سەرۆک بارزانی بە هەڵکەفتا ٨٠ سالییا دامەزراندنا پارتی دیموکراتی کوردستان پەیامەکا پیرۆزباهیێ ئاراستەیی خەڵکێ کوردستانێ کر و جەخت ل سەر هندێ کر کو پارتی باوەریا وێ یا پتەو ب پێکڤەژیان، برایەتی و تەبایییا ناڤبەرا هەمی پێکهاتێن نەتەوەیی و ئایینی و سەرجەم لایەنێن سیاسی یێن کوردستانێ و عێراقێ هەیە.
دەقێ پەیاما سەرۆک بارزانی بە هەڵکەفتا ٨٠ سالییا دامەزراندنا پارتی دیموکراتی کوردستان:
ب ناڤێ خودایێ بەخشندە و میهرەبان
ب هەڵکەفتا شازدەی تەباخێ و یادا ٨٠سالییا دامەزراندنا پارتی دیموکراتی کوردستان، گەرمترین پیرۆزباهییان ل مالباتێن سەربەرزێن شەهیدان، پێشمەرگەیێن قارەمان، سەرجەم جەماوەر و لایەنگرێن پارتی و هەمی خەڵکێ کوردستانێ دکەم.
پارتی ژ بۆنا ڤەگەڕاندنا هێڤی و هێزێ بۆ گەلێ کوردستانێ د سەردەمەکێ سەخت و دژوار دا هاتە دامەزراندن. ب درێژاهیا مێژووا خەباتا خوە، پارتی قوتابخانەیا تێکۆشەر و شۆڕشگێڕێن کوردستانێ بوویە و د هەمی قۆناغان دا بەرەڤانەکا سەرسەختا مافێن ڕەوایێن گەلێ کوردستانێ بوویە. پارتی د رابردو، نوکە و پاشەرۆژێ دا ئامرازەکە ژ بۆ خزمەتکرنا خەڵکی و بجهئینانا ئارمانج و بەهایێن نەتەوەیی و نیشتمانی.
پارتی باوەریا وێ یا پتەو ب پێکڤەژیان، برایەتی و تەبایییا ناڤبەرا هەمی پێکهاتێن نەتەوەیی و ئایینی و سەرجەم لایەنێن سیاسی یێن کوردستانێ و عێراقێ هەیە، هەروەسا پرەنسیپێ هەڤپشکی و ڕێزگرتن ل دەستووری ب زامنا سەقامگیری، ئارامی و ڤەژینێ د هەمی عێراقێ دا دزانیت.
د یادا شازدەی تەباخێ دا، پەیاما من بۆ جەماوەر، لایەنگر و ئهندامێن پارتی ئەوە کو پارتی سەرچاوەیێ هێزا گەلێ کوردستانێ یە، ئەرکێ سەرەکیێ پارتی خزمەتکرنا گەلێ کوردستانێ یە و ب پشتبەستن ب خودایێ مەزن و ئیرادە و هیمەتا وە و هەمی خەڵکێ کوردستانێ، هیچ کۆسپ و ئاستەنگەک نکارێت ببیتە ڕێگر ل بەرامبەر ڤی ئەرکێ پیرۆز دا.
د ڤێ هەڵکەفتێ دا یادا هەمی وان شەهیدان، پێشمەرگە، تێکۆشەر و قارەمانان بەرز ڕادگرین کو ب درێژاهیا خەباتا پارتی قوربانی داینە. هەروەسا پێزانینێن من بۆ ڕۆڵێ کادر، ئەندام و جەماوەرێ خوەشتڤیێ پارتی هەنە کو دڵسۆزانە و ماندوونهناسانە د هەمی بارودۆخان دا پشتیڤانێن پارتییا خوە بووینە و مێژوو و شانازی بۆ گەلێ خوە تۆمار کرینە.
مەسعود بارزانی
١٦ێ تەباخا ٢٠٢٦
