ھەڤال ئەوێ تە كوشتی

ھەڤال، ئەوێ تە كوشتی كوردپەروەر، وەلاتپارێز و دەولەتخواز بوو، ھەڤال ئەوێ تە كوشتی ھەتا دوھی د چەپەرێن دژی تەرۆریستێن داعشێ دا شەرەف و كەرامەتا كوردان دپاراست. ئەوێ تە كوشتی  ھەتا دوھی د سەنگەرێن بەرخوەدانێ دا ل دژی حەشدا شەعبی پاسدارێن ئیرانێ ستاتویا شەرعیا باشوورێ كوردستانێ دپاراست، لێ مخابن ئیرۆ، ھەڤال، تە  ژ پشت ڤە خەنجەرا خیانەتێ ل پشتا وی  كوردێ ب غیرەت و ب شەرەف دا و تە خێزان و زارۆكێن وی ئێتیم و سێوی د مال دا ھێلان.

ھەڤال، ئەوێ تە كوشتی ل مالا خوە بوو، ل سەر ملك و ئاخا خوە بوو، چ گونەھا وی نەبوو، ب تەنێ كورد و پێشمەرگە بوو، ئھا ھەڤال تەو ئەو كورد و پێشمەرگە د مالا وی دا، ل سەر مك و وارێ وی ب خیانەت  كوشت.

ھەڤال، ئەوێ تە كوشتی، نەھاتبوو مێردین و دیاربەكر یان وان و جزیرێ، ئەو ژ بۆ كوشتنا برایێن خوە  نەھاتبوو باكورێ كوردستانێ، بزانە ھەڤال ئەوێ تە كوشتی  نەھاتبوو باكور  خوە بكە ئەلتەرناتیڤێ تە، ئەو ل باشورێ كورددستانێ بوو  ب بریار و یاسایێن حكومەتا شەرعیا ھەرێما كەردستنێ دگەریا و دلڤی، لێ بەلێ  تە، ھەڤال، ب خەنجەرا خیانەتێ ب خەنجەرا براكوژیێ ئەو یاسا و شەرعیەت كوشتن، بن پێ كرن و چ رێز و حورمەت ژێ را نەگرتن.

ئێدی بەسە ھەڤال، ھەتا ڤێرێ و ئێدی بەسە، ببە خوەدیی ئیرادەیا خوە، ڤەگرە سەر خەتا نەتەوەیی و ببە كوردپەروەر، ببە وەلاتپارێز، نەبە دار و ئالەتێ دەستێ دژمن و دەولەتێن داگیركەر دا. بەسە ھەڤال، وەختە ڤەگەرە مەیدانا خەباتا خوە یا راستەقینە  ل باكورێ كوردستانێ و ل وێرێ ببە چیخنێ ناڤ چاڤێن جەندرمێن ب پستالێن خوە ئاخا پیرۆزا باب و كالێن تە داگیركری. بەسە ھەڤال، ئێدی بەسە، ڤەگەرە، ڤەگەرە سەر رێیا راست، وار و ملك و ئاخا باكور ل بەندا تەیە، جودی و ئاگری و بینگول و ئارارت بێریا تەكریە. ڤەگەرە ھەڤال،   گازی و ھەوار و قیرینا جزیرێ، وان، ھەكاری دیاربەكر، باتمانێ …ھتد  دگەیتە ئەسمانێ حەفتێ و ل بەندا تەنە تو ڤەگەری و  وان ژ وێ بندەستیێ ژ وێ زیندانێ ژ بن وێ زۆلم و زۆرداریێ رزگار كەی، ڤەگرە وەخت ھاتیە تو ڤەگەری.

ئێدی بەسە ھەڤال، چما ب ڤان كریاێن خوە یێن قرێژ تو دلێ داگیركران خوەش دكەی و كەزەبا كوردپەروەر و وەلاتپارێزان دشەوتینی.  وەرە ھەڤال، ب ھەڤ  را، دگەل وی ئەوێ دوھی ل چەپەرێن بەرخوەدانێ بوو و ئیرۆ  تە ژ پشت ڤە  ب خەنجەرا خیانەتێ كوشتی دەستێن خوە بدەن ھەڤ، ب یەكرێزی و ھەڤگرتنێ دلێ داگیركەران، كەزەبا دژمن و نەیاران بشەوتینین و وەلاتێ خوە رزگار بكەین.

Nasrat Hacî

2020.11.05

نێرین / شیرۆڤە