رۆژا سێشەمی، ١٦ی حوزەیرانا ٢٠٢٦ێ، ل پیرمام، سەرۆک مەسعود بارزانی پێشوازی ل بالیۆز تۆم باراک، نوێنەرێ تایبەت یێ سەرۆکێ ئەمریکایێ بۆ کاروبارێن ئیراق و سوریایێ کر.
د جڤینێ دا، نوێنەرێ تایبەت یێ سەرۆکێ ئەمریکایێ بۆ کاروبارێن ئیراق و سوریایێ، دگەل گەیاندنا سڵاڤێن سەرۆک ترەمپ بۆ سەرۆک بارزانی، سپاسییا هەول و خەباتێن سەرۆك بارزانی یێن. ژ بۆ پاراستنا ئاسایشا ئیراقێ و دەڤەرێدا كر و رۆل و پێگەهێ سەرۆک بارزانی د پاراستنا ئەولەهی و ئارامییا ئیراقێ و هەرێمی دا بلند نرخاند و كەیفخوەشیا خوە ب دیدارا دگەل سەرۆک بارزانی دیار کر . هەروەسا تەئکید کر کو ئیراق و دەڤەر پێتڤی ب ئارامیێ نە و د ڤێ چەندێ دا هەرێما کوردستانێ رۆل و پێگەهەکێ گرنگ د نوکە و پاشەرۆژێدا هەیە. د هەمان دەمدا، سەرسۆرمانا خوە ب گەشەسەندن و پێشکەفتنا هەرێما کوردستانێ دەربڕی و ئەو وەک نموونەیەک ب ناڤ کر.
هەر د وێ جڤینێ دا، سەرۆک بارزانی دوپات کر کو هەرێما کوردستانێ هەر دەم فاکتەرەکێ ئارامیێ بوویە و هەرتم دگەل دیالۆگ و چارەسەریا دپلۆماسی بوویە بۆ هەموو پرسگێرێكێن ئیراقێ و دەڤەرێ. سەرۆك بارزانی گۆت: هەرێما کوردستانێ چ جاران نەبوویە بەشەک ژ پرسگێرێكێن هەنە، لێ بەلێ ب نەهەقی سەرچەقێن شەڕ و ناۆکۆکیێن هەرێمی گەهشتنە هەرێما كوردستانێ. سەرۆک بارزانی هەروەسا دیار کر کو پێتڤیە رۆژهەلاتا ناڤەراست بۆ ئاکنجییێن وێ بەر ب رەوشەکا ئارام و خوەشگوزارانیێ ڤە بچە.
د تەوەرەکێ دی یێ دیدارێدا، بەحسێ گرنگیا کارکرنا پێکڤە و هەماهنگیا د ناڤبەرا هەرێما کوردستانێ و حکومەتا نوو یا ئیراقێ دا هات كرن. نوێنەرێ تایبەت یێ سەرۆکێ ئەمریکایێ بەحسێ پێتڤیا پاراستن و ئاسایشکرنا سیستەمێ سیاسی یێ ئیراقێ و پاراستنا رۆلێ دەولەتێ د کونترۆلکرنا هێزێن چەکدار یێن نەفەرمی دا کر، و پشتەڤانیا خوە بۆ سەرۆکوەزیرێ ئیراقا فەدەرال د پرۆسەیا کۆمکرنا چەکان ژ دەستێ میلیشیان و ڤەگەڕاندنا وان بۆ بن دەستێ دەسهەڵاتا دەولەتا ئیراقێ دوپات کر.
سەبارەت حکومەتا نوو یا ئیراقێ، سەرۆک بارزانی تەئکید ل سەر پشتەڤانیا رێزدار عەلی زەیدی کر و دیار کر کو پێتڤیە هەموو ئالی پەند و عیبرەتێ ژ شاشیێن بۆری وەربگرن و ل سەر بنیاتێ هەڤپشکی، هەڤسەنگی و لێکتێگەهشتنێ د چارچۆڤێ دەستووریدا کار بکەن.
د بەشەکێ دی یێ دیدارێ دا، ل سەر رەوش و هاوکێشەیێن دەڤەرێ ئالوگۆڕیا بیر و رایان هاتە کرن. هەروەسا هەر دو لایەن هاوڕا بوون کو پێکڤە ل سەر کۆمەکا کارێن لەزگین و هەڤپشک بۆ ئاسایشا ئیراقێ و هەرێما کوردستانێ و ئاڤاکرنا دۆستایەتیەکا ستراتیژی یا درێژخایەن د بیاڤێ ئابووری و گەشەپێدان وەبەرهێنانێ دا کار بکەن
