شرۆڤەکارییەک ل سەر وەرچەرخانێن ستراتیژی یێن یەکێتیێ و کاریگەرییا وێ ل سەر قەوارێ هەرێما کوردستانێ
ژ ئەو رۆژا بافل تالەبانی ب فەرمی دهست ب سەر سەرکردایەتییا یەکێتییا نیشتمانییا کوردستانێ دا گرتی و بوویە سەرۆکێ وێ، گۆهەرتنێن ڕادیکال د هزر و دیدەیا سیاسی و ستراتیژی یا ڤێ حزبێ دا دیار بووینە. گەلەک ژ چاڤدێرێن سیاسی ل سەر وێ باوەریێ نە کو سیاسەتا نوو یا یەکێتییێ ب ئاشکرا بەر ب هزر و تیۆرییا عەبدوللا ئۆجەلانی (سەرۆکێ پەکەکێ) دچیت، ب تایبەتی د چارچۆڤەیێ پەیرەوکرنا پرۆژەیێ “براتییا گەلان” و “نەتەوەیا دیمۆکراتیک”. ڕەخنەگر ل سەر وێ باوەریێ نە، کو ئەڤ ئاراستەیە د کاکلا خوە دا دەستبەرداربوونە ژ مافێن نەتەوەیی یێن دەستووری یێن گەلێ کورد و پاشەکشەکرنە ژ ناسنامەیا نەتەوەیی، کو د سەرەنجام دا دکارت دگەل ئەجێندایێن هەرێمی (ب تایبەتی بەرەیێ مقاوەمە و بەرژەوەندیێن دەولەتێن جیران) ببیتە ئەگەرێ لاوازکرن و ژناڤبرنا قەوارێ فیدرالی یێ هەرێما کوردستانێ.
بۆ پشتڕاستکرنا ڤێ دیدەیا ڕەخنەیی، چەندین مژار و پێشهاتێن پڕاکتیکی د گۆڕەپانا سیاسی دا دهێنە بەحسکرن کو ڤێ راستیێ دسەلمینن:
١. پەیاما نەورۆزێ بۆ ئۆجەلانی:
ئێک ژ ئاماژەێن هەرە دیار یێن ڤێ نێزیکبوونێ، پەیاما فەرمی یا بافل تالەبانی بوو ب هەلکەفتا جەژنا نەورۆزێ ئاراستەی عەبدوللا ئۆجەلانی کری، دەمێ ب دەستەواژەیێ “سلاڤ سەرۆک ئاپۆ” بافل د پەیاما خوه دا یڤی خواست کو ل سالا بهێت ئۆجەلان ل ترکیایێ ئازاد ببیت، داکو ب هەڤڕا پرۆژەیێ وی یێ سیاسی ب سەرکەفتیانە بگەهیننە دیماهیکێ. ئەڤ لاینگرییا ئاشکرا، وەک وەرچەرخانەکا مێژوویی د سیاسەتا دەرڤەیا سلێمانیێ دا تێتە لێکدان.
٢. هەڵوێستێن ل سەر کەرکووکێ و تێکلیێن هەرێمی:
پشتی ڤێ نێزیکبوونا ئایدیۆلۆژی ب چەند هەیڤان، بریارێن سیاسی یێن گرێدای ب کەرکووکێ ڤە پرسیارێن مەزن دروستکرن; دەمێ کو لادانا پارێزگارێ کورد و دانانا کەسایەتییەکێ تورکمان ل جهێ وی هاتە ئەنجامدان. ئەڤ پێنگاڤە ژ لایێ ڕەخنەگران ڤە وەک ڕێخوەشکرنەک و بکارئینانا کارتا پێکهاتەیێ تورکمان تێتە لێکدان، داکو یەکێتی بشێت تێکلیێن خوە دگەل ئەنقەرەیێ ئاسایی بکەتەڤە، بێی کو چ چاکسازی د ناڤەرۆکا کێشەیێن نەتەوەیی دا بهێتەکرن.
٣. تاکڕەوی د دەستەلاتێ دا و سەرکوتکرنا دژبەران:
ل سەر ئاستێ ناوخوەیی یێ دەڤەرا سلێمانیێ، شێوازێ بڕێڤەبرنا بافل تالەبانی هاتیە بەراوردکرن دگەل سیستەمێ توند و ئینزیباتی یێ ناوخوەیا پەکەکێ، کو تێدا جوداهییا دیتنان و ڕەخنە ناهێنە قەبوولکرن. د ڤێ چارچۆڤەیێ دا، ڕووداوێن هێرشکرنا سەر لاله زار، ب بکارانینا هێزێ، و زیندانیکردن یان دوورخستنا پسمامێن وی (لاهور شێخ جەنگی و برایێ وی) وەک نموونە دهێنە دیارکرن. هەروەسا سزادان و زیندانیکردنا شاسوار عەبدولواحید ( نها هاتیە ئازادکرن) و سەرکردێن دی یێن ئۆپۆزسیۆنێ ل سلێمانیێ، دیمەنێ گشتی یێ دیمۆکراسیێ ل وێ دەڤەرێ خستییە ژێر گومانێ.
ب کۆمکرنا ڤان ههموو فاکتەران، ڕەخنەگر و چاڤدێر وسا دبینن کو باژارێ سلێمانیێ و دەڤەرێن ژێر دەستەلاتا یەکێتیێ، ژ ناڤەندەکا لێبۆردەیی و فرەهییەکا سیاسی، بەر ب سیستەمەکێ داخستی و زیندانەکا مەزن دچن. ئەڤ گۆتارا سیاسی یا نوو، ب کۆپیکردنا مۆدێلا ئۆجەلانی د ناڤا واقیعی قەوارێ فیدرالی یێ باشوورێ کوردستانێ دا، مەترسییەکا ڕاستەقینە ل سەر پاشەرۆژا دەستکەفتێن دەستووری یێن گەلێ کورد ل باشوورێ کوردستانێ دروست دکەت و زەمینەیێ بۆ دەستوەردانێن فرە لایەن یێن دەولەتێن داگیرکەر خوەشتر دکەت.
نسرەت حاجی
٢٠٢٦/٦/١٤
