ژ بەر “هەنەکەکێ ل سەر ژنا کورد” د دەرحەقێ کارساز رەحمی کۆچ دە ڤەکۆلین هاتە دەستپێکرن
کارسازێ ناڤدار یێ ترکیایێ رەحمی کۆچ، د مەڕاسمێن ڤەکرنا نەخۆشخانەیا ئەمریکى یا ل باژارێ ئیزمیرێ دا حەنەکەک کر. ئەڤ حەنەكا وى یا کو ڕاستەڕاست “ژنا کورد” دکرە ئارمانج، بۆ ئەگەرێ نەڕازیبوون و بەرپەرچدانێن گەلەک مەزن و د ئەنجام دا د دەرحەقێ وى دا دۆز هاتە ڤەکرن.
د مەڕاسمێ دا، دەما کو ڕەحمی کۆچ ل ژۆرێن پشکنینێ یێن نەخۆشخانەیێ دگەڕیا، حەنەکەک بۆ مێڤانێن ل گەل خوە کر. د ئەو دیمەنێن ژ لایێ کامێرایان ڤە هاتینە کێشاندن دا تێتە دیتن کو کۆچ وەها دبێژە:
“دکتۆر ل ئاریشەیا ژنەکا کورد گوهداری دکەت و ژێ ڕە دبێژیت: ‘خانم، ژ کەرەما خۆ ل پشت پەڕدەیێ جلوبەرگێن خۆ دەرخە.’ ژنکێ ژی د بەرسڤێ دە گۆت: ‘دکتۆر، هوون پێشێ جلوبەرگێن خۆ دەرخینن.'”
ئەڤ دیمەنە ب لەز ل سەر میدیایا جڤاکی بەلاڤ بوون. هەر وەها هاتە دیتن کو سەرۆکوەزیرێ بەرێ بینالی یلدرم ژی د بەرسڤا ڤێ حەنەكا کۆچ دا دکەنیت. پشتی بەلاڤبوونا ڤان دیمەنان، سەرداواکاریا گشتی یا ئیزمیرێ ب تۆهمەتا “سوکایەتیکرن ب پشکەک ژ جڤاکی ب گشتی” د دەربارێ ڕەحمی کۆچ دا ڤەکۆلینەک دا دەستپێکرن.
پشتی دەستپێکرنا ڤەکۆلینێ، وەزیرێ دادێ ئاکین گورلەک داخویانیەک دا و گۆت:
“ژ لایێ سەرداواکاریا کۆماری یا ئیزمیرێ ڤە ڤەکۆلینەک ل سەر داخویانیێن کارسازەکی ل سەر پلاتفۆرمێن میدیایا جڤاکی هاتیە دەستپێکرن؛ داخویانیێن کو تێدە ژن و وەلاتیێن ژ کۆمەکا ئتنیکی یا دیارکری هاتینە ئارمانجکرن. تەرازوویا دادپەروەریێ ل گۆرەی دەولەمەندی، پاشناو و پێگەیێ کەسان نایتە پیڤان; دادوەری هەر گاڤ ڕوومەتا مرۆڤان و یاسایێ دپارێزیت. ئەو داخویانیێن کو زیانێ دگەهیننە ڕوومەت و شەڕەفا ژنان و ب هەستیاریێن مە یێن جڤاکی را ناگونجن – کی دبێژیت بلا بێژیت – قەت ناهێنە قەبوولکرن. ڕاستییا کو گۆتنێن وەها د بن ناڤێ ‘حەنەک’ دە تێنە گۆتن، ڤێ بێڕێزیا ل هەمبەر ژنێن مە و پشکەکا دیارکری ژ جڤاکا مە سڤک ناکەت. ئەم دێ ب بڕیارداری ل دژی هەر جۆرە نێزیکبوونەکا جوداکار یا ل هەمبەر ڕوومەتا ژنێن مە و وەلاتیێن مە ڕاوەستین.”
پەیڤدارێ ئاک پارتیێ عومەر چەلیک ژی ل سەر ناڤێ پارتییا خۆ نەڕازیبوونەکا توند نیشان دا و ڕاگەهاند:
“ئەم هەموو جۆرێن زمانێ سوکایەتیکرنێ یێن ل دژی ژنان شەرمەزار دکەین. پێدڤی یە کو گۆتۆبێژێن ل سەر ژنان ب ڕێزگرتن، ب بالداری و ب کوالێتی بن. چو پشکەک ژ جڤاکا مە نکاریت ل گۆرەی باوەری، ئتنیک، چاند، ناسنامە یان ژی ڕەگەزی ببیتە مژارا زمانێ سوکایەتیێ، جوداکاری یان دۆربێخستنێ. نێزیکبوونێن وەها دبنە ئەگەرێ گۆتنێن نەفرەتێ. تێکەڵکرنا پەیڤا ‘ژنا کورد’ ب زمانەکی وەسا را ل دژی بهایێن مە یە؛ ئەو گەلەک خەلەت و کرێتە. ئەم ڤان نێزیکبوونێن کو وەلاتیێن مە یێن کورد و هەموو ژنان عاجز دکەن، ب ئاوایەکی کاتۆگۆریک ڕەد دکەین. گۆتارێن نەفرەتێ د بن ناڤێ میزاحێ دا قەت ناهێنە بەخشین. ڕاستکرنا ڤان گۆتنان و لێبۆڕینخواستن، مەرجەکێ ڕێزگرتنا ل بهایێن مە یە.”
پشتی بەرپەرچدانێن مەزن ێن ژ هەر ئالیەکی ڤە، کارساز رەحمی کۆچ داخویانیەک بەلاڤ کر و لێبۆڕین خواست. کۆچ دا دیارکرن کو مەبەستا وى قەت نە سوکایەتیکرن ل ژنەکا کورد یان ل چو کەسەکی دن بوویە. وى دیار کر کو ئەڤە تەنێ وەکو سەرپەهاتیەک یان پێکەنۆکەک (ئەنەکدۆت) هاتیە گۆتن و ئارمانجا وى نە کێمکرن یان بێڕێزی بوویە.
