دیتنەکا لۆژیکی ل سەر پەیوەندیا د ناڤبەرا ئایدیۆلۆژیا سیاسی و ناسنامەیا نەتەوەیی دا
ژ ئالیێ لۆژیکی ڤە، بنەمایەکێ جێگیر هەیە کو دیار دکە: هەر لایەن یان کەسایەتیەک، ل سەر هەر ئاستەکێ دەستهەلات یان پێگەیێ جڤاکی بە، دەمێ دژی مافێن نەتەوەیی یێن رەوا وەک (ئۆتۆنۆمی، فیدرالیزم، سەربەخوەبوونێ و مافێ پێکئینانا دەولەتێ) ب راوەستیت، ب شێوەیەکێ ئۆتۆماتیکی و بێی دودلی، هێما و سمبولێن وان قەوارەیان ژی قەبوول ناکەت؛ ژبەر کو ئالایێ نەتەوەیی د چەمکێ سیاسی دا، گوزارشتێ ژ پێکهات و سەروەریا هەرێمەکا دەستووری، ئۆتۆنۆمی و فەدەرالی یان دەولەتەکا سەربەخوە دکە.
ل سەر ڤی بنگەهی، هەر هونەرمەندەکێ د کۆنسێرت و کۆمبوونێن گشتی دا گوتارا دژبەریا پێکئینانا دەولەتێ بەلاڤ بکە و بانگەشەیا هندێ بکە کو گەلێ کورد پێدڤی ب چوارچۆڤەیێ دەولەتبوونێ نینە ب بەهانەیا هەبوونا سەرکردایەتیەکا ئایدیۆلۆژی وەک (رێبازا ئاپۆیی)، ئەو بێی گومان ئالایێ کوردستانێ رەت دکە.
بۆ نموونە، (دیار دێرسم) د ڤێ چارچۆڤەیێ دا كەتیە ناڤبەرا نال و بزمارێ و لایەنگری د ناڤبەرا دو ئاراستەیێن دژبەر دا دهێتە دیتن; ژ لایەکێ ڤە، وی نەڤێت ب شێوەیەکێ ئاشکرا ئالایێ کوردستانێ رەت بکە دا کو پێگەیێ خوە یێ جەماوەری ژ دەست نەدە و پشکەکا مەزن ژ حەژێكەرێن خوە ژ خوە زیز نەکە، و ژ ئالییەكی دن ڤە، ژبەر پێپەستبوونا وی ب رێسایێن ئایدیۆلۆژی یێن پارتییا وی و ترسا ژ كارڤەدانێن سەرکرۆكاتییا وی، رێ پێ ناهێتە دان کو ب فەرمی وەک سمبولەکێ نەتەوەیی دانپێدانێ ب ئالایێ کوردستانێ بکە.
