێ خوه‌ نکارن تشته‌کی بکن، لێ دیسا ژی نکارن د بن سیوانه‌کا‌ نه‌ته‌وه‌یی دا‌ ب هه‌ڤرا‌ ل دژی ڤێ زلم و زۆرداریا داگیرکه‌ران ڕاوه‌ستن.

ئه‌م وه‌که‌ کورد ڕۆژ ب ڕۆژ ژ باکورێ کوردستانێ بێ هێڤی دبن، ژ به‌ر كو چ ته‌ڤگه‌ره‌ک، چالاکیه‌ک، لڤاندنه‌کا ڤان پارتیێن مه‌ نینە. یێن دخوان تشتەكی بكن  هه‌لبه‌ت هه‌نه‌ لێ ژ به‌ر هێز و قوه‌تا وان یا نها تێرا ناکه‌، لۆما  ده‌نگێ وان ناگەھیتە گه‌ل. له‌ورا دڤێ ئه‌م هه‌می پارتیێن هه‌نه‌ د ئاگره‌کی دا‌ نه‌شه‌وتینن.

هوون دخوازن باوه‌ر بکن یان نه‌کن،  هه‌گه‌ر ڕه‌وش وه‌ها هه‌ره‌ د ده‌مه‌ک ‌ نه‌ زێده‌ دوور، دێ باکورێ کوردستانێ تێک هه‌ره‌. خه‌لاسیا وێ ئێدی ته‌نێ دمینه‌ ل سه‌ر ملێ باشوورێ کوردستانێ، هه‌تا کو ئه‌و ژی سه‌رخوه‌بوونا خوه‌ ڕادگەهینه‌.

ئه‌ز ب خوه‌ وه‌ها ل مه‌سه‌لێ دنێرم؛ هه‌تا ده‌مه‌که‌ کورت ئەڤ پارتی و ڕێخستنێن مه‌ تشته‌کی هه‌ڤبه‌ش کرن باشه‌  یا نه‌ هەم ئه‌و هەم گه‌ل ئه‌م هه‌می ب هه‌ڤرا‌ وه‌ندا دکن و ئێدی ئه‌م دێ بێ ته‌ڤگه‌ر ڕاوه‌ستن هه‌تا کو باشوورێ کوردستانێ ببه‌ سه‌ربخوه‌ و ده‌وله‌تا کوردی ڕاگەهینە…

نێرین / شیرۆڤە