ل گۆرەی پلانەکێ دۆسیەیا “ترکیایا بێ تەرۆر” د دو قۆناغێن جودا یێن قانونی دا دهێتە دارشتن
خەباتێن پڕئالی ل سەر وێ پرۆژەیا قانونی یا کو بۆ پێڤاژۆیا “ترکیایا بێ تەرۆر” دهێتە پلانکرن زێدە دبن. ل گۆرەی زانیاریێن دوماهیێ، دێ د دو قۆناغێن جودا دا ئەڤ قانوونە هێنە دەرخستن. د قۆناغا ئێکێ دا، دێ ڕێزکنامەیەک بۆ وان کەسان هێتە ئامادەکرن یێن کو د ناڤ ڕێزێن پەکەکێ دا بووینە لێ تێکەلی چو تاوانان نەبووینە. ژ ئالیێ دن ڤە، دێ قانوونەکا تایبەت بۆ وان کەسان هێتە دارشتن یێن کو دەستێ وان د تاوانان دا هەین.
تێتە چاڤەڕێکرن کو ئەڤ قانوونا چارچۆڤە د هەیڤا تیرمەهێ دا بهێتە ڕۆژەڤا پەرلەمانێ ترکیایێ. ل گۆرەی وێ پرۆژەیا کار ل سەر دهێتە کرن، پێڤاژۆیا ژناڤبرنا هەموو هێمایێن چەکدار و بێچەککرنا وان دێ د چارچۆڤەیا پیڤەرێن ئۆبجێکتیف، پیڤایى و ڤەرستکری دا هێتە چاڤدێریکرن. بۆ کو ئەندامێن ڕێکخراوێ یێن دگەهنە ترکیایێ ژ مافێ ئازادکرنا ب مەرج (چاڤدێرییا ئازاد) مفا وەربگرن، پێدڤیە ڕادەستکرنا هەموو چەک و جبەخانەیێن د بن کۆنترۆلا پەکەکێ دا ژ لایێ یەکینەیێن ئستخبارات و ئەولەهیێ ڤە بهێتە تۆمارکرن.
ل گۆرەی ڕاپۆرتەکێ، د دەستپێکێ دا دێ بۆ وان ئەندامێن ڕێکخراوێ یێن بەشدارى چو جۆرە چالاکیێن سۆچداری نەبووین، پرۆسێدۆر هێنە دەستپێکرن. ئەگەر ب بەلگەیێن بەرچاڤ بهێتە سەلماندن کو پەیوەندیێن وان یێن ڕێکخراوەیی هاتینە بڕین، ب بڕیارا دادگەهێ دێ ڕەوشا وان ب ئاوایەکی هێتە چارەسەرکرن کو نەکەڤنە د زیندانێ دا.
قۆناغا ئێکێ: زێدەتری ۱۰ هەزار کەس ل چاڤەڕێیا ڤەگەرێ نە
ل گۆرەی داتایێن یەکینەیێن ئستخبارات و ئەولەهیێ، تێتە خەملاندن کو ل هەرێما قەندیلێ نێزیکی ۷,۰۰۰ ئەندامێن ڕێکخراوێ و ل کەمپێن دن ژی نێزیکی ٣,۰۰۰ کەسان هەنە. کۆما ئێکێ یا کو دێ ڤەگەڕنە تورکیایێ دێ ژ وان کەسان پێکهێت یێن کو تەڤلی ڕێکخراوێ بووین لێ بەشداری چو چالاکیێن چەکداری نەبووینە.
هەروەسا هاتیە دیارکرن کو ئەو کەسێن وەک سمپاتیزانێن ڕێکخراوێ دهاتنە نیاسین، لێ سالانەک پێش نوها ژ ترکیایێ چۆینە سووریێ و عیراقێ و هەر چەند تەڤلی ڕێکخراوێ ژی نەبووینە لێ ل وان دەڤەران ژیانا خۆ ئاڤا کرینە، ئەو ژی ل چاڤەڕێیا ڤەگەڕیانا ترکیایێ نە. تێتە گۆتن کو ئەڤ کۆمە ژی دێ د قۆناغا ئێکێ دا د ناڤ وان کەسان دا بن یێن کو دێ ڤەگەرن.
ئەڤ قانوونا چارچۆڤە دێ سنوورەکێ دەمی بۆ هاتنا ئەندامێن ڕێکخراوێ بۆ ترکیایێ دەستنیشان کەت. پشتبەستن ب ڕەوشێ، ئەڤ دەمە دشێت بۆ دو هەیڤێن دن ژی بهێتە درێژکرن. پشتی دەربازبوونا قانوونێ ژ پەرلەمانی، دێ ڕێ ب وان کەسان هێتە دان کو د قۆناغا ئێکێ دا وەک بێتاوان دهێنە نیاسین، وەرنە ترکیایێ.
قۆناغا ئالۆز: ڕەوشا سەرکردەیێن بلند و چەکداران
قۆناغا هەرى ئالۆز و پڕ ئاریشە یا ڤێ ڕێزکنامەیا قانونی، دێ ل سەر وێ کۆمێ بیت یا کو چالاکیێن چەکداری یێن ڕێکخراوێ ئەنجام داینە. ل سەر ڤێ مژارێ، پسپۆرێن حقوقی ب هووری کار دکەن.
هەروەسا فۆرمۆلێن جودا ل سەر وێ یەکێ دهێنە نرخاندن کا دێ سەرکردەیێن پایەبلندێن ڕێکخراوێ چنە کیژ وەلاتی. بەڕێ، هەر چەند بیرۆکەیا ڕەوانەکرنا ڕاستەوڕاست یا نێزیکی ۲۰۰ کەسان بۆ وەڵاتێن ئەسکەندیناڤیایێ (وەک سوێد) یان وەڵاتێن ئەفریقایێ دهاتە نرخاندن، لێ پاشێ ئەگەرێ هندێ کو هندەک ژ وان وەرنە ترکیایێ دا کو سزایێ خوە ل زیندانا ئیمڕالیێ دەرباز بکەن، هاتە پێش.
دیتنێن دوماهیێ نیشان ددەن کو هەر دو ڕێباز ژی گونجاون . هندەک ژ وان دێ سزایێن خوە ل ئیمڕالیێ دەرباز کەن، لێ هژمارا وان دێ گەلەک یا سنووردار بیت. تێتە چاڤەڕێکرن کو تەنێ ئەو کەسێن ژ لایێ ئۆجەلان ڤە دهێنە پەسندکرن، ل ئیمڕالیێ بهێنە گرتن.
