پتریا هەڵکەفتێن ساڵڤەگەرا ڕوودانێن مێژوویی، بیرئینانا دامەزراندنا پارتیێن سیاسی بەحسێ مێژووا وان دهێتە کرن. تایبەت ساڵڤەگەرا پارتیێن سیاسی دا فەرە ڕۆژا کو مرۆڤ تێدا دژیت ژی ب بەرفرهی بەرچاڤرە دەرباس بکت. ژ بەر کو مێژوو د گەلەک قۆناغێن جودا دەرباس دبیت، هەر قۆناغەک خودانێ تایبەتمەندیێن جودایە و هندەک قۆناغان دا دەستهەڵاتداریا پارتیێن سیاسی دهێنە گوهۆرین، هندەک دهێن و هندەک دچن. ئەڤ یەک د سروشتێ پارتیان و ژیانا سیاسی دا هەیە.
مێژووا پارتی دیموکراتی کوردستان ب مێژووا تێکۆشینا ئازادیا مللەت و وەلاتەکی ڤە هاتیە گرێدان. ژ بۆ ڤێ فەرە ئەڤ مێژووە باش بێتە زانین، دا کو مرۆڤ پتر پێشیا خوە ببینیت. فەرە کادرێن نوو ڤێ مێژوویێ باش بزانن دا کو ل گرانیا بارێ سەر ملێن خوە بحەسیێن.
نەتێگەهشتنەکا گرنگ ئەوە کو، هندەک جاران هندەک کادرێن پارتییان پاش خوە نانێرن و تەنێ ل پێشیا خوە دنێرن، ژ وان ڤە وەسایە کو هەمی تشت ب وان دەستپێکریە، بەلکی ئەڤ یەک ژ بۆ تەڤگەرەکێ ئاڵۆزیا هەرى مەزن پەیدا دکەت و دبیتە ئاستەنگ ل پێشیا تێگەهشتنا کادرێن نوو دا.
د ١٦ێ تەباخا ٢٠٢٦ێ دا، پارتی دیموکراتی کوردستان (پەدەکە) ٨٠ ساڵییا دامەزراندنا خوە پیرۆز دکەت. ئەڤ ٨٠ سال، د مێژووا بزاڤا ڕزگاریخوازا گەلێ کورد دا، سەردەمەکێ پڕی تێکۆشین، قوربانیدان و دەستکەفتێن مێژوویی نە. د بن سەرۆکاتیا نەمر مەلا مصطفی بارزانی دا، پەدەکێ شیابوو ببیتە ناسنامەیەک ژ بۆ بەرخوەدانا نەتەوەیی و بنگەها گەلەک مافێن کو ئیرۆ کوردان ل باشوورێ کوردستانێ ب دەست ڤە ئیناین، ئاڤا بکت.
لێ بەلێ، وەکی هەر بزووتنەوەک ئان پارتییەکا سیاسی یا کو ئەوقاس تێکۆشین کری، شۆڕەشەکا نەتەوەیی ل دارخستی و بوویی هێڤیا پێکانینا خەیالا نەتەوەیەکێ و پشتی پرۆسەیەکا دژوار و تێکۆشینەکا بێ هەڤتا شیایە هەتا ڕادەیەکێ بگەهیتە ئارمانجا خوە. پەدەکە ب ساڵانە ل باشوورێ کوردستانێ خودان دەستهەڵاتە، لێ ژ ئاڤاکرنا کوردستانێ، پاراستنا ستاتۆیا کو ئیرۆ هەیی پێشڤەبرنا ڤێ ستاتۆیێ هەتا سەربخوەبوونەکێ هێژ ل پێشیا پارتی هەنە. بێگومان دەما بەحسێ پەدەکێ دهێتە کرن وەکی هەر تشتەکی فەرە ب ئاوایەکێ جودا و ل گۆڕەی قۆناغێن تێرا دەرباس دبیت بێتە نرخاندن.
پشتی دەستخستنا ستاتۆیا باشوورێ کوردستانێ، پێدڤیاتیا پەدەکێ ب خوەنووکرن و نرخاندنەکا تایبەت هەیە. ژ بۆ پاراستنا میراسا مصطفی بارزانی و مسۆگەرکرنا پاشەرۆژا هەرێما کوردستانێ، گرنگە کو کێماسی وەرن دیتن و ڕەخنەیێن ئەرێنی و ئاڤاکەر وەرن پێشکێشکرن.
ژ بۆ زیندیمان و پێشڤەترچوونێ، پێدڤی ل نرخاندنەکێ ل سەر دەستکەفت، کێماسی و ڕەخنەیێن ئەرێنی هەیە.
چەند خاڵێن گرنگ هەنە کو، فەرە بەحسێ وان بێتە کرن. پەدەکە د پێڤەژۆیا خەبات و تێکۆشینا خوە دا شیا ناسنامەیا نەتەوەیی یا کوردان بپارێزیت. شۆڕەشا ئیلۆنێ یا ب پێشەنگیا بارزانییێ نەمر، ڤینا گەلێ کورد ل بەرامبەر ڕژێمێن دیکتاتۆر یێن عێراقێ زیندی کر و ناسنامەیا کوردی ژ حەلاندنێ پاراست.
خەباتێن دوورودرێژێن پەدەکێ بوونە ئەگەرێ ئاڤاکرنا هەرێما کوردستانێ وەکی قەوارەیەکا دەستووری و فیدرالی. دەستخستنا ڤێ قەوارەیێ هێڤیێن کوردان ژ نوو ڤە شین کرن و کورد هێدی ژ فیدرالیێ دڤێن بەر ب کۆنفیدرالیێ و هەتا بەر ب سەربخوەبوونێ ڤە بچن.
ل کوردستانێ، د واری بپێشخستن، ئاڤاکرن و دیپلۆماسیا نێودەوڵەتی دا گاڤێن گرنگ هاتینە هاڤێتن.
ژ بۆ کو پەدەکە د ٨٠ ساڵییا خوە دا بشێت بەرسڤا داخوازێن نڤشێ نوو بدت و دەستهەڵاتەکا چێتر ئاڤا بکت، ئەڤ خاڵێن ژێرین دەردەکەڤنە پێش:
- دەرباسبوون ژ “حزبایەتیێ” بەر ب “سازیبوونێ” ڤە پێدڤیەکە: میراسا شۆڕەشگەری گرنگە، لێ دەستهەڵاتدارییا نۆژەن پێدڤی ب سازیێن نەتەوەیی و بێلایەن هەیە. ڤێت پەدەکە هەوڵ بدت کو هێزێن پێشمەرگە، ئەولەهی و ساسیێن حکوومی ژ دەستوەردانا حزبی دەربێخیت و وان بکتە سازیێن نیشتمانی یێن ڕاستەقینە.
- بپێشخستنا ئابۆری: پێدڤیەکا مەزنە پەدەکە پێشەنگییا جوداکرن و هەمەرەنگکرنا ئابۆری (چاندن، گەشتیاری، پیشەسازی) بکت و سیستەمەکێ روون و شەفاف ژ بۆ داهاتێن ناڤخوەیی و سنۆران ئاڤا بکت دا کو باوەریا وەلاتيان ب حکوومەتێ زێدە ببت.
- ئازادیا ڕامان و میدیا: د هندەک دەمان دا، گرتنا ڕۆژنامەڤانان ئان ئەکتیڤیستان ل هەرێما کوردستانێ دبیتە ئەگەرێ ڕەخنەیێن ڕێکخراوێن ناڤدەوڵەتی. فەرە ل سەر ڤێ یەکێ گەلەک بێتە ڕاوەستیان، ڕاستیا ڕووددەت ژ جیهانێ را ب ئاوایەکێ شەفاف بێتە روونکرن. هەرچەندە مرۆڤ دزانیت کو گەلەک پروڤۆکاسیۆن ژی د ڤی واری دا هەنە، فەرە پارتی گەلەک یا هشیار بت و ڕێ ل بەر ڤان پروڤۆکاسیۆنان بگریت.
- جڤاکەکا ئازاد و پێشکەفتی ب ڕەخنەیێ مەزن دبیت. دڤێت پەدەکە قادا ئازادیا ڕامانێ بەرفرهتر بکت و ڕێ بدت کو میدیا و جڤاکا سڤیل وەکی چاڤدێرەکێ سەربخوە کار بکەن. ئەڤ یەک نە ئاڵۆزی ئان قەلسیا دەستهەڵاتێ یە، بەڵکۆ نیشانا هێز و باوەریێ یە.
- گرنگیدان ب گەنجان: ئیرۆ گەلەک گەنجێن کورد ژ بۆ ئەگەرێن جودا و جێبەجێنەبوونا هێڤیێن وان بەرێ خوە ددنە وەلاتێن ئەورۆپایێ. دڤێت گرنگیدانەکا تایبەت ژ بۆ گەنجان هەبت. سیستەما پەروەردەیێ و یەکسانییا د دەرفەتێن کاری دا دکارت نڤشێ نوو ل وەلاتێ خوە بلهێلیت.
- ئێکڕێزیا ناڤخۆیا کوردستانێ: ئاڵۆزیێن دگەل ئێکەتییا نیشتمانییا کوردستانێ (یەنەک)ێ و پارتییێن دن، پێگەهێ کوردان ل بەغدا و قادا ناڤدەوڵەتی قەلس دکت. وەکی پارتییا هەرى مەزن، بەرپرسایەتیا سەرەکی یا ئێکڕێزیێ دکەڤیتە سەر ملێن پەدەکێ. پێدڤیە نێزیکبوونەکا نەرمتر و ستراتیژیەکا ئێکگرتی ژ بۆ پاراستنا دەستکەفتێن هەرێما کوردستانێ بێتە ڕێڤەبرن.
د ئەنجام دا، مێراتیا مصطفی بارزانی مێراتیەکا نەتەوەیی یە کو ب قوربانیێن مەزن هاتیە ئاڤاکرن. لێ سەرکەفتنا پەدەکێ د پاشەرۆژێ دا، دێ نە تەنێ ب بیرئینانا مێژووا وێ یا زێڕین، بەڵکۆ ب شیانا وێ یا ژ بۆ دیتنا کێماسیێن خوە، قەبوولکرنا ڕەخنەیان و ئەنجامدانا ڕیفۆرمێن ڕاستەقینە ڤە گرێدایی بت.
قۆناغا ئەم تێرا دەرباس دبن، تەنێ قەوارەیا باشوورێ کوردستانێ وەکی دەستکەفتەکا بنگەهی و هێڤیا مەزنا گەلێن کوردستانێ یە. ب ڤێ یەکێ ڤە گرێدایی تەنێ پەدەکە وەکی هێڤیا دەولەتبوونا کوردان مایه.
ڕێبازا بارزانی ژ بۆ سەرکەفتنێ گەرانتیەکە. ئەگەر ل سەر ڤێ ڕێبازا پیرۆز کار و خەبات بێتە کرن، دێ پەدەکە شێت د وەلاتەکێ سەربخوە دا ژیانەکا ئازاد ژ بۆ گەلێن کوردستانێ بئافرینیت..
ب ڤێ هێڤیێ، ٨٠ ساڵییا پەدەکێ پیرۆز بت!
